ސްވިޑެންގެ ސްޓޮކްހޯމްގެ މައި މިސްކިތުގެ ބޭރުގައި ހގުރުއާންގެ މުސްއަފެއްގައި ރޯކޮށްލި މައްސަލަ ސްވިޑަން ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.
އެމީހުން ވަނީ އެއީ "އިސްލާމް ދީނަށް ފުރައްސާރަކުރާ" އަމަލެއްގެ ގޮތުގައި ލޭބަލްކޮށްފައެވެ. މިކަން ކުށްވެރިކޮށްފައި މިވަނީ މުސްލިމުންގެ މާތް ވެގެންވާ ފޮތަށް ފުރައްސާރަކުރުން ހުއްޓުވުމަށް ބައިނަލްއަގްވާމީ އިސްލާމީ ޖަމިއްޔާއަކުން ފިޔަވަޅު އެޅުމަށް ގޮވާލާފައި ވަނިކޮށެވެ.
ސްވިޑެންގެ ހާރިޖީ ވުޒާރާއިން އާދީއްތަ ދުވަހު ނެރުނު ބަޔާނެއްގައި ބުނީ ވަކި ވަކި ފަރުދުން ހިންގާ އިސްލާމްދީނަށް ފުރައްސާރަކުރާ އަމަލުތަކަކީ މުސްލިމުންނަށް ވަރަށް ބޮޑަށް އިހާނެތިކޮށް ހިތުމަށް މަގުފަހިވާ ކަމެއް ކަމަށެވެ. ސަރުކާރުން ގެންދަނީ ހާލަތުގެ ސީރިއަސްކަން ގަބޫލުކޮށް ދީނީ ގޮތުން އެއްވެސް ބާވަތެއްގެ ތަފާތުކުރުމެއް ނުވަތަ އިހާނެތިކަމެއް ކުރާނަމަ އެކަން ކުށްވެރިކުރަމުން ކަމަށްވެސް މިނިސްޓްރީން ބުންޏެވެ.
"އަދި މި އަމަލުތައް ހަރުކަށި އިބާރާތުން ކުށްވެރިކުރަން އެއީ އެއްވެސް ގޮތަކުން ސްވިޑަން ސަރުކާރުގެ ވިސްނުން ދައްކުވައިދޭ ކަމެއް ނޫން" ބަޔާނުގައި ބުންޏެވެ.
މިފަދަ ކަންކަމަށް ޖާގާއެއް ނުދޭނަން
އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އިން ވަނީ ކުރިއަށް އޮތް ތަނުގައި ގުރުއާނަށް ފުރައްސާރަ ކުރުމުގެ ހާދިސާތައް ހުއްޓުވުމަށް އެ ޖަމިއްޔާގެ މެމްބަރު ގައުމުތަކުން އެއްބައިވަންތަކަމާއި އެންމެން ގުޅިގެން ފިޔަވަޅު އެޅުމަށް ގޮވާލާފައެވެ.
ގުރއާން އަންދާލި ހާދިސާއާ ގުޅިގެން ސްވިޑެންގެ ހާރިޖީ ވުޒާރާއިން ވަނީ، ސްވިޑަންގައި ނުވަތަ ޔޫރަޕްގައި ނަސްލީ ތަފާތުކުރުމާއި، ޒެނޯފޯބިއާ އަދި އިންޓޮލަރެންސްގެ އިބާރާތްތަކަށް ޖާގައެއް ނޯންނާނެކަމަށް ބުނެފައެވެ.
ނަމަވެސް ސްވިޑަންގެ ގާނޫނު އަސާސީގެ ދަށުން އެއްވެ އުޅުމާއި ހިޔާލު ފާޅުކުރުމާއި މުޒާހަރާ ކުރުމުގެ މިނިވަންކަން ހިމާޔަތްކޮށްފައިވާކަން ވެސް އެ މިނިސްޓްރީން ވަނީ ފާހަގަކޮށްފައެވެ.
ގުރުއާން އެންދުމާއި ދެކޮޅަށް އިރާގު، ކުވައިތު، ޔުނައިޓެޑް އަރަބް އެމިރޭޓްސް އަދި މޮރޮކޯ ފަދަ ގިނަ ގައުމުތަކަކުން ވަނީ ސްވިޑެންގެ ސަފީރުން ހާޒިރުކޮށް ސުވާލުކޮށްފައެވެ.
ސްވިޑެންގެ ފުލުހުން އެންމެ ފުރަތަމަ އަލިފާން ރޯކޮށްލި މީހާއަށް ހުއްދަ ދިން ނަމަވެސް ފަހުން ވަނީ އޭނާގެ މައްސަލަ ބަލަން ފަށައިފައެވެ. މައްސަލަ ބަލަން ފެށީ ގުރުއާން އކީ މިސްކިތަކާއި ވަރަށް ކައިރީގައި ހިނގި ކަމެއް ކަމުން އެ އަމަލުގެ ސަބަބުން ނުކުންނާނެ ނަތީޖާއާ މެދު ކަންބޮޑުވުން އުފެދޭތީއެވެ.
