އަމީނީ މަގުގެ ނުނިމި އޮތް ބައިގައި މިއަދު ތާރުއެޅުމުގެ މަސައްކަތް ފެށިގެންދާނެ ކަމަށް އިމާރާތް ކުރުމާއި ބިނާރާ ބެހޭ ވަޒީރު ޑރ. އަބްދުﷲ މުއްޠަލިބް ވިދާޅުވެއްޖެއެވެ.
އޭނާ "އެކްސް" ގައި ކުރެއްވި ފޯސްޓެއްގައި ވިދާޅުވީ، އަމީނީ މަގުގެ ނުނިމިއޮތް ބައިގެ އަމަލީ މަސައްކަތް މިދިޔަ ޑިސެމްބަރު މަހުގެ 9 ވަނަ ދުވަހު ފެށިފައިވާއިރު، މިހާރު ތާރު އެޅުމަށް ތައްޔާރުވެފައިވާ ކަމަށެވެ.
"އިރާދަކުރެއްވިއްޔާ ތާރު އެޅުމުގެ މަސައްކަތް މިއަދު ފެށިގެންދާނެ" މުއްތަލިބް ވިދާޅުވިއެވެ.
އަމީނީ މަގުގެ ނުނިމިއޮތް ބައިގެ ޢަމަލީ މަސައްކަތް ފެށުނީ 9 ޑިސެންބަރު 2023 ގައި. މަގު މިހާރު މިވަނީ ތާރު އެޅުމަށް ތައްޔާރުވެފައި. އިރާދަކުރެއްވިއްޔާ ތާރު އެޅުމުގެ މަސައްކަތް މިއަދު ފެށިގެންދާނެ. pic.twitter.com/b4MU3tRHT0
— Abdulla Muththalib (@muththo) January 6, 2024
އަމީނީމަގުގެ އެންމެ ފަހު ސެގްމެންޓް 12 އަދި 13 ހިމެނޭ ސަރަހައްދު ތަރައްގީކުރާނީ ކުރިން ނިމިފައިވާ ސެގްމެންޓުތަކަށް ވުރެ ފުޅާކޮށެވެ. މި ދެ ސެގްމެންޓްގައި ހަތަރު ލޭންގެ މަސައްކަތް ނިމޭއިރު އާންމުންނަށް ވަރަށް ބޮޑަށް ލުއި ފަސޭހަ ވެގެންދާނެއެވެ.
މި މަސައްކަތައް ޖުމްލަ 84.4 މިލިއަން ރުފިޔާ ހަރަދުވާއިރު، މި މަޝްރޫއު ހަވާލުކޮށްފައިވަނީ 210 ދުވަހުގެތެރޭގައި ނިންމާ ގޮތަށެވެ. އަދި މީގެ ދަށުން ޖުމްލަ 1.79 ކިލޯމީޓަރުގެ ސަރަހައްދެއް ތާރު އަޅައިގެން ޒަމާނީ ފެންވަރަށް ތަރައްގީ ކުރެވިގެންދާނެއެވެ.
