ކުރިއަށްއޮތް ރައްޔިތުން މަޖިލީހުގެ އިންތިހާބުގެ ވޯޓުލާގަޑި ހަމަވިއިރު، ވޯޓުލާފައިވަނީ 72.96 އިންސައްތަ މީހުންކަމަށް އިލެކްޝަނުން ބުނެފިއެވެ.
އިލެކްޝަނުން ބުނީ ވޯޓުލުމަށް ދީފައިވާ ގަޑި 17:30 ގައި ހަމަވިވިއިރު، ވޯޓުލާފައިވަނީ ޖުމްލަ 207،693 މީހުން ކަމަށެވެ.
އިންތިހާބުގައި ވޯޓުނުލާ މީހުންގެ އިންސައްތައަކީ 27.04 އެވެ. އެއީ 76،970 މީހުންނެވެ. އިލެކްޝަންސް ކޮމިޝަނުގެ ތަފާސްހިސާބަށް ބަލާއިރު، ވޯޓުލާން ގިނައިން ނިކުމެފައިވަނީ ފިރިހެނުންނެވެ. އެއީ 104،826 މީޙުންނެވެ. ވޯޓްލާން ނިކުތް އަންހެނުންގެ އަދަދަކީ 102،867 އެވެ.
މިހާރު ކުރިއަށްދާ ރައްޔިތުންގެ މަޖިލީހުގެ އިންތިޚާބު 2024ގައި 17:00 އާ ހަމައަށް ވޯޓުލާފައިވާ ނިސްބަތް #vihi24 pic.twitter.com/WcXeUBLWm9
— Elections Commission (@ElectionsMv) April 21, 2024
މިފަހަރުގެ އިންތިޚާބުގައި ވޯޓުލުމުގެ ހައްގު 284,663 މީހަކަށް ލިބިފައިވާއިރު، 602 ވޯޓްފޮށި ވަނީ ބަހައްޓާފައެވެ. ވޯޓުލުން 8 ކުން ފެށިގެން ކުރިއަށްދާއިރު، ވޯޓުލެވޭނެ އެންމެ ފަހުގަޑިއަކީ ހަވީރު 17:30 އެވެ.
