ގުޅިފައިވާ ޕާޓީތަކުގެ މަޝްވަރާއާއެކު އޮގަސްޓް މަހުގެ 12 ވަނަ ދުވަހުގެ ކުރިން ނޭޝަނަލް އެސެމްބްލީ އުވާލާނެ ކަމަށް ޕާކިސްތާނުގެ ބޮޑުވަޒީރު ޝަހްބާޒް ޝަރީފް ވިދާޅުވެއްޖެއެވެ.
ޖިއޯ ނިއުސްގެ ޕްރޮގްރާމެއްގައި ދެއްވި އިންޓަވިއުއެއްގައި އޭނާ ވިދާޅުވީ ގައުމީ ދައުރު ހަމަވާނީ އޮގަސްޓް މަހުގެ 12 ވަނަ ދުވަހު ކަމަށާއި އޭގެ ކުރިން އެސެމްބްލީ އުވާލާނެ ކަމަށެވެ.
އަދި ކުރިއަށް އޮތް އިންތިހާބު ބާއްވާނެ ތާރީހެއް އިލެކްޝަންސް ކޮމިޝަނުން އިއުލާނު ކުރާނެ ކަމަށް އޭނާ ވިދާޅުވިއެވެ.
ޝަރީފް އިތުރަށް ވިދާޅުވީ، ބަލަހައްޓާ ބޮޑުވަޒީރާ މެދު ގޮތެއް ނިންމާނީ ނޭޝަނަލް އެސެމްބްލީގައި އިދިކޮޅު ލީޑަރުގެ މަޝްވަރާގެ މަތިން ކަމަށާއި އޭގެ ކުރިން ގުޅިފައިވާ ހުރިހާ ޕާޓީތަކާއި ޕާކިސްތާން މުސްލިމް ލީގު (އެން) ގާއިދު ނަވާޒް ޝަރީފްއާ މަޝްވަރާ ކުރައްވާނެ ކަމަށެވެ.
ޕާކިސްތާނުގެ ތަހްރީކޭ އިންސާފް (ޕީޓީއައި)ގެ ޗެއާމަން އިމްރާން ހާން އަކީ އަސްކަރީ ލީޑާޝިޕް ވައްޓާލުމުގެ މަގްސަދުގައި މެއި މަހުގެ ނުވަ ވަނަ ދުވަހު ހިނގި ހާދިސާތަކުގެ ފަހަތުގައި ވާ "މޭސްތިރިއެއް" ކަމަށް ވިދާޅުވެ ޝަހްބާޒް ޝަރީފް ވަނީ އިމްރާނަށް ވަރަށް ބޮޑަށް ފާޑުވިދާޅުވެފައެވެ.
ޝަހްބާޒް ވިދާޅުވީ މެއި މަހުގެ ނުވަ ވަނަ ދުވަހުގެ ހަމަނުޖެހުންތަކުގައި ޕީޓީއައިގެ އެކްޓިވިސްޓުންގެ އިތުރުން ސިޔާސީ ބައެއް މީހުންނާއި ބައެއް އަސްކަރީ މީހުންނާއި އެމީހުންގެ އާއިލާތައް ވެސް ބައިވެރިވި ކަމަށެވެ.
މީގެ އިތުރުން އަސްކަރިއްޔާއިން ވަނީ މިއީ ޕާކިސްތާނުގެ ތާރީހުގައި ވެސް "ކަޅު ދުވަހެއް" ގެ ގޮތުގައި ލޭބަލްކޮށްފައެވެ.
ޖިއޯ ނިއުސްގެ ޕްރޮގްރާމަށް ދެއްވި އިންޓަވިއުއެއްގައި ޝަހްބާޒް ޝަރީފް ވިދާޅުވީ މެއި މަހުގެ ނުވަ ވަނަ ދުވަހުގެ ހާދިސާގައި ބައިވެރިވި މީހުން ބޭނުންވީ އަސްކަރީ ލީޑާޝިޕް ވައްޓާލަން ކަމަށެވެ.