ދެވަނަ ދައުރެއް ލިބިވަޑައިގެންފިނަމަ މ. ކޮޅުފުށީގެ ރައްޔިތުންނަށް ރަށް ކައިރިން ވަޒީފާ އަދާކުރެވޭނެ ގޮތް މަގުފަހިކޮށްދިނުމުގެ ގޮތުން އެ ރަށް ކައިރީގައި ރިސޯޓެއް ތަރައްގީކޮށްދެއްވާނެ ކަމަށް ރައީސް އިބްރާހީމް މުހައްމަދު ސޯލިހު ވިދާޅުވެއްޖެއެވެ.
އަންނަ ސެޕްޓެމްބަރު މަހު ބާއްވާ އިންތިހާބަށް، މ. އަތޮޅަށް ފެއްޓެވި ދަތުރުފުޅުގައި، ކޮޅުފުއްޓަށް ވަޑައިގެން ދެއްކެވި ވާހަކަފުޅުގައި އެމަނިކުފާނު ވިދާޅުވީ ސުނާމީއަށްފަހު ދިރިއުޅުމަށް އައި ބަދަލުތަކާއެކު ކޮޅުފުށީގެ މަސްވެރިކަމަށް ހީނަރުކަމެއް ލިބިފައިވާ ކަމަށެވެ. އެގޮތުން ރަށުގައި ތިބެގެން ކައިރިން ވަޒީފާ ލިބޭނެ ގޮތެއް ހޯދައިދޭންޖެހޭ ކަމަށް އެމަނިކުފާނު ވިދާޅުވިއެވެ.
އެހެންކަމުން، އެމަނިކުފާނު ވިދާޅުވީ އުފަން ރަށް ކައިރިން ވަޒީފާ އަދާކުރެވޭނެ މަގު ތަނަވަސްކޮށްދިނުމަށް އެރަށް ކައިރީގައި ރިސޯޓެއް ތަރައްގީކޮށްދެއްވާނެ ކަމަށެވެ.
ނަމަވެސް ރައީސް ވިދާޅުވީ ކޮޅުފުށީ ކައިރީގައި ރިސޯޓެއް ހެދުމަށް ކުރީ ސަރުކާރުން 1 ރަށުގެ ގޮތުގައި 3 ރަށް ބަޔަކަށް ދޫކޮށްފައިވާއިރު، މިހާތަނަށް އެއިން އެއްވެސް ރަށެއްގައި ރިސޯޓު ހެދުމުގެ މަސައްކަތް ކުރިއަށް ގޮސްފައި ނުވާކަމަށެވެ.
"މިހެން ގޮސް އެތައް އެތައް ޖަރީމާއެއް ހިންގާފައި އެބަހުރި. އިރާދަކުރެއްވިއްޔާ މިރަށުގެ ރައްޔިތުން އެދޭގޮތަށް މިރަށު ކައިރިން ރިސޯޓު ތަރައްގީކުރުމުގެ މަޝްރޫއެއް އަޅުގަނޑުމެން ހިންގަދޭނަން" ރައީސް ވިދާޅުވިއެވެ.
ރައީސް ވިދާޅުވީ 2013 އިން 2018 އަށް އޮތީ އާބާދީ ކުޑަ ރަށްރަށް "އުންމީދެއް ނެތް" ތަންތަނުގެ ގޮތުގައި ދޫކޮށްލައިފައި ކަމަށެވެ. އެއާ ހިލާފަށް މި ސަރުކާރުން އާބާދީއަށް ބެލުމެއް ނެތި މުޅި ރާއްޖޭގައި ތަރައްގީގެ މަޝްރޫތައް ހިންގަމުން އަންނަކަމަށް ރައީސް ވިދާޅުވިއެވެ.
"އަަޅުގަނޑުގެ ނަޒަރުގައި ކޮންމެ ރައްޔިތަކީ އެ މީހަކަށް ހައްގުވާ އަސާސީ ޚިދުމަތްތައް ލިބެންޖެހޭ މީހެއް." ރައީީސް ވިދާޅުވިއެވެ.
އެގޮތުން، ރިސޯޓު ތަރައްގީ ކުރުމުގެ އިތުރުން ރައީސް ސޯލިހު ވަނީ ދެވަނަ ދައުރެއް ލިބިއްޖެނަމަ، ކޮޅުފުށި ހިމާޔަތްކުރުމުގެ މަސައްކަތް ކުރާނެ ކަމަށާއި އެރަށުގެ މަގުތައް ޒަމާނީ ފެންވަރަކަށް ހެދައިދޭނެ ކަމަށް ވައުދުވެވަޑައިގެންފަ އެވެ.
އެމަނިކުފާނުގެ ވާހަކަފުޅުގައި ވަނީ މިހާތަނަށް 148 ރަށުގައި ފެނާއި ނަރުދަމާގެ ނިޒާމު ކުރިއަށްދާ ކަމަށާއި 158 ރަށުގައި އިންޖީނުގެ ޖަނަރޭޓަރު ބަދަލުކޮށް ނިމި، ބިން ހިއްކުމުގެ 21 މަޝްރޫއެއް ހިންގައި، އެތަނުން 8 މަޝްރޫއު ނިމިފައިވާކަން ފާހަގަކުރައްވާފައެވެ. އަދި 13 މަޝްރޫއު ހިނގަމުން އަންނަ ގެދޮރުވެރިކަމުގެ ލޯނުގެ ގޮތުގައި 104 މިލިއަން ރުފިޔާ ދޫކުރެވިއްޖެ ކަމަށް ވެސް ރައީސް ވިދާޅުވިއެވެ.
"އަޅުގަނޑުމެންގެ އަމާޒަކީ ރައްޔިތުން އަމާންވެއްޓެއްގައި ތަރައްގީގެ މުޖުތަމައެއްގައި ދިރިއުޅުމުގެ ފުރުސަތު ހޯދައިދިނުން. އިރާދަކުރެއްވިއްޔާ އަޅުގަނޑުމެން މި ކުރިއަށްގެންދަނީ އެ މަސައްކަތް. ކުރިއަށް އޮތް ދައުރުގައި ވެސް އަޅުގަނޑުމެންގެ އަމާޒަކީ އެއީ. އުފާވެރި، އަމާން މުޖުތަމައުއެއް ރާއްޖޭގައި ބިނާކުރުން، ރައްޔިތުންނަށް ހޯދައިދިނުން." ރައީސް ވިދާޅުވިއެވެ.
ރައީސްގެ ތިން ދުވަހުގެ މި ކެމްޕޭނު ދަތުފުފުޅުގައި މ. އަތޮޅުން ފުރަތަމަ ވަޑައިގެންނެވީ ކޮޅުފުއްޓަށެވެ. އެއަށްފަހު ނާލާފުށި، މުލި، އަދި މުލަކަށް މިއަދު ވަޑައިގަންނަވާނެއެވެ. އެއަށްފަހު ކުރިއަށް އޮތް ދެ ދުވަސް ތެރޭގައި ވ. އަތޮޅުން ރަކީދޫ، ކެޔޮދޫ، ފެލިދޫ، ތިނަދޫ އަދި ފުލިދުއަށް ވަޑައިގަތުމަށް ވަނީ ހަމަޖެހިފައެވެ.
ހަމައެއާއެކު، ރައީސް ސޯލިހުގެ ކެމްޕޭން ޖަލްސާއެއް މިރޭ މުލަކުގައި ބޭއްވުމަށް ވަނީ ހަމަޖެހިފަ އެވެ.
މި ކެމްޕޭން ދަތުރުފުޅުތަކުގައި ރައީސް އާއިއެކު އެމްޑީޕީގެ ކޯލިޝަން ބައިވެރިން ކަމަށްވާ އަދާލަތާއި އެމްޑީއޭގެ ލީޑަރުން ވެސް ބައިވެރިވެވަޑައިގެންނަަވައެވެ.
