ޕާކިސްތާނުގެ ހުޅަނގު އުތުރުގެ ބަޖޫރު ޑިސްޓްރިކްޓްގައި ހަރުކަށި ފިކުރުގެ ދީނީ އިލްމުވެރިއަކާއި ސިޔާސީ ލީޑަރެއްގެ ސަޕޯޓަރުން ބޭއްވި ސިޔާސީ އެއްވުމެއްގައި ބާރުގަދަ ބޮމެއް ގޮއްވާލާފައިވާ ކަމަށް ފުލުހުންނާއި ސިއްހީ އޮފިޝަލުން ބުނެފިއެވެ.
ފާއިތުވި އަހަރުތަކުގައި ދިން އެންމެ ނުރައްކާތެރި އެއް ހަމަލާގައި 44 މީހުން މަރުވެ، ކުޑަކުދިންނާ އެކު ގާތްގަނޑަކަށް 200 އެއްހާ މީހުން ޒަހަމްވެފައިވެއެވެ.
ފުލުހުންގެ ސީނިއާ އޮފިސަރު ނަޒީރު ހާން ވިދާޅުވީ ބޮން ގޮއްވާލަފައި ވަނީ މައުލާނާ ފަޒްލޫރު ރަހްމާންގެ ޖަމިއްޔަތުލް ރަހުމާ އިސްލާމް ޕާޓީގެ މަސައްކަތްތެރިންގެ ކޮންވެންޝަން ބަޖޫރު ޑިސްޓްރިކްޓްގެ ވެރިރަށް ހާރްގެ ބޭރުގައި ހިނގަމުން ދަނިކޮށް ކަމަށެވެ.
ކުރިން ބަޖޫރަކީ އިސްލާމީ ހަނގުރާމަވެރިންގެ ހިޔާވަހިކަމެވެ. އެއީ އަފްގާނިސްތާނުގެ ތާލިބާނުންނާ އެންމެ ގާތް ހަނގުރާމަވެރި ޖަމާއަތެއް ކަމަށްވާ ތަހްރީކޭ ތާލިބާން ޕާކިސްތާން ނުވަތަ ޓީޓީޕީގެ ނަމުން މަޝްހޫރުވެފައިވާ ޕާކިސްތާނު ތާލިބާނުންގެ ކުރީގެ ބާރުގަދަ ސަރަހައްދެވެ. ޕާކިސްތާނުގެ އަސްކަރިއްޔާއިން ހިންގި އޮޕަރޭޝަންތަކުގެ ނަތީޖާއެއްގެ ގޮތުން ފާއިތުވި އަހަރުތަކުގައި ޓީޓީޕީ ވަނީ އެ ސަރަހައްދުން ބޭރުކޮށްފައެވެ.
ބޮމުގެ ހަމަލާ ދީފައި މިވަނީ ޗައިނާގެ ވައިސް ޕްރިމިއާ ހީ ލައިފަންގް އިސްލާމްއާބާދަށް ވަޑައިގަތުމުގެ ގަޑިއިރުތަކެއް ކުރިން، ޗައިނާ-ޕާކިސްތާން އިކޮނޮމިކް ކޮރިޑޯ ނުވަތަ ސީޕީއީސީގެ ދިހަ އަހަރު ފުރުމުގެ މުނާސަބަތުގައި ބާއްވާ ހަރަކާތެއްގައި ބައިވެރިވެވަޑައިގަތުމަށް ހަމަޖެހިފައިވާ ދަނޑިވަޅެއްގައެވެ.
ފާއިތުވި މަސްތަކުގައި ޗައިނާއިން ވަނީ ޕާކިސްތާނަށް ސޮވެރިން ޕޭމަންޓް ނުދެއްކުމުން ސަލާމަތްވުމަށް އެހީތެރިކަން ފޯރުކޮށްދީފައެވެ. ނަމަވެސް ޕާކިސްތާނުގެ ހުޅަނގު އުތުރުގެ ސަރަހައްދުތަކާއި އެހެން ހިސާބުތަކުގައި ވެސް ޗައިނާގެ ބައެއް މީހުންނަށް ހަނގުރާމަވެރިން ވަނީ ހަމަލާދީފައެވެ.
