ރިޔާސީ އިންތިހާބުގެ ކެމްޕޭން އަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުހައްމަދު ސޯލިހް ފުވައްމުލަކު ސިޓީއަށް ވަޑައިގެން ދަތުރުފުޅުގައި އަދާލަތް ޕާޓީގެ ޖަގަހަ މިއަދު ހުޅުއްވައިދެއްވައިފި އެވެ.
އެ ޖަގަހަ ހުޅުވުމަށް ބޭއްވި ރަސްމިއްޔާތެއްގައި އަދާލަތު ޕާޓީގެ ނައިބު ރައީސް ޑރ. ނައުޝާދު މުހައްމަދާއި ޕާޓީގެ އިސް ބޭފުޅުންނާއި އެމްޑީޕީގެ އިސް ބޭފުޅުން ބައިވެރިވެވަޑައިގެންނެވިއެވެ.
އޭގެ އިތުރުން، ނައިބު ރައީސް ފައިސަލް ނަސީމާއި އެމްޑީއޭގެ ލީޑަރު އަހުމަދު ސިޔާމް މުހައްމަދާއި އެމްޑީޕީގެ ޗެއާޕާސަން ފައްޔާޒް އިސްމާއިލާއި ފުވައްމުލައް ސިޓީގެ މޭޔަރު އިސްމާއީލް ރަފީގް (އިއްސެ) ވެސް އެ ރަސްމިއްޔާތުގައި ބައިވެރިވެވަޑައިގެންނެވިއެވެ.
ރިޔާސީ އިންތިޚާބުގެ ކެމްޕެއިންއަށް އެމްޑީޕީގެ ރިޔާސީ ކެންޑިޑޭޓް ރައީސް އިބްރާހީމް މުޙައްމަދު ޞާލިޙް ފުވައްމުލަކު ސިޓީއަށްވަޑައިގެން، އަދާލަތް ޕާޓީގެ ޖަގަހަ ހުޅުއްވައިދެއްވުން.
#Ibu2023 #VoteMDP
#UfaaveriAmaanRaajje pic.twitter.com/BA7sS3YIld— MDP Secretariat (@MDPSecretariat) July 31, 2023
މިއަހަރުގެ ރިޔާސީ އިންތިހާބަށް ރައީސް ސޯލިހު ނިކުންނަވާއިރު އެމްޑީޕީގެ ކޯލިޝަންގައި ތިބީ އިތުރު ދެ ޕާޓީއެވެ. އެއީ އަދާލަތު ޕާޓީއާއި އެމްޑީއޭ އެވެ.
އެގޮތުން ރައީސް ވަނީ އިއްޔެ އެމްޑީއޭ އިން ފުވައްމުލަކުގައި ގާއިމު ކުރި ޕޮލިޓިކަލް ސެންޓަރު ހުޅުއްވައި ދެއްވައިފައެވެ.
ރައީސް ސޯލިހަށް ދެވަނަ ދައުރެއް ހޯދުމަށް މިހާރު ކުރަމުން އަންނަ އަތޮޅުތެރޭގެ ކެމްޕޭންގެ ތެރެއިން ރޭ ވަނީ ފުވައްމުލަކުގައި ރައީސް ސޯލިހާއި ކޯލިޝަންގެ އިސްވެރިން ބައިވެރިވެވަޑައިގެންނެވި ބޮޑު ޖަލްސާއެއް ބާއްވާފައެވެ.
އަދާލަތު ޕާޓީގެ ޖަގަހަ ހުޅުއްވައި ދެއްވުމަށް ފަހު، ރައީސް ވަނީ އެ ރަށުގެ ކެމްޕެއިން ޓީމުތަކާ ބައްދަލު ކުރައްވާފައެވެ. އެމަނިކުފާނު މި ދަތުރުފުޅު ނިންމަވާލައްވައި، ކެމްޕެއިނަށް މިއަދު ދެން ފުރާވަޑައިގަންނަވާނީ ށ. އަތޮޅަށެވެ.
