25 އަހަރަށްފަހު ގާޒާއިން ޕޯލިއޯ ފެނިފައިވާކަމަށް އދ އިން ބުނެފިއެވެ.
އދ.ގެ ފަލަސްތީނު ރެފިއުޖީންނާ ބެހޭ އިދާރާ (ޔޫއެންއާރްޑަބްލިއުއޭ)ގެ ވެރިޔާ ފިލިޕޭ ލަޒާރިނީ ހުކުރު ދުވަހު ގާޒާއިން ޕޯލިއޯ ފެނިފައިވާކަން ޔަގީންކޮސްދެއްވާފައެވެ. ގާޒާއިން އެ ބައްޔަށް ޕޮޒިޓިވް ވެފައިވަނީ އުމުރުން 10 މަހުގެ ކުއްޖެއްކަމަށެވެ. އަދި އެކުއްޖާ އަކީ ޕޯލިއޯ ވެކްސިނ ނުޖަހައި ހުރި ކުއްޖެއްކަމަށް ރިޕޯޓަތައް ބުނެއެވެ.
އެކަމާ ގުޅިގެން ދުނިޔޭގެ ސިއްހަތު ޖަމިއްޔާގެ ވެރިޔާ ޓެޑްރޯސް އަދަނޮމް ވިދާޅުވީ އެކަމާ ވަރަށް ބޮޑަށް ކަންބޮޑުވެވަޑައިގަންނަވާ ކަމަށާއި އަދި ކުރިއަށް އޮތް ހަފުތާތަކުގައި ވެކްސިން ޕްރޮގްރާމެއް ފެށުމުގެ މަސައްކަތް ކުރަމުން އަންނަ ކަމަށެވެ.
ޣައްޒާގައި އަލުން ޕޯލިއޯ ފެތުރުމުގެ ސަބަބަކީ ކުޑަކުދިންނަށް ވެކްސިން ދިނުމުގެ ޕްރޮގްރާމްތަކަށް ހުރަސް އެޅުމާއި ހަނގުރާމައިގެ ސަބަބުން ފެނާއި ނަރުދަމާގެ ނިޒާމަށް ބޮޑެތި ގެއްލުންތަކެއް ލިބުން ކަމަށް އިންސާނީ އެހީދޭ ޖަމާއަތްތަކުން ވަނީ ބުނެފައެވެ.
އެހެންކަމުން އެ ބަލި ފެތުރުން ކޮންޓްރޯލް ކުރުމަށް އދ އިން އަންނަނީ 10 އަހަރުން ދަށުގެ 640،000 އަށް ވުރެ ގިނަ ކުދިންނަށް ޕޯލިއޯ ވެކްސިން ދިނުމުގެ ކެމްޕޭން ކުރިއަށް ގެންދިއުމަށްޓަކައި ނގުރާމަ ހަފުތާއަކަށް މެދުކަނޑާލުމަށް ބާރު އަޅަމުންނެވެ.
