ރާއްޖެއިން މި އަހަރު ހައްޖަށް ދިޔަ ހައްޖުވެރިން މާދަމާ ރާއްޖެ އަންނަން ފަށާނެ ކަމަށް މޯލްޑިވްސް ހައްޖު ކޯޕަރޭޝަން ލިމިޓެޑް (އެމްއެޗްސީއެލް) އިން ބުނެފިއެވެ.
މިއަހަރު ރާއްޖެއިން 1150 މީހުން ހައްޖަށް ދިޔައެވެ. އޭގެ ތެރެއިން ރ. ހުޅުދުއްފާރަށް ނިސްބަތްވާ އަންހެން ހައްޖުވެރިއަކު ވަނީ ނިޔެވާފައެވެ.
މިއަހަރުގެ ހައްޖުގެ އަޅުކަން އަދާކުރުމަށް ވަނީ ހައްޖަށް ދިއުމުގެ ތަނަވަސްކަން ނެތް ނިކަމެތިން ސަރުކާރުގެ ހަރަދުގައި ހައްޖަށް ފޮނުވުމަށް ރައީސް ޑރ. މުހައްމަދު މުއިއްޒު ވެވަޑައިގެންފައިވާ ވައުދުގެ ދަށުން 50 މީހުން ހައްޖަށް ގޮސްފައެވެ.
ހައްޖުވެރިން ރާއްޖެ އަންނަ ދުވަސްތައް:
- 24 ޖޫން
- 28 ޖޫން
- 1 ޖުލައި
- 4 ޖުލައި
ރާއްޖެއިން މި އަހަރު ހައްޖަށް ދިޔަ ހައްޖުވެރިން މާދަމާ ރާއްޖެ އަންނަން ފަށާއިރު، އިސްލާމިކް މިނިސްޓަރ ޝަހީމު ވަނީ މި އަަހަރުގެ ހައްޖު އޮޕަރޭޝަން ވަރަށް ކާމިޔާބު ކަމަށާއި ރަނގަޅު ކުރަން ޖެހޭ ކަންތައްތަކެއް ފާހަގަކުރެވި ކުރިއަށް އޮތް ތަނުގައި އެކަންކަން ރަނގަޅު ކުރައްވާނެ ކަމަށް ވިދާޅުވެފައެވެ.
ފާހަގަކޮށްލަން ޖެހޭ ކަމަކީ ހައްޖުވެރިންގެ ކަންކަން ގާތުން ބެއްލެވުމަށް ހައްޖު ކޯޕަރޭޝަނާއި ގުޅިގެން ދިވެހި ހައްޖު މިޝަނުންވެސް ގިނަ މަސައްތަކެއްވެސް ކުރެވިގެން ގޮސްފައިވާ ކަމެވެ.
މި އަހަރު އަމީރުލް ހައްޖަކީ އެޑިއުކޭޝަން މިނިސްޓަރު ޑރ. އަހުމަދު ޝަފީއު އެެވެ.
