ކައުންސިލްތަކުގެ އިދާރީ މުވައްޒަފުންގެ މުސާރައިގެ މައްސަލަތައް ހައްލުކުރެވެނީ ރައްޔިތުންގެ މަޖިލީހުން ކަމަށް ރައީސް ޑރ. މުޙައްމަދު މުއިއްޒު ވިދާޅުވި ވާހަކަފުޅު ކުރީ ސަރުކާރުގެ ފިނޭންސް މިނިސްޓަރު އިބްރާހީމް އަމީރު ދޮގުކުރައްވައި ރައީސަށް ރައްދުދެއްވައިފިއެވެ.
ކައުންސިލްތަކުގެ އިދާރީ މުސާރައާ ބެހޭގޮތުން ރައްޔިތަކު ދެންނެވި ސުވާލަކަށް ޖަވާބުދެއްވަމުން ރައީސް މުއިއްޒު ވިދާޅުވެފައިވަނީ، އިދާރީ މުވައްޒަފުންގެ މުސާރައަށް ބަދަލެއް ގެނައުމުގެ ވިސްނުންފުޅު އެމަނިކުފާނު ގެންގުޅުއްވާ ކަމަށެވެ. އަދި މަޖިލީހުގެ ކަމާ ގުޅުންހުރި ގާނޫނުގެ ތެރެއިން ކައުންސިލްތައް ގިންތިކޮށްފައިވަނީ ވަރަށް ދަށް ފަންތިއެއްގައި ކަމަށްވެސް ރައީސް މުއިއްޒު ވިދާޅުވެފައިވެއެވެ. އަދި ކައުންސިލްތަކުގެ އިދާރީ މުވައްޒަފުންގެ މުސާރަ ބޮޑުކުރަން ސަރުކާރާއި މާލީ ވުޒާރާއިން މަސައްކަތް ކުރާކަމަށާއި ނަމަވެސް ކައުންސިލްތައް ގިންތިކޮށްފައި ހުންނަ ގޮތުން އެކަން ކުރުމަށް ދަތިވާކަަަމަށް ވެސް އެމަނިކުފާނު ވިދާޅުވެފައިވެއެވެ. އަދި މިކަމަށް ހައްލެއް ގެނެވޭނީ ރައްޔިތުންގެ މަޖިލީހުގެ ތެރެއިން ކަމަށް ވެސް ރައީސް މުއިއްޒު ވިދާޅުވެފައިވެއެވެ.
"އެއީ މައިގަނޑު މަގުސަދަކީ. ސަރުކާރުން ފިނޭންސް މިނިސްޓްރީން މުސާރަ ބޮޑުކުރަން ބޭނުން ވިއަސް އެކަމެއް ނުއެއް ކުރެވޭނެ ކެޓަގަރައިޒް ކޮށްފައި އޮންނަ ގޮތުން،" ރައީސް ވިދާޅުވިއެވެ.
ރައީސްގެ އެ ވާހަކަ އަށް ރައްދުދެއްވައި އަމީރު އެކްސްގައި ކުރެއްވި ޕޯސްޓެއްގައި ވިދާޅުވީ ކައުންސިލްތަކުގެ އިދާރީ މުވައްޒަފުންގެ އިނާޔަތްތަކާއި މުސާރަ ކަނޑައަޅަނީ ޕޭ ކޮމިޝަނުން ކަމަށެވެ.
އަމީރު ވިދާޅުވީ، 2024 ގެ ބަޖެޓް ފާސްކޮށްފައިވާނީ ސިވިލް ސާވިސްގެ މުސާރަ ވެސް ބޮޑުކުރާގޮތަށް ކަމަށެވެ. އަދި މުއައްސަސާތައް ގިންތި ކޮށްފައިވާނީ، ޕޭ ކޮމިޝަނުން ކަމަށާއި އެއީ މަޤާމުގެ އެލަވަންސްތަކާއި ހާޒިރީ އިނާޔަތްތައް ކަނޑައެޅުމަށް އެކަނި ކަމަށެވެ.
"2024 ވަނަ އަހަރުގެ ބަޖެޓް ފާސްކޮށްފައިވަނީ ސިވިލް ސާވިސްގެ މުސާރަ ވެސް ބޮޑޫކުރާ ގޮތަށް. މުއައްސަސާތައް ގިންތިކޮށްފައިވަނީ ޕޭ ކޮމިޝަނުން," އަމީރު ވިދާޅުވިއެވެ.
