ލުބްނާނުގެ ގާނޫނު ހަދާ މަޖިލީހުން ޖެހިޖެހިގެން 12 ވަނަ ފަހަރަށް އާ ރައީސަކު ކަނޑައެޅުމަށް ނުކުޅެދި، އެތައް މަހެއް ވަންދެން އެ ގައުމަށް އަސަރުކޮށްފައިވާ ސިޔާސީ ހަމަނުޖެހުން ދިގުލައިގެން ހިނގައްޖެއެވެ.
މިދިޔަ ބުދަ ދުވަހު ގާނޫނު ހަދާ މަޖިލީހުގެ މެމްބަރުން ވަނީ ކުރީގެ ރައީސް މިޝޭލް އައުންގެ ދައުރު މިދިޔަ އަހަރުގެ އޮކްޓޫބަރު މަހު ހަމަވި އިރު، އެ މަގާމަށް ބޭފުޅަކު ކަނޑައެޅުމަށް ޖަލްސާއެއް ބާއްވައިފައެވެ. ނަމަވެސް މަޖިލީހުގެ މެންބަރުންގެ މެދުގައި ހިޔާލު ތަފާތުވުންތަކެއް އުފެދުމުގެ ސަބަބުން އާ ރައީސަކު ހޮވުމަށް ބޭނުންވާ ވޯޓަކަށް ނުދެވުނެވެ. މިހާރު ހިނގަމުންދާ މި ޑެޑްލޮކްގެ ސަބަބުން ލުބްނާނަށް އާ ލީޑަރަކު ހަމަޖެއްސުމުގެ މަސައްކަތަށް ވަނީ ހުރަސް އެޅިފައެވެ.
އާ ރައީސަކު ހޮވުމަށް އެންމެ ފަހުން ކުރި މަސައްކަތުގައި އެންމެ ބޮޑަށް ވާދަކުރެއްވީ ކުރީގެ ފިނޭންސް މިނިސްޓަރު އަދި އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އިސް އޮފިޝަލެއް ކަމަށްވާ ޖިހާދު އަޒޫރާއި ފާހަގަކޮށްލެވޭ ސިޔާސީ އާއިލީ ބެކްގްރައުންޑެއް އޮންނަ މަރަޑާ ޕާޓީގެ ލީޑަރު ސްލެއިމަން ފްރާންގީހެވެ.
ފުރަތަމަ ބުރުގެ ވޯޓުގައި އާ ރައީސަކު ހޮވުމަށް 128 މެމްބަރުންގެ ތެރެއިން މަދުވެގެން 86 މެމްބަރުން ނުވަތަ ތިންބައިކުޅަ ދެބައި މެމްބަރުން ބޭނުންވާނެ އެވެ. ފުރަތަމަ ބުރުގައި އަޒޫރަށް 59 ވޯޓް ލިބުނު ނަމަވެސް ފްރާންގީހްގެ 51 ވޯޓު ފަހަތަށް ޖައްސާލި ނަމަވެސް، ބޭނުންވާ އަގުލަބިއްޔަތު ނުލިބުނެވެ.
