ދިވެހިރާއްޖެ 7 ސަރަހައްދަކަށް ބަހާލައިގެން ތަރައްޤީކުރުމަށް މި ސަރުކާރުން ނިންމާފައިވާއިރު، ދ.ކުޑަހުވަދޫ ވެގެންދާނީ އޭގެ ތެރެއިން އެއް އާބަން ސެންޓަރަކަށް ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އަތޮޅުތެރެއަށް ކުރައްވަމުންގެންދަވާ ޒިޔާރަތުގެ ތެރެއިން މިއަދު ދ.ކުޑަހުވަދޫއަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ ރާއްޖެ އެކި ސަރަހައްދުތަކަށް ބަހާލައިގެން ނޫނީ ދެމެހެއްޓެނިވި ތަރައްޤީއެއް ނުގެނެވޭނޭ ކަމަށެވެ.
ރައީސް ވިދާޅުވީ އާބަން ސެންޓަރެއްގެ ގޮތުގައި ކުޑަހުވަދޫ ތަރައްޤީވެގެންދާއިރު، އެރަށުން އެތައް ހިދުމަތްތަކެއް ލިބިގެންދާނޭ ކަމަށެވެ. މިގޮތުން އާބަން ސެންޓަރެއްގެ ގޮތުގައި ކުޑަހުވަދޫ ތަރައްޤީކުރަން ވިސްނާފައިވާއިރު، ރަށުގެ ބަނދަރު މިހާރަށްވުރެ ބޮޑުކޮށް ރަނގަޅު ފެންވަރަކަށް ތަރައްޤީކުރަން ޖެހޭ ކަމަށެވެ.
President Dr @MMuizzu met with the residential community of Kudahuvadhoo Island in South Nilandhe Atoll, reiterating the administration's commitment to addressing their concerns. pic.twitter.com/QLDDTnMx6S
— The President's Office (@presidencymv) March 5, 2024
މީގެ އިތުރުން ހޮސްޕިޓަލް އިތުރަށް ބޮޑުކޮށް ޑަޔަލެސިސް ހިދުމަތް ފަދަ އައު ހިދުމަތްތައް ތައާރަފްކުރުމާއި ތައުލީމީ ނިޒާމުވެސް އިތުރަށް ރަނގަޅު ކުރަންޖެހޭކަމަށް ރައީސް ފާހަގަކުރެއްވިއެވެ.
އާބަން ސެންޓަރެއްގެ ގޮތުގައި ކުޑަހުވަދޫ ތަރައްޤީވެގެންދާއިރު، އެރަށުގައި ހައުސިންޔުނިޓްތައް އެޅުމާއި އެއާޕޯޓްވެސް އިތުރަށް ތަރައްޤީ ވެގެންދާނޭކަމަށް ރައީސް ވަނީ މިއަދު ވިދާޅުވެފައެވެ.
ރައީސުލްޖުމްހޫރިއްޔާ މިއަދު ކުދަހުވަދޫއަށް ވަޑައިގެންނެވިއިރު، އެމަނުކުފާނު އެންމެފަހުން ޒިޔާރަތްކޮށްފައިވަނީ ރ އަދި ބ އަތޮޅުގެ ރަށްތަކަށެވެ.
