ސަރުކާރުގެ ސިޔާސީ މަގާމުތަކަށް އަދި މީހުން އައްޔަނުކޮށް ނުނިމޭ ކަމަށާއި، ސަރުކާރު ހިންގުމަށް އަދިވެސް މީހުން މަގާމުތަކަށް ލަމުންދާނޭކަމަށް ރައީސް ޑރ. މުހައްމަދު މުއިއްޒުގެ ހާއްސަ މުޝީރު އަބްދުއްރަހީމް އަބްދުﷲ (އަދުރޭ) ވިދާޅުވެއްޖެއެވެ.
ސަރުކާރުން ގިނަ އަދަދަކަށް އެކި ފެންވަރުގެ ވަޒީރުން އައްޔަނުކޮށް ސިޔާސީ މަގާމުތައް އިތުރު ކުރަމުންދާތީވެ، އެކަމާއި ގުޅޭގޮތުން އިދިކޮޅު އެންމެބޮޑު ޕާޓީ އެމްޑީޕީ އަދި ޑިމޮކްރެޓްސް އިން ވަނީ އިއްޔެ ކަންބޮޑުވުން ފާޅުކޮށްފައެވެ. އެކަމާއި ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބުދެމުން އަދުރޭ ވިދާޅުވީ، ރައީސް ޑރ.މުއިއްޒުގެ ސަރުކާރު ވެރިކަމަށް އައީ ރައްޔިތުންނަށް ވައުދުތަކެއްވެ، އެކަންކަން ކުރުމަށް ކަމަށެވެ.
އަދުރޭ ވިދާޅުވީ މި ސަރުކާރުން ގިނަ މަސައްކަތްތަކެއް ކުރުމަށް އަމާޒު ހިފާފައިވާއިރު، އެ މަސައްކަތް ކުރެވޭވަރަށް މަގާމުތަކަށް މީހުން އައްޔަނު ކުރަމުންދާނޭކަމަށެވެ. ސިޔާސީ މަގާމުތަކަށް މީހުން އައްޔަނުކުރުމަކީ ރައީސުލްޖުމްހޫރިއްޔާއަށް ލިބިދީފައިވާ ބާރެއްކަން ފާހަގަކުރައްވަމުން އަދުރޭ ވިދާޅުވީ، މި ސަރުކާރު ވެރިކަަމަށް އައީ ރައްޔިތުންނަށް ބޭނުންވާ ވަރަށް ގިނަ ކަންކަން ކުރުމަށްކަމަށް ވީއިރު، އަދިވެސް މަގާމުތަކަށް މީހުން އައްޔަނުކުރަމުންދާނޭ ކަމަށެވެ.
ސަރުކާރުން މިހާތަނަށް އެކި ވުޒާރާތަކަށް 22 މިނިސްޓަރުން އައްޔަނުކޮށްފައިވާއިރު، ސްޓޭޓް މިނިސްޓަރު ފެންވަރުގައި 91 ބޭފުޅަކު ތިބިއިރު، އެންމެ ގިނައިން އައްޔަނުކޮށްފައިވާ ޑެޕިއުޓީ މިނިސްޓަރުންގެ ފެންވަރުގައި 163 ބޭފުޅަކު އެބަތިއްބެވެ. މީގެ އިތުރުންވެސް ވަޒީރު ފެންވަރުގެ ބޭފުޅުންގެ ގޮތުގައި އެކި މަގާމުތަކަށް އައްޔަނުކޮށްފައިވާ ބޭފުޅުން އެބަތިއްބެވެ.
އަދުރޭ ވިދާޅުވީ ސިޔާސީ މަގާމުތަކަށް މިހާތަނަށް އައްޔަނުކުރި މީހުންގެ ޖުމްލަ އަދަދު 500 އަށްވުރެ އިތުރު ނުވާނޭ ކަމަށެވެ. ސިޔާސީ މަގާމުތައް އިތުރުވަމުންދާކަމަށް އިދިކޮޅުން ދައްކާ ވާހަކަތަކަކީ އެއްވެސް ކަހަލަ ޒިއްމާދާރުކަމެއްނެތް ވާހަކަތަކެއް ކަމަށާއި، މި ސަރުކާރުން އައްޔަނުކުރާނީ ގާބިލް ނަތީޖާ ނެރެވޭ މީހުންކަމަށްވެސް އަދުރޭގެ ވާހަކައިގައި ވަނީ ފާހަގަކޮށްފައެވެ.
އިދިކޮޅު އެމްޑީޕީ އާއި ޑިމޮކްރެޓްސް ގުޅިގެން އިއްޔެ ބޭއްވި ނޫސްވެރިންގެ ބައްދަލުވުމުގައި އެ ދެ ޕާޓީން ވަނީ މި ސަރުކާރުގެ ސިޔާސީމަގާމުތައް އެއްވަރެއްގައި ހިފެހެއްޓުމަށް، ގާނޫނުތަކަށް އިސްލާހުތަކެއް ހުށަހެޅުމަށް ނިންމާފައިވާކަން ހާމަކޮށްފައެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ޑިމޮކްރެޓްސްގެ ރައީސް ހަސަން ލަތީފް ވިދާޅުވީ، ސަރުކާރު ވެރިކަމާއި ހަވާލުވުމަށްފަހު ފެނިގެން މި ދަނީ ސިޔާސީ މަގާމުތަކަށް ރައީސުލްޖުމްހޫރިއްޔާ އައްޔަނުކުރައްވާ ބޭފުޅުންގެ އަދަދު އިންތިހާއަށް ގިނަވަމުންދާތަން ކަމަށެވެ.
ހާއްސަކޮށް ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުންނާއި އަދި އެފެންވަރުގެ ބޭފުޅުންނަށް އިތުރު މަގާމުތައް އުފައްދަވަމުންދާކަން ހަސަން ލަތީފް ފާހަގަކުރެއްވިއެވެ. އޭނާ ވިދާޅުވީ ރާއްޖޭގެ އިގްތިސާދަށް ބަލާއިރު މިކަމަކީ މައްސަލައެއްގެ ގޮތުގައި ފެންނަ ވަރަށް ބޮޑު މައްސަލައެއް ކަމަށެވެ.
މިކަން ހުއްޓުވުމަށް ގާނޫނުތަކަށް ގެންނަން ޖެހޭ ބަދަލުތައް ގެންނަވާނޭ ކަމަށާއި، މިއީ ކޮންމެ ސަރުކާރެއް އޮތްކަމުގައި ވީނަމަވެސް ހިފެހެއްޓިފައި އޮންނަން ޖެހޭނެ އަދަދުތަކެއް ކަމަށް ކަނޑައެޅުމަށް އެމްޑީޕީއާ ޑިމޮކްރެޓްސްއަށް އެއްބަސްވެވޭތީވެ، އެކަން ކުރުމަށް ނިންމީ ކަމަށްވެސް ހަސަން ވަނީ ވިދާޅުފައެވެ.
މީގެ އިތުރުން ސަރުކާރު ކުންފުނިތައް އުފެއްދުމަށް ވަކި އުސޫލެއް ގާއިމްކުރެވިފައި ނެތުމުން އޭރެއްގައި އެ އޮންނަ ސަރުކާރަކުން ބޭނުންވާ ގޮތަކަށް ކުންފުނިތައް އުފައްދައި އެތަންތަނަށް މީހުން އައްޔަނުކުރަމުންދާދިއުން އިތުރުވަމުން އަންނަ ކަމަށްވެސް އިދިކޮޅުން ވަނީ ފާހަގަކޮށްފައެވެ.
