ދާދި ފަހުން ޕާކިސްތާނުގެ ސަރުކާރާ ދެކޮޅަށް ކުރި މުޒާހަރާތަކުގައި އަސްކަރީ މުދަލަށް ހަމަލާދިން މީހުންގެ ޝަރީއަތްތައް އެ ގައުމުގެ އަސްކަރީ ގާނޫނުގެ ދަށުން ހިނގާނެ ކަމަށް ޕާކިސްތާނުގެ ބޮޑުވަޒީރު ޝަހްބާޒް ޝަރީފް ވިދާޅުވެއްޖެއެވެ.
ކޮރަޕްޝަންގެ ތުހުމަތުގައި ކުރީގެ ބޮޑުވަޒީރު އިމްރާން ހާން ހައްޔަރުކުރުމާ ގުޅިގެން ވަރުގަދަ މުޒާހަރާތަކެއް ވަނީ ކޮށްފައެވެ. އޭނާ ހައްޔަރުކޮށްފައިވަނީ މިމަހުގެ ނުވަވަނަ ދުވަހު ވެރިރަށް އިސްލާމްއާބާދުގައެވެ.
އިމްރާން 48 ގަޑިއިރު ވަންދެން ބަންދުގައި ބަހައްޓާފައި ވަނިކޮށް އޭނާގެ ސަޕޯޓަރުން ވަނީ ސަރުކާރުގެ ވެހިކަލްތަކަށާއި އަސްކަރީ މުދާތައް ހިމެނޭ ގޮތަށް އިމާރާތްތަކަށް ހަމަލާ ދިނުން ފަދަ ހަރުކަށި އަމަލުތައް ހިންގާފައެވެ. އެ އަމަލުތަކުގެ ސަބަބުން އެތައް ބައެއްގެ ފުރާނަ ގެއްލި، 10 މީހުން މަރުވެ، 4،000 އަށް ވުރެ ގިނަ މީހުން ހައްޔަރުކުރިއެވެ.
މި މުޒާހަރާތަކާ ގުޅިގެން ސަރުކާރުން ވަނީ ޕާކިސްތާނުގެ އަސްކަރިއްޔާގެ ގާނޫނު ބޭނުންކޮށްގެން އެ މުޒާހަރާތައް ހުއްޓުވާނެ ކަމަށް ބުނެފައެވެ.
ބޮޑުވަޒީރު ޝަރީފް އާދީއްތަ ދުވަހު ވިދާޅުވީ އާންމުންގެ މުދަލަށް ހަމަލާދިން ކަމަށް ތުހުމަތު ކުރެވޭ މީހުންގެ ޝަރީއަތް ކުރިއަށް ގެންދާނީ "ޓެރަރިޒަމް މަނާ ކުރުމުގެ" ގާނޫނުގެ ދަށުން ކަމަށެވެ. ލާހޯރުގައި ބޭއްވި ނޭޝަނަލް ސެކިއުރިޓީ ކޮމިޓީ (އެންއެސްސީ)ގެ ބައްދަލުވުމެއްގައި އޭނާ ވިދާޅުވީ ޓެރަރިޒަމް މަނާކުރުމުގެ ގާނޫނުގެ ދަށުން މަދަނީ މަރުކަޒުތަކަށް ހަމަލާދިނުމުގައި ބައިވެރިވާ އާންމުންގެ މައްޗަށް ޝަރީއަތް ހިންގުމަށް ބައެއް ނިންމުންތައް ނިންމާފައިވާ ކަމަށެވެ.
އަސްކަރީ މަރުކަޒުތަކަށް ހަމަލާދިން މުޒާހަރާގެ ބައިވެރިންގެ ޝަރީއަތް ކުރިއަށް ގެންދާނީ ގާނޫނު އަސާސީގައި ބަޔާންކޮށްފައިވާ އެކަށީގެންވާ ގާނޫނުތަކާ އެއްގޮތްވާ ގޮތުގެ މަތިންނެވެ.
ހިއުމަން ރައިޓްސް ވޮޗާއި އެމްނެސްޓީ އިންޓަނޭޝަނަލް ފަދަ ބައިނަލްއަގުވާމީ އިންސާނީ ހައްގުތަކަށް މަސައްކަތްކުރާ ޖަމިއްޔާތަކުން ވަނީ މުޒާހަރާތަކުގައި ހައްޔަރުކުރި މީހުންގެ ހައްގުތައް ދެމެހެއްޓުމަށް ޕާކިސްތާނު ސަރުކާރަށް ގޮވާލާފައެވެ. އަދި އެ ފަރާތްތަކާ މެދު އިންސާފުވެރި ގޮތެއްގައި އަމަލުކޮށް، ގާނޫނީ މަރުހަލާގައި އެ މީހުންގެ ހައްގުތަކަށް އިހުތިރާމް ކޮށްދިނުމަށް އެ ފަރާތްތަކުން ވަނީ ސަރުކާރަށް ގޮވާލައިފައެވެ.
