އިއްޔެ މޫސުން ގޯސްވެގެން އަޑިއަށް ދިޔަ "ރިކާޑޯ" ދޯންޏާއި އެކު ހެލްތު މިނިސްޓްރީން އދ. އަތޮޅު ހޮސްޕިޓަލާއި އެ އަތޮޅު ސިއްހީ މަރުކަޒުތަކަށް ފޮނުވި މިލިއަނެއްހާ ރުފިޔާގެ އައިޓީ ސާމާނު ގެއްލިއްޖެއެވެ.
ހެލްތު މިނިސްޓްރީގެ އެގްޒެކެޓިވް ޑިރެކްޓަރު އައިމިނަތު ޝަތުފާ ވިދާޅުވީ، ސިއްހީ ދާއިރާ ޑިޖިޓަލައިޒް ކުރުމުގެ ގޮތުން ފެށި މަޝްރޫއުގެ ދަށުން އދ. އަތޮޅު ހޮސްޕިޓަލަށާއި އެ އަތޮޅު ހުރިހާ ސިއްހީ މަރުކަޒުތަކަށް ހެލްތު މިނިސްޓްރީން ފޮނުވި އައިޓީ ސާމާނު ހުރީ އެ ދޯނީގައި ކަމަށެވެ.
" ކޮމްޕިއުޓާ ސިސްޓަމްތަކާއި، ޕްރިންޓަރާއި، ވީޑިއޯ ކޮންފަރެންސް ކެމެރާތަކާއި، ޓެބްލެޓްތަކާއެކު މިލިއަނެއްހާ ރުފިޔާގެ މުދާ އެދޯނިން ފޮނުވި" ޝަތުފާ ވިދާޅުވި އެވެ.
ޝަތުފާ ވިދާާޅުވީ އެއީ ގްރާންޓެއްގެ ދަށުން ނަގާފައިވާ މުދާތަކެއް ކަމަށެވެ. ޝަތުފާ ވިދާޅުވީ، އެ މުދާތަށް ގެއްލުނު ނަމަވެސް ޑިޖިޓަލައިޒޭޝަން މަޝްރޫއު ކުރިއަށްދާނެ ކަމަށެވެ. އަދި އަލުން ސާމާނު ފޮނުވުމުގެ މަސައްކަތް މިނިސްޓްރީއިން ކުރާނެކަމަށް ވެސް ޝަތުފާ ވިދާޅުވި އެވެ.
ސިއްހީ ދާއިރާ ޑިޖިޓަލައިޒްކޮށް އައިޓީ އިންފްރާންސްޓްރަކްޗާ ހަރުދަނާ ކުރުމަށް ސަރުކާރުން ފެށި 56 މިލިއަން ރުފިޔާގެ މަޝްރޫއުގެ ދަށުން ފަސް ރީޖަނަލް ހޮސްޕިޓަލާއި, 15 އަތޮޅު ހޮސްޕިޓަލް އަދި 163 ސިއްހީ މަރުކަޒަކަށް އައިޓީ ސާމާނު ހަވާލު ކުރަން ހަމަޖެހިފައިވެ އެވެ.
ހެލްތު މިނިސްޓްރީން މީގެ ކުރިން އާންމު ކުރި މައުލޫމާތުން އެނގޭ ގޮތުގައި އޭގެ ތެރޭގައި ހިމެނެނީ، 608 ކޮމްޕިއުޓާ ސިސްޓަމާއި, 44 ލެޕްޓޮޕާއި 500 ޓެބްލެޓާއި 551 ޕްރިންޓަރާއި 14 ވީޑިއޯ ކޮންފަރެންސް ސިސްޓަމެވެ.
މުދަލާ އެކު އަޑިއަށް ގޮސްފައިވާ ރިކާޑޯ ދޯނި ނުފެންނަކަމަށް އެމްއެންޑިއެފް އިން މިއަދު ވަނީ ބުނެފައެވެ. މާލެއިން ފުރައިގެން މަހިބަދޫއަށް ދަތުރުކުރަމުން ދަނިކޮށް ވިއްސާރަވެ ރިކާޑޯ ދޯނި ދިޔަވާތީ އެކަމުގެ ރިޕޯޓު ކޯސްޓްގާޑަށް ކުރީ ރޭ 6:50 ހާއިރު އެވެ. އެ ދޯނި އަޑިއަށް ދިޔައީ މާލެ އަތޮޅާއި އަރިއަތޮޅާއި ދެމެދު އޮންނަ އަލިހުރަސް ކަނޑުން ދަތުރުކުރަނިކޮށެވެ. ދޯނީގައި ތިބި މީހުން ވަނީ ސަލާމަތް ވެފައެވެ.
