ޔޫއެފާ ޗެމްޕިއަންސް ލީގުގެ ފައިނަލްގައި މިރޭ އިންޓަ މިލާނާ ދެކޮޅަށް މެންޗެސްޓާ ސިޓީ މިރޭ ނިކުންނާނެއެވެ.
މި ފޯރިގަދަ ފައިނަލް މެޗް ކުޅޭނީ މިރޭ 12 ޖަހާއިރު ތުރުކީގެ ވެރިރަށް އިސްތަންބޫލްގައެވެ. މި މެޗާ ބެހޭގޮތުން މި ސީޒަންގައި ސިޓީއަށް އެންމެ ގިނަ ގޯލްޖަހައިދިން ހާލަންޑް ބުނީ މެޗްގެ ޕްރެޝަރު އިހުސާސް ކުރެވުނަސް، އަމިއްލަ ނަފްސާއި ޓީމާމެދު އިތުބާރު އެބައޮތް ކަމަށެވެ. މި ސީޒަންގައި އޭނާ ވަނީ 52 ލަނޑު ޖަހައިފަ އެވެ. މި މެޗް ކާމިޔާބުކޮށްގެން މި ސީޒަންގައި ސިޓީއަށް 3 ތަށި ކާމިޔާބުކުރެވޭނެއެވެ. ސިޓީން ވަނީ މި ސީޒަންގައި އިނގިރޭސި ޕްރިމިއާ ލީގާއި އެފްއޭ ކަޕް ކާމިޔާބުކޮށްފަ އެވެ.
"އަހަރެން ހާހެއްނުވޭ. އަހަރެން ކުރިން ހިޔެއް ނުކުރަން މިހާ ގިނަ ލަނޑު ޖެހޭނެ ކަމަށް. އެކަމަކު، ޖުމްލަކޮށް ބަލާއިރު މިއަށް ވުރެ ގިނައިން ލަނޑު ޖެހުނީސް. ވަރަށް ގިނަ ފުރުސަތުތައް ގެއްލިގެންވެސް ދިޔަ." ހާލަންޑް ބުންޏެވެ.
މީގެ ކުރިން ސިޓީއަށް ޗެމްޕިއަންސް ލީގު ކާބިޔާބުކުރެވިފައެއް ނުވެއެވެ. ސިޓީގެ އެންމެ ބޮޑު އަމާޒަކީ ޗެމްޕިއަންސް ލީގު ކާމިޔާބުކުރުމެވެ. ހާލަންޑް ބުނީ އޭނާގެ ފުރަތަމަ ސީޒަންގައި ސިޓީ އަށް ޗެމްޕިއަންސް ލީގު ކާމިޔާބު ކުރެވިއްޖެނަމަ، އެއީ ސިޓީ އާއި އޭނާގެ އަމިއްލަ ކެރިއަރަށް ވެސް ލިބޭނެ ބޮޑު ކާމިޔާބެއް ކަމަށެވެ.
"ޕްރެޝަރު އިހުސާސްކުރެވޭ. ޕްރެޝަރެއް ނެތޭ ބުނެފިނަމަ އެ ވާނީ ދޮގަކަށް. މި ނުކުންނަނީ މި ކްލަބަށް ކުރިން ނުވެ އޮތް ކަމެއް ހާސިލްކުރަން. އަހަންނަށް ކުރެވެން އޮތް ހުރިހާ މަސައްކަތެެއް ކުރާނަން މިއެކަން ހާސިލްކުރުމަށް،" ހާލަންޑް ބުންޏެވެ.
