ޒަމާންވީ ސިޔާސީ ތަޖުރިބާކާރު ލ. ފޮނަދޫ އަބްދުއްރަހީމްގެ ދޮށީ ފިރިހެން ދަރިފުޅު ރާއްޖޭގެ ޓޫރިޒަމް މިނިސްޓަރުކަމަށް ރައީސް ޑރ. މުޢިއްޒު އައްޔަން ކުރެއްވުމުން، ފާޑުކިއުންތަކާއި މަލާމަތްކުރުންތަކުން ސޯޝަލް މީޑިޔާ ގުގުމާލިއެވެ. ހާއްސަކޮށް ސިޔާސީ ގޮތުން މިވަގުތު ރައީސް ޔާމީން އަރިހުގައި ތިއްބެވި ބޭފުޅުންގެ ސީދާ އަދި ނުސީދާ މަލާމާތި ފުރައްސާރަ އަބްދުއްރަހީމަށާއި ފައިސަލަށް ފުލުފުލުން ދިޔައީ އަމާޒުވަމުންނެވެ.
ވަކިން ހާއްސަކޮށް ޓޫރިޒަމް މިނިސްޓަރުގެ ހައިސިއްޔަތުން ހަފުލާއެއްގައި ދެއްކެވި ވާހަކަފުޅަކާ ގުޅުވައިގެން ވެސް، ޒާތްޒާތުގެ ވާހަކަތައް ތިލަވިއެވެ. ހަފުލާތަކަށް ހެދުން އަޅުއްވާ ގޮތުން ވެސް ބައެއް މީހުންނަށް ޖެއްސުމުގެ ބަހެއް އެއްލާނުލައި ފަރަކު ނުޖެއްސުނެވެ.
އެ ހުރިހާ ކަމަކާ ގުޅިގެން ފައިސަލްގެ ފައިސަލާކުރުން، ނިންމުން ހުރީ ކޮން ގޮތަކަށްތޯއެވެ. ފާޅުގައި އެއްވެސް ބޭފުޅަކަށް ރައްދުދެއްވައި، ރުޅި އިސްކުރައްވައި، ލަދުން ފަހަތަށް ޖެހިވަޑައިގަތުމެއްވެސް ނެތި، ރާއްޖޭގެ އިގްތިސާދުގެ އެންމެ ނުފޫޒު ގަދަ ވުޒާރާގެ ކަންކަމުގައި ސާބިތުކަމާއެކު ކުރިއަށް ވަޑައިގެންނެވީއެވެ.
ރައީސް ޑރ. މުއިއްޒުގެ ޅަފަތުގެ ވެރިކަމުގައި މިހާތަނަށް "މޮޅު ވަޒީރުން"ގެ ވުޒާރާތަކުން ހެދި ގޯސްތައް ޑައިރީކުރާނަމަ ސީރިއަސް ލެވެލެއްގައި އެކަންކަން ފާހަގަކުރަން ޖެހޭ ފަދަ ކަންކަން ހިނގާ ގޮއްސިއެވެ. ގޯސްތައް ހަދައިފިއެވެ. ފެން ނުހިފޭ އެތައް ވާހަކައެއް އެ ވުޒާރާތަކުން ދައްކައިފިއެވެ. އެހެންނަމަވެސް އެންމެ ބޮޑު ފާޑުކިއުމެއް އަމާޒުވި ފައިސަލްގެ ޓޫރިޒަމް މިނިސްޓަރުކަމުގައި އެ މިނިސްޓްރީން ހެދި ގޯހެއް އަދި ނެތެވެ. އާންމުކުރި ކޮރު ވާހަކައެއް ނެތެވެ.
ޓޫރިޒަމް މިނިސްޓްރީއަކީ ޒަމާންވީ އުސޫލުތަކެއް ބިނާކުރެވި، އެ އުސޫލިތަކުގެ މައްޗަށް ވަކިވަކި ސަރުކާރުތަކާއި މިނިސްޓަރުންގެ ސިޔާސަތުތައް ފައްތަމުން، ހިންގަމުން ގެންދާ ޒިންމާދާރު މުވައްސަސާއެކެވެ. ފައިސަލް ޓޫރިޒަމް މިނިސްޓަރުކަމާ ހަވާލުކުރެއްވުމަށް ފަހު، ރައީސުލްޖުމްހޫރިއްޔާގެ ސީދާ ބެއްލެވުމުގެ ދަށަށް ޓޫރިޒަމާ ގުޅޭ މުހިއްމު ކަންތައްތަކެއް ނެންގެވި ނަމަވެސް، ފައިސަލުގެ ކިބައިން އެކަމާ ނުރުހުމެއް، ނުތަނަވަސްކަމެއް، ދެކޮޅުވެރިކަމެއް، ނުދައްކަވައެވެ.
އެކަންކަމުން އެއްކިބާވެ ހުންނަވައި ބެއްލެވީ އަވަހަށް އިންޑަސްޓްރީއާއި މިނިސްޓްރީގެ އުސޫލުތައް ދަސްކޮށްލުމެވެ. މިހާރު އެތަފާތު އެބަ ފެނެއެވެ. މަގާމާ ހަވާލުވިތާ ކުރީކޮޅު ހަފުލާތަކުގައި ނަގާފައިވާ ފޮޓޯތަކާއި މިހާރުގެ ފޮޓޯތައް ދިރާސާކޮށްލާއިރު ފައިސަލްގެ ކޮންފިޑެންސް ވަރުގަދަވެ، ސާބިތުކަން އެބަދެއެވެ.
ވިސްނާލުމަށް ގެންނަވާ ހިނގާށެވެ. ފައިސަލްގެ ބައްޕައަކީ ޑީއާރްޕީ އާއި ޕީއޭ އާއި ޕީޕީއެމްގައިވެސް އިސް މަގާމުތަކެއް ފުރުއްވައި، ބުދަދަންހުރި ޒިންމާތަކެއް އުފުއްލެވި ބޭފުޅެކެވެ. ރައްޔިތުންގެ މަޖިލީހުގައި އިދިކޮޅާއި އެއްކޮޅުގެ ސިޔާސަތުތައް ތަންފީޒުކުރުމުގެ ތަޖުރިބާވެސް ހާސިލްކުރައްވާފައިވާ ބޭފުޅެކެވެ. މި ހުރިހާ ވާހަކަތަކާ ގުޅިފައިވާ މިއަދުގެ ހަގީގަތަކީ މިއެވެ؛ ރާއްޖޭގެ ސިޔާސީ ވެށީގައި ހަރަކާތްތެރިވާ އެންމެ ނުފޫޒުފަދަ އެއް ސަހްސުއްޔަތަކީ އަބްދުއްރަހީމްއެވެ.
އެންމެ އަވަހަށް ބައިބޯވަމުން އެދަނީ ޕީއެންސީގެ މެންބަރުންނެވެ. އެ ޕާޓީގެ ރަސްމީ ވެރިއަކީ އަބްދުއްރަހީމެވެ. ރާއްޖޭގެ މިވަގުތުގެ ރައީސުލްޖުމްހޫރިއްޔާއަކީ އަބްދުއްރަހީމް ޕާޓީގެ ބޭފުޅެކެވެ. އެ މަގަށް ޕާޓީ އެގެންދެވީ ސިޔާސީ ގޮތުން ލިބިލައްވާފައިވާ ތަޖުރިބާގެ ހިކުމަތުގެ އަމަލުންނެވެ. ފާޑުކިއުންތައް ފުނިޖެހެމުން ގިނަވަމުން ދިޔަކަމުގައިވިއަސް މިއަދުގެ މި ހަގީގަތަށް ފަސްއަޅާ ފޮރުވޭކަށް ނެތެވެ. ރާއްޖޭގެ ތާރީޚުން މިވާހަކަތައް ގެއްލުވާލެވޭނެ ގޮތެއްވެސް ނުމެ ނެތްމެއެވެ.
ރައީސް ޑރ. މުއިއްޒު ވެރިކަމަށް ގެންނެވުމަށް ފަހު، އަބްދުއްރަހީމް މިހާރު އަމާޒު ހިއްޕަވާފައިވަނީ އެމަނިކުފާނުގެ ސިޔާސީ އާއިލާ ބިނާކުރެއްވުމަށެވެ. އެންމެ ފުރަތަމަ އެ ނެރުއްވީ ދޮށީ ފިރިހެން ދަރިފުޅު އިބްރާހީމް ފައިސަލެވެ. އެއީ މިހާރުގެ ޓޫރިޒަމް މިނިސްޓަރެވެ.
މި ފަސް އަހަރު ނިމިގެންދާއިރު ފައިސަލް ވާނީ ރަސްމީ އިދާރީ ހިންގުމުގެ އޮއިވަރު ފިސާރި ރަނގަޅަށް ދެނެލައްވައި، އަދި ރާއްޖޭގެ އިގްތިސާދާ ގުޅިފައިވާ އެންމެ މުހިއްމު މުއައްސަސާއާ ގުޅިފައިވާ އެކި ކަހަލަ ނުފޫޒުތަކާއި ހެވާއި ނުބައި ރަނގަޅަށް ދެނެލައްވައި ބޭފުޅަކަށެވެ.
ސިޔާސީ ގޮތުން ވެސް ހުންނާނީ ހެޔޮވަރު ވަރަކަށް ރޯފިލާފައެވެ. ރައީސް ޑރ. މުޢިއްޒުގެ ޚާއްސަ އެޑްވައިޒަރު އަބްދުއްރަހީމުގެ އުންމީދުތައްވެސް ގުޅިފައިވަނީ މިދެންނެވި ކަންކަމާއެވެ. މިނިސްޓަރު ފައިސަލްގެ ކަންކަމުގައި ފައިސަލާކުރެއްވުންތައް ގެންގުޅުއްވާ ގޮތުން މުސްތަގުބަލުގެ އެޑްވަޒަރުކަން ވެސް އަދާކުރެއްވުމަކީ ދުރުގައި އޮތް ކަމެއް ނޫނެވެ. ބައްޕަގެ ހިކުމަތުން އެ ހޯއްދަވައި ދެއްވި ރަނުގެ ފުރުސަތުގެ ބޭނުން އޭގެ ހެޔޮ ގޮތުގައި ހިފޭތޯ ފައިސަލް މަސައްކަތްކުރައްވަމުން އެބަ ގެންދަވައެވެ.
އޭގެ އިތުރުން ރަނގަޅު ކޮށްލަން ޖެހޭ ކަމެއް އެބައޮތެވެ. ގުރޫމިންއެވެ. ހެދުން އެޅުއްވުމުގެ ސްޓައިލާއި ސޯޝަލް މީޑިޔާގައި ބަސްމަގު ގެންގުޅުއްވާ ގޮތާއި އިންޑަސްޓްރީގެ ބޭފުޅުންނާއި ގުޅުން ބަދަހިކުރައްވައި އެގުޅުން ދެމެހެއްޓެވުމުގައި ތަފާތު ޒަމާނީ ޓެކްނިކްތަކެއް ގެންގުޅުއްވަން ފައްޓަވަން އެބަޖެހެއެވެ.
އެއީ މާ އުނދަގޫ ކަމެއް ނޫނެވެ. ވިސްނުންފުޅަށް ގެންނަވާ ކުޑަ ބަދަލަކުން މިކަންކަން ކާމިޔާބުގެ މަގަށް، ހެޔޮ ނަތީޖާގެ މަގަށް އަނބުރާ ލެވެން އެބައޮތެވެ. މިކަމުގައިވެސް ފައިސަލް ރަނގަޅށް ފައިސަލާ ކުރައްވާނެ ކަމަށް އުންމީދުކުރަމެވެ. ޒުވާން މިނިސްޓަރަށް އަބަދުވެސް އެދެނީ ހެޔޮ ގޮތެވެ. ފައިސަލަކީ ސިޔާސީ ބަފައެއްގެ އުންމީދުތަކާ ގުޅިފައިވާ ޒުވާނެކެވެ. ބައްޕަގެ އެ އުންމީދުތައް ހާސިލްކުރެއްވުމުގައިވެސް އެކި ކަންކަމުގައި ފައިސަލްގެ ފައިސަލާ ކުރުންތައް ތަފާތުކުރަން ވިސްނަވާށެވެ. ހިކުމަތްތެރިކުރައްވަން އިސްކަން ދެއްވާށެވެ.
