ރާއްޖޭގައި މިހާތަނަށް އުފެދުނު ކޮންމެ ސަރުކާރެއްގައިވެސް ކުރިމަތިލާންޖެހޭ އެންމެ ބޮޑު އެއް ގޮންޖެހުމަކީ މަސްވެރިން ބާނާ މަހަށް އެކަށީގެންވާ އަގު ނުލިބުމުގެ ޝަކުވާ އާއި ބާނާ މަސް ސަރުކާރުން ނުވަތަ ސަރުކާރުން އުފައްދާފައިވާ ކުންފުނިން ބުނާއަގަށް ވިއްކުމުންވެސް އެ މަހަށް ފައިސާ ނުލިބޭތީ މަސްވެރިންގެ ފަރާތުން ކުރިމަތިކުރުވާ ގޮންޖެހުމެވެ. ނުވަތަ ޕްރެޝަރެވެ.
ނިމިދިޔަ އެމްޑީޕީގެ ސަރުކާރުގައިވެސް މަސްވެރިންނަށް ވީ ވައުދު ނުފުއްދުނުކަމަށްބުނެ އެންމެ ފަހުވަގުތު (އިނތިހާބުގެ ވަގުތު) މަސްވެރިންގެ ފަރާތުން ކުރިމަތިކުރުވި ފިއްތުންތަކާ ކެމްޕެއިނަށް ކުރި ނުރަނގަޅު އަސަރު ކުޑައެއް ނޫނެވެ. ނަތީޖާއެއްގެ ގޮތުން ސަރުކާރު ޕްރެޝަރަށްވެއްޓި މަސްކިރުވާ ކުންފުނީގެ ހާލަތަށް ބެލުމެއް ނެތި 17ރ އަށް ކިރުވަމުންއައި މަސްކިލޯއެއް 25ރ އަށް ހިއްލާލީ އިންތިހާބުގެ ދެވަނަބުރާ ދިމާކޮށެވެ.
އެހެން ނަމަވެސް އޭގެ ފައިދާ ކުރީގެ ސަރުކާރަށް ނެގޭގޮތެއް ނުވިއެވެ. މަސްވެރިން ބުނަމުން ދިޔައީ އެއީ ސަރުކާރުން މަސްވެރިންގެ ލޮލުގައި އެޅުވި އަނދުނެއް ކަމަށެވެ. އެހެން ނަމަވެސް އޭރު މަސްވެރިން އެޕްރިޝިއޭޓް ކުރާ އެއްކަމެއް އެބައޮތެވެ. އެއީ ކޮންމެ ހަފްތާއެއްގެ އާދީއްތަ ދުވަހު ލާރިކޮޅު ލިބޭ ކަމެވެ. ނަމަވެސް މިސަރުކާރުން މަސްވެރިންނަށް ފައިސާ ދިނުމުވައި ވަނީ ވަރަށް ބޮޑަށް އިހުމާލުވެފައެވެ. މަސްވެރިންނަށް މިހާރުވެސް 250 މިލިޔަން ރުފިޔާ ސަރުކާރުން ދަރާ އޮތްއިރު މަސްވެރިންނަށް ފައިސާ ނުދޭތާ 2 މަސް ވަނީ އެވެ. އެންމެ ފަހުން މިފްކޯއިން މަސްވެރިންނަށް ފައިސާ ދިނީ މިދިޔަ އަހަރު ނޮވެމްބަރު 30 ވަނަ ދުވަހުގެ ނިޔަލަށް ކިރުވި މަހަށެވެ.
ކޮންމެއަކަސް އާ ސަރުކާރު މަސައްކަތާ ހަވާލުވުމަށްފަހު ކުރީގެ ސަރުކާރުން ފަހުވަގުތު އެޅުވި "އަނދުން" ނުވަތަ 25ރ އަށް ބޮޑުކުރި މަސްކިލޯގެ އަގު މިހާތަނަށްވެސް ކުޑައެެއް ނުކުރެއެވެ. ޑރ. މުއިއްޒުގެ ރިޔާސީ ވައުދަކީ މަސް ކިލޯއެއްގެ އަގު 20ރ އަށްވުރެ ދަށް ނުކުރުމަށާއި އަދި ކިރާ މަހަށް އެންމެ ލަަސްވެގެން 48 ގަޑިއިރު ތެރޭ ފައިސާ ދިނުމެވެ.
ނަަމަވެސް ވައުދާ އެއްގޮތަށް މަސްވެރިންނަށް ފައިސާ ނުދެވެއެވެ. މަސްވެެރިކަން ކުރިއެރުވުމަށް ކަމަށްބުނެ ކުރިން އެސްޓީއޯގެ ދަށުން ހިނގަމުންއައި ސަރުކާރުގެ މަސް ކުންފުނި އެސްޓީއޯގެ ދަށުން ވަކިކޮށް 100 ޕަސެންޓް ހިއްސާވާ ސަރުކާރުގެ ކުންފުންޏަކަށް މިފްކޯ ބަދަލުކުރިއެވެ.
އަދި ސަރުކާރުގެ މަސްކުންފުނި މިފްކޯގައި މަސްވެރިންގެ ހިއްސާ އިތުރު ކުރުމަށް އެކުންފުނީގެ ބޯޑްގައި މަސްވެރިން ތަމްސީލުކުރާ ފަރާތެއް ހިމެނުން، އެއީ އެފަދަ އެއް މަސައްކަތެވެ.
އަނެއް ކަމަކީ ރާއްޖޭގެ އެންމެހާ މަސްވެރިން ޝާމިލުވުން ހިމެނޭގޮތަށް 'މަސްވެރިންގެ ކޯޕަރޭޓިވް ސޮސައިޓީ' އެއް އެކުލަވައިލުމަށް އެންމެ އެކަށޭނަ މޮޑެލަކާ ގުޅޭގޮތުން އެހެން ޤައުމުތަކުގެ ތަޖުރިބާއާއި، ކަމާގުޅޭ އިތުރު ދިރާސާތަކުގެ އަލީގައި ކޮންސެޕްޓްތަކެއް އެކުލަވާލުމަށާއި، މަސްވެރިންގެ ކޯޕަރޭޓިވް ސޮސައިޓީއެއް އެކުލަވާލުމުގެ މަސައްކަތް ކުރިއަށް ގެންދާނެ ގޮތުގެ މަގުޗާޓެއް އެކުލަވާލައި މަސްވެރި މުޖުތަމަޢާއެކު އެއްބަސްވުމަކަށް އައުމަށް ވަޒީރުންގެ މަޖިލީހުގެ މަޝްވަރާއަށްފަހު ރައީސުލްޖުމްހޫރިއްޔާ ނިންމެވި ނިންމެވުމެވެ.
ސުވާލަކި މިކަންކަމުން މަސްވެރިންނަށް ނުވަތަ ޖުމްލަކޮށް މަސްވެރިންގެ ކަންބޮޑުވުންތަކަށް ހައްލެއް ލިބިދާނެތޯއެވެ.
ރާއްޖޭގެ އެންމެ ދެކުނު އައްޑޫ ސިޓީގެ ކެޔޮޅަކު ބުނީ މަސްވެރިން މިއުޅެނީ ކޯޕަރޭޓިވް ސޮސައިޓީއެއް ނޫފެއްދިގެން ނޫން ކަމަށާއި މަސްވެރިން ކުރި ބުރަ މަސައްކަތުގެ އަގު ނުލިބިގެން ކަމަށެވެ. އެހެން ކަމުން ބޭނި މަސްކޮޅަށް ދޭންވާ ފައިސާ ދިނުމަށްފަހު އެހެންކަންކަމާ ވިސްނުމަށް އެދޭކަމަށް ކެޔޮޅު ބުންޏެވެ.
މިކަމާގުޅިގެން ރާއްޖޭގެ އުތުރުގެ އިހަވަންދޫ ކެޔޮޅަކު ބުނީ މަސްވެރިންގެ ކަންބޮޑުވުންތައް ހުރީ އަދިވެސް ހަމަ އެގޮތުގައި ކަމަށާއި މަސްވެރިންގެ ކަންބޮޑުވުންތަކަށް އެެއްވެސް ހައްލެއް ނުލިބޭކަމަށެވެ. އެހެންކަމުން ކޯޕަރޭޓިވް ސޮސައިޓީ އުފެއްދުނުގެ ބަދަލުގައި މަސްވެރިންގެ ކަންބޮޑުވުންތައް ހައްލުކޮށްދިނުމަށް ކެޔޮޅުވަނީ އެދިފައެވެ.
މަސްވެރިންގެ މައިގަނޑު ކަންބޮޑުވުންތަކަކީ ބާނާ މަހަށް ފައިސާ ދިނުން އަވަސްކުރުމާއި، ފަސޭހައިން އައިސް ލިބޭނެ އިންތިޒާމް ހަމަޖެއްސުމާއި، މަސްވެރި މޫސުމުގައި ބާނާ މަސް ފަސޭހައިން ކިރޭނެ އިންތިޒާމް ހަމަޖެހިގެން ދިއުމުވެ.
އެހެންކަމުން ސަރުކާރުން އަލަށް އަޅާ ފިޔަވަޅުތަކާ އުފައްދާ ޖަމިއްޔާ އަކުން ނަމަވެސް މިކަންކަމަށް ހައްލެއް ހޯދިއްޖެނަމަ މަސްވެރިންނަށް ކޮންމެވެސް ވަރެއްގެ ހިންހަމަޖެހުމެއް ލިބޭނެއެވެ.
