އަހަރެން މަރުވަނީއެވެ! ނަފްސާނީ ބަލީގެ ތަޖުރިބާ!

އައިޖީއެމްއެޗްގެ އިމަޖެންސީގައި އެޑްމިޓްކޮށްފައި އޮތް ބައްޕައަށް ޒިޔާރަތްކޮށްފައި ނުކުމެގެން ހިނގައިގަތުމާއެކު ކުއްލިއަކަށް ބޮޑުކަމުދާން ޖެހިގެން އިމެޖެންސީ ރޫމާ ޖެހިގެން ހުރި ފާހާނާ ބަރިއަށް ވަދެ ފާހާނާކޮށްލައިގެން ނިކުތްއިރު ބޮލުގައި ރިހުމެއް ހުއްޓެވެ. އެ ރިހުން ގަދަވަމުންދާތީ، ބާރަށް ހިނގާފައި ގޮސް ކަނބާ އައިސާ ރަނި ހިނގުމަށް ނުކުމެ ޓެކްސީއެއް އަތުޖެހޭތޯ ބެލީއެވެ. ޓެކްސީއެއްގެ އިންތިޒާރުގައި ހޮސްޕިޓަލް ދޮރާ ދިމާލުން ބޭރުގައި ހުއްޓާ ބޮލަށް އެނބުރުން އަރާހެން ހީވާން ފެށިއެވެ. ދެން ހީވާން ފެށީ ދުނިޔެ ވަށާ އެނބުރޭހެންނެވެ. ނޭވާ ވެސް ކުރުވަނީއެވެ. ހިތް ތެޅެން ފަށައިފިއެވެ. ވިންދު އަވަސް ވެއްޖެއެވެ. އަހަރެން މަރުވަނީއެވެ. ހިތުގައި އާދަޔާ ޚިލާފު ބިރުވެރިކަމެއް އުފެދި، އިތުރަށް ހާސްވާން ފެށިއެވެ. އައިޖީއެމްއެޗްގެ ހުޅަނގު ފާރުގައި ހިފަހައްޓައިގެން އަވަސް ގޮތަކަށް ހިނގާފައި ގޮސް ޕޮލިސް ޕޯސްޓް ކުރިމައްޗާ ހަމައަށް ދެވުނީ ކިރިޔާއެވެ. ދެފައިން ވާގި ހިނގައްޖެއެވެ. އަހަރެން ވަރަށް ބާރަށް "އަހަރެން މަރުވަނީ"އޭ ގޮވާލިއަޑަށް ޕޮލިސް ކުއްޖާ އައިސް އަހަރެން ހިފެހެއްޓިއެވެ. އަދި ޓޯކީއިން ބަޔަކާ ވާހަކަ ދެއްކުމުން، ލަސްތަނެއްނުވެ، ފުރޮޅުލީ ގޮނޑިއެއް ގެނެސް އަހަރެން އެގޮނޑީގައި ބޭންދިއެވެ.

އަހަރެން ގެން ގޮސް އެވެއްދީ އިމަޖެންސީއަށެވެ. ހުސް އެނދެއް ނެތުމުން، އަހަރެން ތަނެއްގައި ބޭއްވުމަށް އާދޭސް ކުރަމުން ދިޔައިމެވެ. ޑޮކްޓަރު އައުމުންވެސް އަހަރެންނަށް ބުނެވުނީ އަހަރެން މަރުވަނީ ކަމަށެވެ. ޑޮކްޓަރު އަވަސް ޓެސްޓްތަކެއް ހެދިއެވެ. ލޭމަތިކަން ފިޔަވައި އޭނާއަށް ފާހަގަވި އެއްވެސް ކަމެއް ނެތެވެ. ލޭ ދަށްކުރަން އޭނާ ބޭސް ދިނެވެ. އެކަމަކު އަހަރެންނަށް އެއްވެސް ބަދަލެއް ނާދެއެވެ.

އަހަރެންނާއެކު މިހާދިސާ ހިނގި ހިސާބަށް ޖެހިލަމާ ހިނގާށެވެ. އަހަރެން ބޯ އަނބުގަނެގެން ވެއްޓެން އުޅޭހެން ހީވާން ފެށުމުން އަހަރެންގެ ހަނދާންނަށް ކުއްލިއަކަށް އައީ، ރައްޓެއްސްގެ ބައްޕަ ގޮވައިގެން ބެންކޮކަށް ފަރުވާއަށް ގޮސް އުޅުމުގެ ތެރޭގައި ކެފޭއެއްގައި ކާން ތިއްބާ ރައްޓެހި މީހާގެ ބައްޕަ ކުއްލިއަކަށް ކާން އިން ތަށި ތެރެއަށް މޫނުވާ ގޮތަށް ވެއްޓި މުޅި މީހާގެ ގައިން ވާގި ހުސްވެ، ނޭވާލަނީ ގުގުރި ދަމާހެންނެވެ. ކެފޭ މީހުން އެމްބިއުލާންސަށް ގުޅުމުން، އެމީހުން އައިސް ބެލިބެލުމުން އޮކްސިޖަން ވަރަށް ދަށްކަން ޔަގީންވިއެވެ. އެހެންވެ ކުރިމަތިވެގެން އުޅެނީ ހިތުގެ މައްސަލައެއް ކަމަށް ނިންމައި، އެންމެ ކައިރީގައި ހުރި ޕަޔަތައި 1 ހޮސްޕިޓަލަށް އޭނާ ގެންދިއުމުން އެނގުނީ ހިތާ ގުޅިފައިވާ ލޭ ހޮޅިތަކުގެ ތެރެއިން ތިން ހޮޅިއެއް 90 ޕަސެންޓް ބްލޮކްވެފައިވާކަމެވެ. ފުރާނަ ސަލާމަތް ކުރުމަށްޓަކައި ވަގުތުން އެންޖިއޯ ޕްލާސްޓަ ހަދައި ސްޓަން ލެއްވިއެވެ. އޭނާ ހޮސްޕިޓަލުން ދޫކޮށްލީ ހަފުތާއެއްގެ ފަރުވާއަށް ފަހުއެވެ.

އަސްލު ކަންތައް ވީގޮތަކީމިއެވެ؛ އަހަރެން ބޮލަށް އެނބުރުން އަރައި، ނޭވާ ކުރުވެ، ވެއްޓެން އުޅޭހެން ހީވާން ފެށުމުން، މަތީގައި ބަޔާންމިކުރި ހާދިސާއާ އަހަރެންގެ ހާލަތާ ގުޅުވައި ލެވުނީއެވެ. އެހިސާބުން އަހަރެން މާބޮޑަށް ޕެނިކްވީއެވެ. އެހިސާބުން މީހާގެ މޭހުންނަނީ ނުބައި ކޮށްފައެވެ. ބަނޑުފުއްޕާ ވައިގެ އުނދަގޫ އިންތިހާއަށް ކުރަން ފެށިއެވެ. ކާއެއްޗެއް ކާކަށް ބޭނުމެއް ނުވެއެވެ. ހިތްތެޅުން ނުހުއްޓެއެވެ. ބައެއް ފަހަރު ކަރުތެރޭގައި އެއްޗެއް ތާށިވާހެންވެސް ހީވެއެވެ.

އައިޖީއެމްއެޗުން އީސީޖީ ހަދާ އޭގެ ނަތީޖާވެސް ރަނގަޅު ކަމަށް ބުނުމުން އަހަރެން ރައްޓެހިންކައިރީ އާދޭސްކޮށްގެން ޓްރީޓޮޕް ހޮސްޕިޓަލަށް އިމަޖެންސީގައި ގެންދިޔައެވެ. އެތަނުގައިވެސް ފުރަތަމަ ފަރުވާ ފެށީ އިމަޖެންސީގައެވެ. އައިޖީއެމްއެޗުން ނުހަދާ ބައެއް ޓެސްޓްތަކާއި ބޮލުގެ ސީޓީ ސްކޭނެއް ވެސް ނެގިއެވެ. އެމީހުންނަށް މައްސަލައެއް ފާހަގަ ނުކުރެވުނު ކަމުގައިވިއަސް، ލޭ ދަށަށް ނުދިއުމާއި ހިތުގެ ވިންދު އަވަސްކަމުންނާއި އަހަރެންގެ ކިބައިން ހައިޕައެކްޓިވް ނިޝާންތަކެއް ފެންނާތީ އެތެރެހަށީގެ ޑޮކްޓަރު އިރުޝާދު ދިނީ އެޑްމިޓްކޮށްގެން ފަރުވާދޭށެވެ. އަހަރެން ކޮޓަރީގައި އެޑްމިޓްކޮށް، ލެޔަށާއި ގޭހަށާއި ކާހިތްވޭތޯ ބެލުމަށް ބޭސް ދޭން ފެށިއެވެ. އަހަރެންނަށް އެއްވެސް ލުޔެއް ނުލިބެއެވެ. ފައި މަސާޖްކޮށްލުމުން ވަގުތު ކޮޅަކަށް މީހާ ހަމަޖެހޭހެން ހީވެއެވެ. އެކަމަކުވެސް ނިދާވެސް ނުލެވެއެވެ. މިއީ ހޮސްޕިޓަލުގައިން ތިން ދުވަސްވީއިރުވެސް ހާލަތު ހުރި ގޮތެވެ.

އަހަރެން ހީކަރުވައެވެ. އެކަމަކު މުޅި މީހާ ގައިން ހުންނަނީ ދާހިތްލާފައެވެ. ހަށިގަނޑުގައި ހިނގާލާނެ ވަރެއްވެސް ނުހުރެއެވެ. ހިތްތެޅުން މަޑެއް ނުވެއެވެ. ކޮޅަށް ތެދުވެ ބަލާލުމުން ހީވަނީ ދުނިޔު އެނބުރި ގަންނަހެންނެވެ. ގަންނާކުރައްވާ ބިރުން އަވަހަށް އެނދުގައި އޮށޯވެ، ރަހުމާން ސޫރަތް ޖަހައިގެން އޮންނަނީއެވެ. (ނުނިމޭ)