ޔޫކްރެއިންގެ ދެކުނުގެ ކޭރްސަން ސަރަހައްދަށް ރަޝިޔާއިން އިއްޔެ ދިން ހަމަލާ އެއްގައި 21 މީހުން މަރުވެ އެތައް ބަޔަކު ޒަހަމްވެއްޖެއެވެ.
ޔޫކްރޭންގެ ރައީސް ވޮލޮޑިމީރު ޒެލެންސްކީ ވިދާޅުވީ މި ހަމަލާތަކުގެ ސަބަބުން ރޭލްވޭ ސްޓޭޝަނެއްގެ އިތުރުން އާއްމުންގެ ބައެއް ތަންތަނަށް ގެއްލުން ވެފައިވާ ކަމަށެވެ.
މިދިޔަ ނޮވެމްބަރު މަހު ރަޝިޔާ ސިފައިން ފޭބި، ކޭރްސަން ސިޓީ އޮންނަނީ ޔޫކްރެއިންގެ ދެކުނުގެ ފްރޮންޓްލައިން ކައިރީގައެވެ. "މިހާތަނަށް 21 މީހުން މަރުވެއްޖެ! 48 ޒަހަމްވެއްޖެ!" ޓެލެގްރާމްގައި ޒެލެންސްކީ ވިދާޅުވިއެވެ.
ސުޕަމާކެޓެއްގެ ތަރުކާރީ ގޮޅިއެއްގެ ބިއްދޮށުގައި ހަށިގަނޑާއި ޒަހަމްވި މީހުންގެ ފޮޓޯތައް ޒެލެންސްކީ ވަނީ އާންމުކުރައްވާފައެވެ. ކޭރްސަންގެ ޕްރޮސެކިއުޓަރުން ވަނީ މި ހަމަލާ "ބޮޑު" ކަމަށް ސިފަކޮށް، މަރުވި މީހުންގެ ތެރެއިން 12 މީހުން މަރުވެފައި ވަނީ އެ ސިޓީގައި ކަމަށާއި އެހެން މީހުން މަރުވެފައި ވަނީ ކައިރި އަވަށްތަކުގައިކަން ފާހަގަކޮށްފައެވެ.
"މެއި މަހުގެ ތިން ވަނަ ދުވަހުގެ ހެނދުނު ރަޝިއާ ސިފައިން ވަނީ ކޭރްސަން ސިޓީ އާއި އެ ސަރަހައްދުގެ އާބާދީތަކަށް ބޮޑެތި ހަމަލާތަކެއް ދޭން ފަށާފައި،" ޕްރޮސެކިއުޓަރުން ވިދާޅުވިއެވެ.
އޮފިޝަލުން ވަނީ ހުކުރު ދުވަހުން ފެށިގެން ހޯމަ ދުވަހުގެ ނިޔަލަށް ކޭރްސަން ކާފިއު ހިންގާނެ ކަމަށް ބުނެފައެވެ.
