ޑްރޯން ހަމަލާތަކުން އިޒްރޭލަށް ގުޑުން އަރުވާލި އިރު އެހަމަލާއާ ގުޅިފައިވާ ހަގީގީ މަގުސަދެއް އަދިވެސް ސާފެއް ނުވެއެވެ. ސަބަބަކީ ހަމަލާގެ ތަފްސީލް މަޢުލޫމާތު ހަމަލާގެ މާކުރިން އީރާނުން އެމެރިކާއަށް އަންގައި ޔަހޫދީ އިޒްރޭލަށް ހަމަލާއިން ދިފާއުވާން އެކަށީގެންވާ ވަގުތު ދީފައިވާތީއެވެ. އަދި މިއީ އިޒްރޭލުން ފަލަސްތީނުގެ ރައްޔިތުންނާ ދެކޮޅަށް ދެމުންގެންދާ ހަމަލާތަކުގެ ސަބަބުން އީރާނުން ރުޅިއައިސްގެން ދިން ހަމަލާއެއް ނޫންކަން ޔަގީންވަނީ އެއީ އީރާންގެ ޑިޕްލޮމެޓިކް މިޝަންއަކަށް އިޒްރޭލުން ހަމަލާދީ އެތައް ބަޔަކު ޝަހީދުކޮށްލި ކަމުގެ ތުހުމަތުގައި އޭގެ ރައްދެއްގެ ގޮތުން ދިން ހަމަލާއަކަށްވާރީއެވެ.
އީރާނާއި އިސްރާއީލްގެ އަސްކަރީ މި އެޕިސޯޑަކީ އިސްތިރާތީޖީ އުކުޅުތަކުން ފުރިގެންވާ ގޭމެކެވެ. އެއްވެސް ހާލެއްގައި ރެސްލިން ގޭމް ފަދަ އެތެރޭގެ ރޭވުންތައް ހިމެނޭ ގޭމެއް ނޫންކަން ޔަގީނެވެ. އެއީ މަތީގައި ބަޔާންކުރި ސަބަބުތަކަށްވުރެ ވެސް ގިނަ ސަބަބުތައް މިހަމަލާގެ ފަރުދާގެ ފުރަގަހުގައި ފޮރުވިފައިވާތީއެވެ.
އީރާނުގެ ހަމަލާއާ ގުޅިގެން ޖީ7ގެ ގައުމުތަކުން ވަނީ އީރާނަށް އަދަބު ދޭނެ ކަމަށް ބުނެފައެވެ. އެކަމާ ގުޅިގެން އީރާނުން ބުނީ މިހާރުވެސް ހުޅަނގުގެ އިންތިހާ ދަތިކުރުމުގެ ފިޔަވަޅުތައް ތަހައްމަލު ކުރަމުން ގެންދާއިރު، އަސްކަރީ ގޮތުން ނޫން ގޮތަކަށް އީރާނަށް ދޭން އިތުރު އަދަބެއް ހުޅަނގުގެ ގައުމުތަކުގެ އަތުގައި ނެތް ކަމަށެވެ.
ހުޅަނގާއި އެމެރިކާއިން އީރާނަށް ވަރުގަދަ ރައްދެއް ދޭނެ ކަމަށް ބުނުމާއެކު ރަޝިޔާއިން ބުނެފައިވަނީ އީރާނަށް އަސްކަރީ ހަމަލާއެއް ދީފިނަމަ އީރާނުގެ ދިފާޢުގައި ރަޝިޔާ ތެދުވާނެ ކަމަށާއި އަދި އެކަމުގެ ނަތީޖާ ފިސާރި ހިތިވާނެ ކަމަށެވެ. ތުރުކީވިލާތުން ބުނެފައި ވަނީ އިސްލާމީ އުންމަތުގެ ނަން އީރާނުން ދިރުވައި ދީފިކަމަށާއި އީރާނަށް އެހީތެރިވެ ދިނުމުގަ އާއި އިޒްރޭލުގެ އުދުވާން ކުށްވެރިކުރުމުގައި އަބަދުވެސް ދެމިތިބޭނެ ކަމަށެވެ. ޗައިނާއިން ދިނީ ޑިޕްލޮމެޓިކް ޖަވާބެކެވެ. ބުނެފައިވަނީ އީރާނުގެ ކޮންސިއުލޭޓަށް އިޒްރޭލުން ހަމަލާދިންކަން އީރާނަށް ޔަގީންވާނަމަ ދިފާއުގައި ހަމަލާދިނުމަކީ އީރާނަށް ލިބިގެންވާ ހައްގެއް ކަމަށާއި ގަދަމީހާ ގަދަ އުސޫލަކީ ހިޓްލަރާއެކު ވަޅުޖެހިގެން ގޮސްފައިވާ ބޯދާ އާދައެެއްކަން އިޒްރޭލުން ގަބޫލުކުރަން ޖެހޭނެ ކަމަށެވެ.
ހަގީގަތުގައި އެމެރިކާ، އިސްރާއީލު ދިފާއީ ހަތްފާރުގެ މަރްހަލާތައް ފޫއަޅުވާ ލުމަކީ އިރާނުން ހޯދި ތާރީޚީ ވަރުގަދަ ކާމިޔާބީއެއް ކަމަށް މީޑިޔާތަކުން ގެންދަނީ ފާހަގަކުރަމުންނެވެ. އެއީ އިޒްރޭލާއި އެމެރިކާ ގުޅިގެން އިޒްރޭލުގެ ދިފާއަށްޓަކައި ގާއިމްކޮށްފައިވާ އަސްކަރީ ޓެކްނޮލޮޖީއަކީ އެއްވެސް ބަޔަކަށް ފޫދުއްވާ ނުލެވޭނެ އެއްޗެއް ކަމަށް އެމެރިކާ އާއި އިޒްރޭލުން ފަޚުރުވެރިކަމާއެކު ބުނަމުން ގެންދަނިކޮށް އީރާނުގެ ހަމަލާތައް ސީދާ އިޒްރޭލަށް ވާސިލްވުމަކީ މުޅި ދުނިޔެއަށް ލިބުނު ހައިރާން ކަމެކެވެ. އީރާނަށް ލިބުނު ކާމިޔާބެކެވެ. އޭގެ އެއް ސަބަބަކީ އީރާނުން ބޭނުންކުރީ އެމީހުން އަތުގައި މީގެ ތިރީސް އަހަރު ކުރިން ހުރި ޓެކްނޮލެޖީ ހިމެނޭ ޑުރޯންތަކާއި މިސައިލްތައް ކަމަށްވާތީއެވެ.
އުދުއްސީ ފަޒާތެރޭގައި އެކިމިންތަކުގައި ހޯދަން ބޭނުންވާ އެކި އުކުޅުތައް ހިމެނޭ ގޮތަށެވެ. އެމެރިކާ އާއި އިސްރާއީލުގެ މުކައްބަ ދިފާއީ ނިޒާމްގެ ކުޅަދާނަކަން ދެނެގަތުމުގެ ބޭނުމުގައެވެ. އެއްވަގުތެއްގައި ދެވުނު 500 ވަރަކަށް މިސައިލް ހިމެނޭ މިހަމަލާގައި އިސްރާއީލު އަތުން ޚަރަދު ވެގެން ދިޔައީ އީރާނު އަތުން ޚަރަދުވި ވަރަށް ބަލާއިރު ފަސް ހަގުނަ އިތުރަށެވެ. އެއީ ވެސް އީރާންހޯދާ ކާމިޔާބެކެވެ.
އިސްރާއީލުން ބޭނުންކުރި އަޔަންޑޯމް މުކައްބަ ދިފާއީ ސިސްޓަމްތަކަކީ އިންތިހާއަށް އަގުބޮޑުކޮށް ފައިސާ ޚަރަދުކޮށްގެން އުފެއްދޭ ސިސްޓަމްތަކެވެ. އެމެރިކާގެ ކުރީގެ ޖެނެރަލުންގެ ދިރާސާތަކުގައި ބުނާ ގޮތުގައި އީރާނުގެ ބައެއް މިސައިލްތައް މަދުން ނަމަވެސް އިސްރާއީލުގެ މުހިންމު އެއާ ބޭސްތަކަށް އެރި އެރުމަކީ އީރާނުގެ އަސްކަރީ ތައްޔާރީތަކުގެ ފުރިހަމަކަން ރަމްޒުކޮށްދިން ކަމެކެވެ.
ނެވަޓިމް އެއާބޭސް އަކީ، ދުނިޔޭގައި މިވަގުތު ހުރި އެންމެ ކުރި ހޯދާފައިވާ، އެފް 35 ޖެޓް އުޅަނދު ފަހަރު އުދުއްސާ އެއާ ބޭސްއެކެވެ. އީރާނުގެ ހަމަލާގެ ސަބަބުން އެ އެއާބޭސްގައިވާ ބައެއް ޖެޓުތަކަށް ވެސް އަސަރުކުރި ކަމުގެ ޚަބަރުތައް ލިބެއެވެ. އެމެރިކާއިން ވެސް ވަނީ އިސްރާއީލަށް އެރި ހަމަލާތައް އެރިތަންތަން ދައްކުވައިދޭ ޗާޓެއް ހާމަކޮށްފައެވެ.
އީރާނުގެ ވަރުގަދަ ހަމަލާގެ ބާރު ދަށްވެގެން ދިޔައީ، އުރުދަނުގައި ގާއިމުކޮށްފައި ހުންނަ އެމެރިކާގެ މިލިޓަރީ ބޭސްގެ ދިފާއީ ނިޒާމުގެ ސިސްޓަންތައް ބޭނުންކުރުމުގެ ހުއްދަ އުރުދުން ރަސްގެފާ ދެއްވުމުން އީރާނުގެ ހަމަލާތަކުގެ ގާތްގަނޑަކަށް އަށްޑިހަ ޕަސަންޓު ހަމަލާތައް އެމެރިކާއިން މައިތިރިކުރިއެވެ. މިހާލަތުގައި އުރުދުންގެ ރަސްގެފާނު އެމެރިކާ އާއި އިޒްރޭލުގެ ކޮޅު ނެގުމަކީ އީރާނަށް ކުރިމަތިވި ގޮން ޖެހުމަކަށްވިއެވެ.
މުޅި ހަމަލާއަށް ވަށާ ޖެހޭ ވިސްނުމަކުން ވިސްނާލާއިރު މިއީ ކުރިޔަށް އޮތްތާނގެ ހަމަލާތަކަށް އީރާރުން ހޯދި ވަރުގަދަ ތަޖްރިބާއެކެވެ. އަދި ބޮޑު ކާމިޔާބެކެވެ. ވަގުތުން ވަގުތަށް އިސްރާއީލުން، އީރާނަށް ހަމަލާއެއް އަދި ނުދިނަސް މިހަނގުރާމަ ބާރަށް އިސްރާއީލުން ކުރިޔަށް ގެންދާނެއެވެ. ޔަހުދީ އިޒްރާއީލުގެ ވެރިންނަށް ހަމަ ނިދި ނިދޭތީ އީރާނަށް ގޯނާއެއް ކޮށްލައިގެންނެވެ. ފަހަރުގައި ފަލަސްތީނު މީހުންނަށް ދެކޮޅަށް އިޒްރޭލުން ހިންގަމުން ގެންދާ ޒަރީމާތައް ވަރުގަދަވެސް ކޮށްފާނެއެވެ. މުސްލިމުން ރުޅިއަރުވާލުމަށްޓަކައެވެ. ގޮތް ދޫނުކުރާ ކަމާއި ފަހަށް ނުޖެހޭ ކަމާއި ބިރު ނުގަންނަކަން ދެއްކުމުގެ ގޮތުންނެވެ.
