ޤައުމީ އެއާލައިން، މޯލްޑިވިއަނުން އަނެއްކާވެސް އަވައްޓެރި ސްރީލަންކާގެ ކޮޅުނބަށް ދަތުރުތަށް ފެށުމަށް ނިންމައިފިއެވެ.
މޯލްޑިވިއަނުން ވަނީ ކޮޅުނބަށް ދަތުރުތައް ބޭއްވުމަށް ނިންމައި، މިއަދުން ފެށިގެން ޓިކެޓް ބުކިންއަށްވެސް ހުޅުވާލާފައެވެ. މޯލްޑިވިއަނުން ކޮޅުނބަށް ދަތުރުތައް ފެށުމަށް ތާވަލްކޮށްފައިވަނީ އޭޕްރިލްމަހުގެ 25 ވަނަ ދުވަހުން ފެށިގެންނެވެ.
މޯލްޑިވިއަނުން ހަފްތާއަކު ދެ ދުވަހު ކޮޅުނބަށް ދަތުރުތައް ބޭއްވުމަށް ނިންމާފައިވާއިރު، ދެކޮޅު ޓިކެޓްގެ އަގަކީ 222 ޑޮލަރެވެ. މިއީ ދިވެހި ރުފިޔާގެ ރަސްމީ ގަނެވިއްކުމުގެ ރޭޓުން ބަލާނަމަ، 3,423.24 ރުފިޔާއެވެ.
✈️ We're thrilled to announce our latest destination: Colombo! 🇱🇰🇲🇻 Get ready to explore the vibrant culture and stunning landscapes of Sri Lanka's capital city with Maldivian Airlines. Book your tickets now and let the adventure begin! #FlyMaldivian #Colombo #NewDestination pic.twitter.com/6UWKNKLETI
— MaldivianAero (@MaldivianAero) February 29, 2024
މޯލްޑިވިއަނުން އެންމެފަހުން ކޮޅުނބަށް ދަތުރުތައް ބާއްވާފައިވަނީ 2021 ވަނަ އަހަރެވެ. އެފަހަރު ކުރަމުން އައި ދަތުރުތައް ހުއްޓާލާފައިވަނީ ސްރީލަންކާގެ މަޝްރަހު ގޯސްވުމުގެ ސަބަބުންނެވެ.
އޭގެފަހުން މޯލްޑިވިއަނުން ވަނީ ސްރީލަންކާގެ ރަތަމަލާން އެއާޕޯޓަށް 2022 ވަނަ އަހަރުގެ މާޗްމަހު ޝެޑިއުލް ދަތުރުތައް ބާއްވާފައެވެ. ނަމަވެސް އޭގެ އޭގެ ތިން މަސްފަހުން އެ ދަތުރުތައް ވަނީ ދަތުރުކުރާނެ މީހުން ނެތުމުންނާއި ސްރީލަންކާގެ އިގްތިސާދީ ހާލަތު ގޯސްވުމުގެ ސަބަބުން ހުއްޓާލާފައެވެ.
ބައިނަލްއަޤްވާމީ ވައިގެ އުދުހުންތަކުގައި ސްރީލަންކާއަކީ ދިވެހިރާއްޖެއަށް ވަރަށް މުހިއްމު ގައުމެކެވެ.
ރާއްޖޭގައި އެންމެ ފުރަތަމަ ހުޅުލޭގައި އެއާޕޯޓެއް 1960 ވަނަ އަހަރުގެ ތެރޭގައި އެޅިއިރު، އެންމެ ފުރަތަމަ ޖައްސާފައިވަނީ އެއާ ސިލޯނުގެ ބޯޓެކެވެ. ސްރީލަންކާގެ ގައުމީ އެއާލައިން، ސްރީލަންކަން އެއާލައިނުން އަންނަނީ މިހާރުވެސް ވެލާނާ އިންޓަރނޭޝަނަލް އެއާޕޯޓުގެ އިތުރުން އައްޑޫ ސިޓީ ގަމަށް އުދުހުންތައް ބާއްވަމުންނެވެ.
