މޫސުން ގޯސްވެ، ރާއްޖޭގެ ހުރިހާ ހިސާބަކަށް ބޯކޮށް ވާރޭ ވެހޭނެ ކަމަށް ލަފާކޮށް މޫސުމާ ބެހޭ އިދާރާ، މޯލްޑިވްސް މީޓިއޮރޮލޮޖީ ސާވިސް (މެޓް އޮފީހުން) އެލާޓް ނެރެފިއެވެ.
މެޓް އޮފީހުން ވަނީ މިއަދު މުޅި ރާއްޖެއަށް ވިއްސާރަ ކުރާނެ ކަމަށް ލަފާކޮށް ފަތިހު 5:30 ފެށިގެން ހެނދުނު 10:30 އަށް ވައިޓް އެލާޓް ނެރެފައެވެ.
އެ އެލާޓްގައި ވާ ގޮތުން، އެ ވަގުތުތަކުގައި ރާއްޖޭގެ ހުރިހާ ހިސާބަކަށް ވެސް ބޯކޮށް ވާރޭ ވެހި ގުގުރާނެ ކަމަށް ލަފާ ކުރެވޭ ކަމަށް މެޓް އޮފީހުން ބުނެފައިވެއެވެ.
Alert white for heavy rain and thunderstorms. pic.twitter.com/mglv6bPOco
— Maldives Meteorology (@MetMaldives) May 14, 2024
މެޓް އޮފީހުން ވަނީ މި ސަމާލު ނެރެފައި ވަނިކޮށް އޭގެ ކުޑައިރުކޮޅެއް ފަހުން ހަ އަތޮޅަކަށް ރީނދޫ ސަމާލު ނެރެފައެވެ. މި ސަމާލު ނެރެފައި ވަނީ ވ. އަތޮޅާއި ފ. އަތޮޅާއި މ. އަތޮޅާއި ދ. އަތޮޅާއި ތ. އަތޮޅާއި ލ. އަތޮޅަށެވެ.
އޭގެ އިތުރުން، މޫސުން ވަރަށް ގޯސްވެ ރާއްޖޭގެ ދެ އަތޮޅަކަށް މެޓް އޮފީހުން ރޭ ވަނީ އޮރެންޖު އެލާޓް ވެސް ނެރެފައެވެ. މި އެލާޓް ރޭ ދަންވަރު ނެރުނީ ތ. އަތޮޅާއި ލ. އަތޮޅަށެވެ. އިންޒާރުގައި ބުނެފައިވަނީ ގުގުރުމާއެކު ބޯކޮށް ވާރޭވެހި ފެންބޮޑުވާނެ ކަމަށް ލަފާ ކުރެވޭ ކަމަަށެވެ.
މި ދުވަސްވަރަކީ ރާއްޖޭގެ އެކި ހިސާބުތަކަށް މޫސުން ގޯސް ދުވަސްވަރަކަށް ވުމާއިއެކު، ކަނޑު ދަތުރުކުރުމުގައި ސަމާލުވުމަށް ކަމާބެހޭ ފަރާތްތަކުން އިލްތިމާސްކުރެއެވެ.
