ވައިގެ މަގުން އެތެރެކުރާ މަސްތުވާތަކެތި އެއާޕޯޓުން ނެރެދިނުމުގައި އެމްއޭސީއެލްގެ މުވައްޒަފުން ޝާމިލްވާކަމަށް ބެލެވޭތީ ފުލުހުންގެ ސީރިއަސް ތަހުގީގެއް!

މިއީ ސީރިއަސް މައްސަލައެކެވެ. ރާއްޖެއަށް މަސްތުވާތަކެތި އެެތެރެކުރުމުގެ މަސައްކަތްކަތުގައި މޯލްޑިވްސް އެއާޕޯޓްސް ކޮމްޕެނީ މުވައްޒަފުން ހިމެނޭކަމުގެ ތުހުމަތު ދިވެހި ފުލިހުން ކުރުމެވެ. މިކަމުގެ އެންމެ ވަރުގަދަ އެއް ހެއްކަކީ މިދިޔަ މަހުގެ 15 ގައި ވައިގެ މަގުން ރާއްޖެ އެތެރެކުރި 4.5 ކިލޯ އަށް ވުރެ ގިނަ މަސްތުވާތަކެތި ވެލާނާ އިންޓަނޭޝަނަލް އެއާޕޯޓުން އުސޫލާ ޚިލާފަށް ނެރެދީފައި ވަނީ ފުލުހުން ބުނާ ގޮތުންނަމަ އެމްއޭސީއެލްގެ ބައެއް މުވައްޒަފުންގެ ބައިވެރިވުން އޮވެގެންނެވެ.

އެލަގެޖުގަައި ހުރި 4.5 ކިލޯ އަށް ވުރެ ގިނަ ޑްރަގްސްގެ ތެރޭގައި ހިރޮއިން އާއި މެތު ހުއްޓެވެ.

ފުލުހުންގެ ތަރުޖަމާނު އަހުމަދު ޝިޕާން ވިދާޅުވިގޮތުގައި އެމައްސަލައާ ގުޅިގެން ހައްޔަރުކޮށްފައި ވަނީ އެމްއޭސީއެލްގެ ދެ މުވައްޒަފަކާއި ޕާކިސްތާނު މީހެއްގެ އިތުރުން އެ ލަގެޖާ ހަވާލުވާން ދިޔަ މީހާ އެވެ.

އޭނާ ވިދާޅުވިގޮތުގައި އެމައްސަލައާ ގުޅިގެން މިހާރު ގެންދަނީ "ޖިނާއީ ބޮޑު ތަހުގީގެއް ހިންގަމުން" ކަމަށެވެ.

އުސޫލުތަކާ ޚިލާފަށް އެއާޕޯޓުން ބޭރަށް ނެރެދެން އުޅުނު އެމްއޭސީއެލްގެ ދެމުއްޒަފުން ހައްޔަރުކޮށް ކްރިމިނަލް ކޯޓަށް މުއްދަތު ޖަހަން ގެންދިއުމުން އެމައްސަލައިގައި ހިމެނޭ އެންމެ ސީރިއަށް މީހާ ކަމަށް ބެލެވޭ މީހާ "ޝަރުތުކޮށްފައި ވަނީ ދޫކޮށްލާފައި" ކަމަށް ޝިފާން ވިދާޅުވީ ކަންބޮޑުވުމާއެކުގައެވެ.

ފުލުހުން ތުހުމަތުކުރާ ގޮތުގައި މިވަގުތަށް އެމައްސަލައާ ގުޅިގެން ތަހުގީގަށް ހޯދިފައިވަނީ ދެމީހުންގެ ބައިވެރިވުން އޮތް ކަމަށް ނަމަވެސް، އެކަމުގައި އެމްއޭސީއެލްގެ ގިނަ އަދަދެއްގެ މުވައްޒަފުން ހިމެނެއެވެ. އެކަން ފުލުހުންގެ އިންޓެލިޖެންސްގެ ހޯދުންތަކުންވެސް ދައްކައެެވެ.

ނަމަވެސް އެ މީހުން ތަހުގީގަށް ބަންދު ކުރުމުގެ މުއްދަތު އިތުރު ކުރުމަށް ކްރިމިނަލް ކޯޓަށް ގެންދިއުމުން "މި މައްސަލާގައި ހިމެނޭ އެންމެ އިސްމީހާ ކަމަށް ބެލެވޭ" އެމްއޭސީއެލްގެ ސީނިއާ މުވައްޒަފަކު ދޫކޮށްލި ކަމަށް ޝިފާން ވިދާޅިވި އެވެ.

"މިއީ ސީރިއަސް މައްސަލައެއް. މިކަމާ ގުޅިގެން ޖިނާއީ ބޮޑު ތަހުގީގެއް ދަނީ ކުރަމުން،" އޭނާ ވިދާޅުވި އެވެ.

މި މައްސަލައާ ގުޅުވާލެވޭނެ ސީރިއަސް އެހެން މައްސަލައެއްވެސް އެބައޮތެވެ. އެއީ މިދިޔަ އަހަރުގެ ޖެނުއަރީ މަހުގެ ތެރޭގައި ފެންމަތިވި މައްސަލައެކެވެ. އެއީ ރާއްޖެއައި ބިދޭސީއެއްގެ ލަގެޖް 30 ކިލޯގެ މަސްތުވާތަކެއްޗާއެކު ވެލާނާއެއާޕޯޓުން ވީނުވީ ގޮތެއް ނޭނގި ގެއްލުނު މައްސަލައެެވެ. އެކަންވެސް ފުލުހުން ގެންދަނީ ސީރިއަސް މައްސަލައެއްގެ ގޮތުގައި ތަހުގީގުކުރަމުންނެވެ. ފުލުހުންގެ ތަހުގީގުން އެނގުނީ ވެލާނާ އެއާޕޯޓްގެ މުހިއްމު ތަންތަނުގައި ސެކިއުރިޓީ ކެމެރާ ބަހައްޓާފައި ނެތް ކަމެވެ.

ރާއްޖެ އައި މީހެއްގެ ލަގެޖު 30 ކިލޯގެ މަސްތުވާތަކެއްޗާ އެކު ވެލާނާ އެއާޕޯޓުން "ގެއްލުނު" މައްސަލަައެއް މިދިޔަ އަހަރުގެ ޖެނުއަރީ މަހު ފެންމަތިވި އެވެ. އެ ލަގެޖު ގެންދިޔަ މީހަކު ދެނަގަންނަން ކުރި މަސައްކަތުގައި، އެއާޕޯޓުގެ މުހިންމު ބައެއް ތަންތަނުގައި ކެމެރާ ނެތްކަން ފާހަގަވެފައިވާ ކަމަށް ފުލުހުން ބުނެފައި ވެ އެވެ.

ރާއްޖެ އައި ޕާކިސްތާނުގެ މީހެއްގެ ލަގެޖުން 30 ކިލޯގެ މަސްތުވާތަކެތި ފެނުމުން އެ މީހާ ފުލުހުންނާ ހަވާލުކުރި ނަމަވެސް އެ ލަގެޖު ކަސްޓަމްސް އިން ފުލުހުންނާ ހަވާލު ނުކުރާ ކަމަށް ފުލުހުން ބުނެފައި ވެ އެވެ. އެ ލަގެޖު ގެންދިޔަ މީހެއް އެ މައްސަލަ އަށް އަހަރަކަށް ވުރެ ގިނަ ދުވަސްވީއިރު އަދިވެސް ނޭނގެ އެވެ.

ރާއްޖެއަށް މަސްތުވާތަކެތި އެތެރެކުރުމުގެ ރޭވުންތަކުގައާއި އަމަލީ މަސައްކަތުގައި ދައުލަތުގެ ކަމާގުޅޭ އިދާރާތަކުގެ މުވައްޒަފުންގެ އަތެއްވާކަން އަބަދުވެސް އާންމުންގެ ތުހުމަތު އޮވެއެވެ. މިފަދަ ބައެއް އޮފިޝަލުން ފުލުހުން ހައްޔަތުކޮށް ތަހުގީގު ހިންގައި ޝަރީއަތަށް ވެސް ހުށަހަޅާފައި އެބަހުއްޓެވެ.