ކޮމަންޑޫ މުހައްމަދު އިބްރާހީމް: ފަހަތަށް ބެލުމެއް ނެތި ދާއިރާގެ ރައްޔިތުންނަށް ހެޔޮ ގޮތްތައް ހޯއްދަވައި ދެއްވުމުގެ ފުރިހަމަ އަޒުމުގައި ކުރިއަށް!

މިއީ ބަހުސެއްކަމަށް ބަލަމާހެއްޔެވެ؟ މުހައްމަދު އިބްރާހީމަށް ސުވާލެއް ކުރިމަތިވިއެވެ؛ ދާއިރާ އެނގިލައްވަނީ ކިހާ ވަރަކަށްތޯއެވެ؟

މުހައްމަދު އިބްރާހީމަކީ ކޮމަންޑޫއަށް އުފަން ކޮމަންޑޫގެ އިޖުތިމާޢީ ކުރިއެރުމަށް އަމިއްލަ ގޮތުންނާއި އެހެނިހެން ގޮތްގޮތުންވެސް އަބަދުމެ އެހީތެރިކަން ފޯރުކޮށްދެމުންގެންދާ ނަމޫނާއެކެވެ. ދާއިރާގައި ހިމެނޭ އަނެއް ދެރަށް ކަމަށްވާ ފޯކައިދޫ އާއި މަރޮށީގެ ހުރިހާ އުމެރެއްގެ މީހުންނާވެސް ގުޅުން ބޮޑެވެ. މުހައްމަދު އިބްރާހީމް ވިދާޅުވާ ގޮތުންނަމަ އެދާއިރާގެ ރައްޔިތުންގެ ބޭނުންތައް ކޮންމެ ރަށެއް ވަކިވަކިން ތަރުތީބުކޮށް ފަސޭހަކަމާއެކު ލިސްޓްކޮށްލެއްވޭނެއެވެ. އެހާވެސް ބޮޑަށް ދާއިރާ ފަރިތައެވެ. ދަނެއެވެ.

"އަޅުގަނޑަކީ މިއަދު ކުއްލިއަކަށް ދާއިރާއަށް ފުންމާލި މީހެއް ނޫން. ދާއިރާގެ ހުރިހާ ފިކުރެއްގެ މީހުންނާވެސް އަބަދުވެސް ގާތް ގުޅުމެއް ބާއްވަމުން، އަޅުގަނޑުގެ ސިޔާސީ ފިކުރު ދިރުވުމަށް ދެގޮތެއް ނެތި މަސައްކަތްކުރަމުން އަންނަ މީހެއް. ފާއިތުވި ތަނުގައި ވަރަށް ބޮޑެތި ހުށަހެޅުންތައްވެސް އެކި ފަހަރު މަތިން ސިޔާސީ ގޮތުން ލިބުނީމަވެސް އަޅުގަނޑު ގަބޫލުކުރާ އުސޫލަށް، ގޮތަށް ގުޑުންއަރާނެ ކަމެއް ކުރަން ބޭނުން ނުވާތީ އެއްގޮތެއްގައި މިދެމިހުންނަނީ. މިހާރު އެކަމުގެ ހިތްހަމަޖެހުން ވަރަށް ބޮޑަށް އެބައޮތް،" މުހައްމަދު އިބްރާހީމް ވިދާޅުވިއެވެ. "ރައްޔިތުންގެ ޚިދުމަތަށް މިނިކުތީ ފަޚުރުވެރިކަމާއެކު."

ކޮމަންޑޫ ދާއިރާގެ ރައްޔިތުން ގަބޫލުކުރާ ގޮތުގައި މުހައްމަދު އިބްރާހީމަކީ ހިތްހެޔޮ،ހުލްގުހެޔޮ، އަބަދުވެސް މީހުންނާ ގުޅޭ، އެރަށުގެ އެމީހާ މިމީހާ ނުވަތަ ޖުމްލަކޮށް ރައްޔިތޔުންގެ ހާލަތު ރަނގަޅަށް ދެނެލައްވާ ދާއިރާގެ ކުރިއެރުމަށްޓަކައި މުހިއްމު ބޭފުޅެކެވެ. އެއީ އޭނާގެ ތަސައްވުރު ރައްޔިތުންނަށް ސާފުކޮށްދީފައިވާތީއެވެ.

"އަޅުގަނޑުގެ ހުރިހާވެސް މަސައްކަތަކަށް ވާނީ ދާއިރާގެ ތިން ރަށަށް ތަރައްގީގެ އާ ކުލަވަރެއް ގެނެސްދިނުން. ސަރުކާރާ ގުޅިގެން އެސައްވުރު ދާއިރާގެ ރައްޔިތުންނަށްޓަކައި ވަނީ ކުރަހާ ނިމިފަ. ބޭނުންވަނީ އެކަންކަން ހަގީގަތަކަށް ހަދައި، އުމްރާނީ ގޮތުންނާއި އިގްތިސާދީ ގޮތުން ފުދުންތެރި ރައްޔިތަކު ދިރިއުޅޭ ދާއިރާއަކަށްކޮމަންޑޫ ދާއިރާ ހެދުން،" އޭނާ ވިދާޅުވިއެވެ. "އަޅުގަނޑު މިދާއިރާގެ ރައްޔިތުން ދޫކޮށެއް ނުލާނަން. ތަސައްވުރެއް އޮވެގެން މި ކުރިމަތިލީ ރައްޔިތުން ފަހުރުވެރިވާނެ އިތުރު މަސައްކަތްތަކެއް ކޮށްދިނިމުގެ މަގުސަދުގައި. އަޅުގަނޑަކީ ރައްޔިތުންގެ މީހެއް."

މުހައްމަދަކީ އަމިއްލަ ބުރަ މަސައްކަތުން ދިރިއުޅުމުގެ ކާމިޔާބީގެ ހަރުފަތްތައް ގިރާކުރެއްވި މުރާލި މަސައްކަތްތެރިއެކެވެ. ދީނީ ކަންކަމަށް ލޯބި ކުރައްވައެވެ. ބޭނުން ޖެހިފައިވާ މީހުންނަށް އަބަދުވެސް އެހީތެރިކަން ފޯރުކޮށްދެއްވައެވެ. ކޮންމެ މީހަކާވެސް ބައްދަލުކުރައްވާނީ ހިނިތުންވުމާއެކުގައެވެ.

"ގާނޫނު އަސާސީގައި ބަޔާންކުރާ ހުރިހާ ޝަރުތުތަކެއް ހަމަކޮށްގެން މެންބަރުކަމަށް، ރައްޔިތުންގެ ޚާދިމަކަށްވުމަށް އެދި ރައްޔިތުންގެ ކިބައިން ވޯޓަށް މިއެދެނީ. ދެއްކުންތެރިކަމެއް ބޭނުމެއް ނޫން. އަޅުގަނޑުގެ ސިޔާސަތުތަކާ ވިސްނުންތައް ވަރަށް ސާފުކޮށް ދާއިރާގެ ރައްޔިތުންނަށް މިގެންދަނީ ކިޔައިދެމުން. ﷲގެ ވާގިފުޅާއެކު މި އިންތިހާބު ކާމިޔާބުކުރުމުގައި ދާއިރާގެ ރައްޔިތުންގެ ފުރިހަމަ އެއްބާރުލުމަށް އަޅުގަނޑު އެދެން. އަޅުގަނޑަކީ ތިޔަ ބޭފުޅުން ފަހުރުވެރިވާނެ ފަދަ މަސައްކަތްތަކެއް ކޮށްދިނުމަށް ކެނޑިނޭޅި މަސައްކަތްކުރާނެ ހަކަތައާއި ހެޔޮ ނިޔަތް އޮތް މީހެއް. އަޅުގަނޑު މެމްބަރު ކަމަށް ހޮވައިގެން، އިރާދަކުރެއްވިއްޔާ ރައްޔިތުން ދުވަހަކުވެސް މާޔޫސްވާކަށް ނުޖެހޭނެ،" މުހައްމަދު ވިދާޅުވިއެވެ.