ބޮލީވުޑްގެ އިތުރުން އިންޑިއާގެ ސައުތު ސިނަމާގެ ފިލްމުތަކުން ވެސް މަޝްހޫރު ކަމެއް ހޯދާފައިވާ ބަތަލާ ރަކުލް ޕްރީތު ސިންގާއި ލޯބިވެރިޔާ ޖެކީ ބަގްނާނީ ކައިވެނިކޮށްފިއެވެ.
އިންޑިއާގެ ގޯއާގައި އިއްޔެ ބޭއްވި ކުލަގަދަ ކައިވެނީގެ ހަފްލާގައި ބޮލީވުޑްގެ ގިނަ ތަރިންތަކަކާއި ދެ ފަރާތުގެ އާއިލާ އާއި ގާތް ރަހުމަތްތެރިން ވަނީ ބައިވެރިވެފައެވެ. މި ހަފްލާގައި ބައިވެރިވި ތަރިންތަކުގެ ތެރޭގައި އަކްޝޭ ކުމާރާއި، ޓައިގާ ޝްރޮޕް، އަރްޖުން ކަޕޫރު ޝިލްޕާ ޝެޓީގެ އިތުރުން އޭނާގެ ފިރިމީހާ ރާޖް ކުންދްރާ ހިމެނެއެވެ.
ކުލަގަދަކޮށް ކައިވެނީގެ ހަފްލާ ބޭއްވިއިރު، ރަކުލް ލައިގެން ހުރީ ފިޔާތޮށި އަދި ކްރީމް ލެހެންގާއެކެވެ. އަދި އޭނާގެ ކަރުގައި ބޮޑެތި ޑައިމަންޑްސް ހުރި ފަށެއްވެސް އަޅާފައި ހުއްޓެވެ. އޭނާގެ ލޯބިވެރިޔާ ޖެކީގެ ކަރުގައި ވެސް ޑައިމަންޑް ފަށެއް އޮތްއިރު، އޭނާ ލައިގެން ހުރީ ކްރީމް ކުލައިގެ ޝޭރްވާނީ އެކެވެ.
ދެ ލޯބިވެރިން ކައިވެނިކުރުމާއެކު، ފިލްމީ ދާއިރާގެ މީހުންގެ އިތުރުން ރަކުލް އަށް ތާއީދު ކުރާ ގިނަ އަދަދެއްގެ ސްޕޯޓަރުން ވަނީ އޭނާ އަށް މަރުހަބާ ކިޔާފައެވެ.
ރަކުލް، 33، އާއި މަޝްހޫރު ފިލްމު ޕްރޮޑިއުސަރު ވާޝޫ ބަގްނާނީ ދަރި ޖެކީ، 39، ރައްޓެހިވެގެން އުޅޭކަން އިއުލާންކުރީ 2021 ވަނަ އަހަރުގެ އޮކްޓޯބަރު މަހުގެ ތެރޭގައެވެ.
ރާކުލް ބޮލީވުޑަށް ތައާރަފްވީ 2014 ވަނަ އަހަރު ފިލްމު "ޔާރިއާން" އިންނެވެ. އޭނާގެ އެންމެ ފާހަގަކޮށްލެވޭ ހިންދީ ފިލްމުތަކުގެ ތެރޭގައި "ދޭ ދޭ ޕިޔާރު ދޭ"، "ރަންވޭ 34″، "ޑޮކްޓަ ޖީ" އަދި "ޗަތުރީވާލީ" ހިމެނެއެވެ.
ޖެކީ، ކުރިން ބައެއް ފިލްމުތަކުން ފެނިފައިވާވީ ނަމަވެސް މިހާރު ބޮޑަށް ހަރަކާތްތެރިވަނީ ފިލްމު ޕްރޮޑިއުސްކުރުމުގެ މަސައްކަތުގައެވެ. އާއިލީ ފިލްމު ކުންފުނި، ޕޫޖާ އެންޓަޓައިންމަންޓް ހިންގުމުގައި މިހާރު އެންމެ އިސްކޮށް އުޅެނީ ޖެކީއެވެ.
އޭނާ އެންމެ ފަހުން ފެނިފައިވަނީ 2018 ގެ ތަމަޅަ ފިލްމު "މޯހިނީ" ގެ ރޯލަކުންނެވެ. ޖެކީ ކުޅުނު ފިލްމުތަކުގެ ތެރެއިން ކިރިޔާ ވެސް ފާހަގަކޮށްލެވޭ ފިލްމަކީ 2011 ގެ "ފާލްތޫ" އެވެ.
