މަތީތައުލީމަށް ސަރުކާރުން ދޫކުރާ ލޯނުގެ ހަރަދުގައި ޕައިލެޓް ކަން ކިޔަވަން 500 އެއްހާ ދަރިވަރުންނަށް މި އަހަރު ޖާގަ ދީފި އެވެ.
ރާއްޖެ އާއި ރާއްޖޭން ބޭރުގައި މަތީ ތައުލީމް ހާސިލްކުރުމަށް މިދިޔަ ފެބްރުއަރީ މަހު ހުޅުވާލި ލޯނުގެ 720 ފުރުސަތަށް 1،507 މީހުން ކުރިމަތިލި އެވެ. ނަމަވެސް ވީހާވެސް ގިނަ ދަރިވަރުންނަށް ފުރުސަތު ދިނުމަށްޓަލާ 1،225 ދަރިވަރުންނަށް ފުރުސަތުޑޭން ސަރުކާރުން ވަނީ ކަނޑައަޅާފައެވެ.
ރައީސް އޮފީހުގައި ބޭއްވި ނިއުސް ކޮންފަރެންސެއްގައި، ހަޔާ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވީ ޑިމާންޑު ބޮޑު ދާއިރާތަކަށް މި އަހަރު ހުޅުވައިލީ ލޯނުގެ އަދަދުތައް އިތުރުކުރުމަށް ފަހު ކަމަށެވެ.
ޕައިލެޓްކަން ކިޔަވަން ހުޅުވައިލި ޖާގަ ގިނަ ދަރިވަރުން ކުރިމަތިލިއިރު، އޭގެ ތެރެއިން ޝަރުތުހަމަވި 479 ދަރިވަރުންނަށް ފުރުސަތު ދޭން ވަނީ ނިންމައިފަ އެވެ. މިއީ، އެއް ދާއިރާއަކުން އެންމެ ގިނަ ދަރިވަރުންނަށް ޖާގަ ދިން ފަހަރެވެ.
މިނިސްޓަރު ވިދާޅުވިގޮތުގައި، ރިކޯޑް އަދަދެއްގެ ދަރިވަރުންނަށް ޕައިލެޓްކަން ކިޔަވަން ދިނުމަކީ އޭވިއޭޝަން އިންޑަސްޓްރީ އަށް އާދަޔާ ހިލާފު ހެޔޮ ބަދަލެއް އަންނާނެ ކަމެކެވެ. ކުރިއަށް އޮތް މުސްތަގުބަލުގައި އޭގެ ފައިދާތައް ކުރާނެ ކަމަށް ވެސް، މިނިސްޓަރު ވިދާޅުވިއެވެ.
ޕައިލެޓްކަމުގެ އިތުރުން މަތީ ތައުލީމުގެ ލޯނުގެ ތެރެއިން ދެން އެންމެ ޑިމާންޑު ބޮޑު ދާއިރަ އަކީ ޑޮކްޓަރުކަމެވެ. އެމްބީބީއެސް އަށް އެންމެ ފުރަތަމަ ކަނޑައެޅީ 55 ޖާގަ އެވެ. އެކަމަކު، ޝަރުތު ހަމަވި 133 ދަރިވަރަކަށް ކިޔަވަން ލޯނު ދީފައި ވެ އެވެ.
ލޯނު ލިބޭ ދަރިވަރުންގެ ވަގުތީ ލިސްޓު އާންމުކޮށް ހަޔާ އެޑިއުކޭޝަން މިނިސްޓްރީން ވަނީ އެ ލިސްޓަށް މި މަހުގެ 11 ވަނަ ދުވަހާ ހަމައަށް ޝަކުވާ ހުށަހަޅަން ހުޅުވާލައިފަ އެވެ. އެއަށް ފަހު މި މަހުގެ 22 ވަނަ ދުވަހު ދާއިމީ ލިސްޓު އާއްމުކުރާނެ އެވެ.
