ކުރީގެ ސަރުކާރުން ހިންގި ގެދޮރުވެރިޔާ ސްކީމަށް ޝަރުތު ހަމަވާ މީހުންނަށް ފްލެޓް ދޫކުރުމުގެ މަސައްކަތް އަންނަ ހަފުތާގައި ފަށަން ތައްޔާރުވަމުން އަންނަ ކަމަށް ހައުސިން މިނިސްޓަރު ޑރ. އަލީ ހައިދަރު އަހްމަދު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައާ ބެހޭ ކޮމެޓީއަށް މިއަދު ގެދޮރުވެރިކަމާ ބެހޭ ވަޒީރު ހާޒިރުކުރުމުން ވަޒީރު ހައިދަރު ވިދާޅުވީ އޭސީސީން ފޮނުވި ފްލެޓަށް ޝަރުތު ހަމަވާ މީހުންގެ ލިސްޓުގައި ހިމެނެނީ 824 މީހެއްކަމަށެވެ. އެއީ ފްލެޓަށް ޝަރުތު ހަމަވާ ކަމަށް ކުރީ ސަރުކާރުން ކަނޑައެޅި 4،000 މީހުންގެ ތެރެއިން 20 ޕަސެންޓް މީހުންނެވެ.
އެހެން ނަމަވެސް އެއީ މުޅި ލިސްޓުގެ ކަމެއް ނުވަތަ ތަހުގީގު ބޭނުމަށް އޭސީސީން ބެލި އަދަދުގެ ތެރެއިން ފާހަގަ ކުރެވުނު ކަމެއް މިނިސްޓަރ ވިދާޅެއް ނުވެއެވެ.
ވަޒީރު ވިދާޅުވީ ގެދޮރުވެރިޔާ ޕޯޓަލްގެ އެކްސެސް މިހާރު އޮތީ އޭސީސީއަށް އެކަނި ކަމަށެވެ. އެ ޕޯޓަލްގެ އެކްސެސް މިނިސްޓްރީއަށް ލިބުމާ އެކު ޝަތުރު ހަމަވާ ކަމަށް އެ ކޮމިޝަނުން ކަނޑައެޅި މީހުންގެ މައުލޫމާތު މިނިސްޓްރީން ވެރިފައި ކުރުމަށް ފަހު ފްލެޓް ދޫކުރުމުގެ މަސައްކަތް ފަށާނެ ކަމަށެވެ.
"އަޅުގަނޑުމެން މި ރާވަނީ މި އަންނަ ހަފުތާގައި މި މަސައްކަތް ފަށައި ގަނެވޭނެ ކަމަށް. އެއީ އަޅުގަނޑަށް އޭސީސީން މައުލޫމާތު ލިބިފައި އޮތް ގޮތުގައި ދެތިން ދުވަހެއްގެ ތެރޭގައި އެކްސެސް ލިބޭނެއޭ އެކްސެސް ލިބުނުހާ އަވަހަކަށް އަޅުގަނޑުމެން އެމަސައްކަތް ފަށާނަން،" ހައިދަރު ވިދާޅުވި އެވެ.
އެ މަސައްކަތް ފަށާ ވީ އެންމެ އަވަހަކަށް ނިނއްމާލުމަށް މަސައްކަތް ކުރައްވާނެކަމަށްވެސް ވަޒީރު ހައިދަރު ވިދާޅުވިއެވެ.
ދޮރުވެރިން ފްލެޓްތައް ލިބޭ މީހުންގެ ދާއިމީ ލިސްޓެއް މިދިޔަ ސަރުކާރުން އއިއުލާން ކުރީ ދައުރު ނިމެން ކުޑަތަންވެފައިވަނިކޮށެވެ. އަދި ހަމަ އެރޭ އެމަސައްކަތް ހުއްޓާލުމަށް އޭސީސީން އަންގާފައިވެއެވެ. ގާތްގަނޑަކަށް ދެމަސް ދުވަހުގެ ތަހުގީގަށް ފަހު އޭސީސީން ބުނެފައި ވަނީ 4،000 ފްލެޓް ލިބުނު މީހުންގެ ތެރެއިން 60 ޕަސެންޓް މީހުންނަކީ ޝަރުތު ހަމަނުވާ މީހުން ކަމަށެވެ. ޝަރުތު ހަމަވާ ބާކީ ފޯމުތަކުގެ ތެރެއިން އެއްވެސް މައްސަލައެއް ނެތީ ގާތްގަނޑަކަށް 20 އިންސައްތަ ފޯމުގަ އެވެ. އަދި އަނެއް 19 އިންސައްތަ ވެސް ޝަރުތު ހަމަވި ނަމަވެސް މައުލޫމާތުގެ ފުށުއެރުންތަކެއް އެ ފޯމް ތަކުގައިވެސް ހުރިކަމަށް އޭސީސީން ވަނީ މީގެ ކުރިން ބުނެފައެވެ.
