މިނިވަން ދުވަހުގެ ރަސްމީ ޖަލްސާގައި، އިއްޔެ ރައީސުލްޖުމްހޫރިއްޔާ ދެއްވި ޤުރުއާން ހިތުދަސްކޮށް އެއްވަނަ ދަރަޖައިގައި ފާސްވެ ރައީސުލްޖުމްޙޫރިއްޔާ ދެއްވާ ހާއްސަ މެޑަލް ލިބިވަޑައިގެންނެވި ދިހަ ފަރާތުގެ ތެރޭގައި ހިމެނުނު މި ހަ ދަރިވަރަންނަކީ ހަމަ ޔަގީނުން ވެސް އެހެން ދަރިވަރުންނަށް ހުރި ނަމޫނާ އެވެެ.
ސްކޫލުގައި ތައުލީމު ހާސިލު ކުރަމުން އެހާ ޅައުމުރުގައި ކީރިތި ގުރުއާނުގެ ހުރިޔާ އާޔަތެއް ހިތުން ދަސްކުރުމަކީ ފަސޭހަ ކަމަކަށް ނުވާނެ އެވެ. ނަމަވެސް މިދަރިވަރުން ވަނީ އެކަމަކީ ކޮންމެ ކުއްޖަަކަށް ވެސް ކުރެވިދާނެ ކަމެއްކަން ސާބިތުކޮށް، މިއަދު މެޑަލް ހޯދާފައެވެ.
އަލްޙާފިޒާ އާއިޝަތު އާން ރަޝީދު, މ. ޝޭޑީރީޖަން
ކީރިތި ޤުރްއާން ހިތުދަސްކުރުމުގެ ޝައުޤުވެރިކަން ވަރަށް ޅަފަތުއްސުރެ އުފެދިފައި ވެއެވެ. އޭރު ޤުރްއާން ކިކިޔެވީ އައްޑުއަތޮޅު ހިތަދޫގައި ހިންގާ އައިއާރު ޤުރްއާން ކުލާހުގައެވެ. ކީރިތި ޤުރްއާން ހިތުދަސްކުރީ، ދުވާލަކު ސަފްހާއެއް ދަސްކުކޮށްގެނެވެ. ސްކޫލުން ކިޔެވުން ނިންމެވުމަށްފަހު، ގިނަ ހުސްވަގުތުތައް ހޭދަކުރީ، ކީރިތި ޤުރްއާން ހިތުދަސްކުކުރުމުގައި ކަމަށް އާންގެ ތައާރަފްގައި ބުނެފައިވެއެވެ. 2022 ވަނަ އަހަރު މާލެއަށް ބަދަލުވެ، ކީރިތި ޤުރްއާނާބެހޭ ގައުމީ މަރުކަޒުގެ ހިފްޡު ކުލާހުގައި ބައިވެރިވި އެވެ. އިމްތިހާން ނިންމާ ހާފިޒް ކަމުގެ ސަނަދު ހާސިލުކުރެއްވީ 1 މޭ 2023 ގައެވެ.
އަލްހާފިޒް ޝައަފް ހާމިދު އިބްރާހީމް، މަލާޒް ޅ. ނައިފަރު
ކީރިތި ޤުރްއާން ހިތުދަސްކުރުމަށް ޝައުގުވެރިވެ، ހިތުދަސްކުރަން ފެށީ، އުމުރުން އެންމެ ތިން އަހަރުގައެވެ. އޭރު ކިޔަވަމުން ގެންދިޔައީ، ޝައަފްގެ ލޮބުވެތި މަންމަގެ އަޑުދަށުންނެވެ. އަދި އޯޑިއޯގެ ޒަރީއާއިން ޤުރްއާން އަޑުއަހަމުންނެވެ. ތިން އަހަރު ފުރުނުއިރު، އައްމާ ފޮތް އެކީގައި ހިތުދަސްކޮށް، އުމުރުން 9 އަހަރުގައި، ކީރިތި ޤުރްއާނާބެހޭ ގައުމީ މަރުކަޒުގެ ހިފްޒު ކުލާހުގައި ބައިވެރިވިއިރު، 7 ފޮތް ހިތުދަސްކުރެވިފައި ވެއެވެ. ކީރިތި ގުރްއާން އެކީގައި ހިތުދަސްކޮށް ނިމުނީ 2021 ވަނަ އަހަރުއެވެ. އަދި 2022 ވަނަ އަހަރު، މަރުކަޒުގެ މުރާޖައާ ކުލާހަށް ބަދަލުވެ، ދެފަހަރު މުރާޖައާކޮށް، 2023 ޖަނަވަރީ މަހު، ކީރިތި ގުރްއާނާބެހޭ ގާއުމީ މަރުކަޒުގެ ހިފްޡު ކޮމިޓީއަށް ކިޔައިދިނެވެ. ހާފިޒް ކަމުގެ ސަނަދު ހާސިލުކުރީ، އުމުރުން އެންމެ 12 އަހަރުގައި، 2023 ފެބުރުވަރީ މަހުގެ 2 ވަނަ ދުވަހުއެވެ .
އަލްހާފިޒް އަބާން އިބްރާހީމް، ހ. ލަކީލޮޖްހުޅަނގުބައި
ކީރިތި ޤުރްއާން ހިތުދަސްކުރުމުގެ ޝައުގުވެރިކަން އުފެދުނީ، އުމުރުން ތިން އަހަރުން ފެށިގެން، ގުރްއާން އަޑުއަހަމުން ގެންދިޔުމުގެ ސަބަބުންނެވެ. އަރަބިއްޔާ ސްކޫލްގެ ގްރޭޑް 1 ގައި ތައުލީމު ހާސިލުކުރަން ފެށި ހިސާބުން ފެށިގެން ކޮންމެ އަހަރަކުވެސް، ޤުރްއާނުގެ މުގައްރަރުގައި ހިމެނޭ ބައިތައް ހިތުދަސްކުރަމުން ގެންދިޔައެވެ. ކީރިތި ގުރްއާނާބެހޭ ގައުމީ މަރުކަޒުގެ ހިފްޡު ކުލާހުގައި ބައިވެރިވުމުގެ ފުރުސަތު ލިބުމާއެކު، ޤުރްއާން ހިތުދަސްކުރަމުން ގެންދިޔައީ، އެ ކުލާހުގައެވެ. މުޅި ޤުރްއާން އެކީގައި ހިތުދަސްކޮށް ނިމުނީ، 2021 ވަނަ އަހަރުގެ ފެބުރުވަރީ މަހުގެ 6 ވަނަ ދުވަހުއެވެ. އަދި ކީރިތި ޤުރްއާނާބެހޭ ގައުމީ މަރުކަޒުގެ ހިފްޡު ކޮމިޓީއަށް ކިޔައިދީ ނިންމައި، ހާފިޒް ކަމުގެ ސަނަދު ހާސިލުކުރީ، އަބާންގެ އުމުރުން 14 އަހަރުގައި 2023 ފެބުރުވަރީ މަހުގެ 20 ވަނަ ދުވަހުއެވެ.
އަލްހާފިޒް އަހްމަދު ރާއިއު ބަޝީރު، ފުނާޑު. ރަޔަން ޏ. ފުވައްމުލައް
ޒިކުރާ އިންޓަނޭޝަނަލް ކޮލެޖުން ހިންގަމުން ގެންދާ ޤުރްއާން ހިތުދަސްކޮށްދޭ ކުލާހުގެ މުދައްރިސެއް ކަމުގައިވާ ރާއިއުގެ ބޮޑުބޭބެ އަލީ ވަސީމްގެ އެދިލެއްވުމަކަށް، އެ ކުލާހުގައި ބައިވެރިވެ، ޤުރްއާން ހިތުދަސްކުރަން ފެށީ، 4 ސެޕްޓެންބަރު 2018 ގައެވެ. އޭރު ރާއިއު ގެންދިޔައީ، ޙާފިޡް އަހްމަދު ސްކޫލްގެ ގްރޭޑް 5 ގައި ތައުލީމު ހާސިލުކުރަމުންނެވެ. ކީރިތި ޤުރްއާން އެކީގައި ހިތުދަސްކޮށް ނިމުނީ، 2022 ވަނަ އަހަރުގެ ޖުލައި މަހުއެވެ. އެއަށްފަހު، މުޅި ޤުރްއާން އެކީގައި ޙިފްޡު ކުލާހުގައި ދެފަހަރު މުރާޖައާ ކުރުމަށްފަހު، ޙިފްޡު އިމްތިހާނު ފެށީ، 11 ފެބުރުވަރީ 2023 ގައެވެ. ކީރިތި ޤުރްއާން ހިތުދަސްކޮށް ހާފިޒް ކަމުގެ ސަނަދު ހާސިލުކުރީ، އުމުރުން 14 އަހަރުގައި 1 މާރިޗު 2023 ގައެވެ. ކީރިތި ޤުރްއާން ހިތުދަސް ކުއްޖަކަށް ރާއިޢުވުމަކީ ކާފަގެ ވަސިއްޔަތެއްކަމަށް ތައާރަފް ގައި ބުނެފައިވެއެވެ.
އަލްހާފިޒް އިސްމާއީލް އިޒްއާން އިބްރާހީމް، ހުޅުމާލެ. ފްލެޓް 02-ޖީ- 141
ކީރިތި ޤުރްއާން ހިތުދަސްކުރުމުގެ ޝައުޤުވެރިކަން އުފެދުނީ، އިޒުއާންގެ ބޭބެ ޤުރްއާން ހިތުދަސްކުރަން ފެށި ހިސާބުން، އުމުރުން އެންމެ 8 އަހަރުގައެވެ. ޤުރްއާން ހިތުދަސްކުރަން ފުރަތަމަ ފެށީ މަންމައާއެކުގައި ގޭގައެވެ. ކީރިތި ޤުރްއާނާބެހޭ ގައުމީ މަރުކަޒުގެ ހިފްޡު ކުލާހުގައި ބައިވެރިވެ، ކިޔަވަން ފެށީ 2019 ވަނަ އަހަރުއެވެ. އަދި ސްކޫލްގައި ހޭދަވާ ވަގުތު ފިޔަވައި، ގޭގައި އުޅޭ ގިނަ ވަގުތުތަކުގައި ޤުރްއާން މުރާޖަޢާ ކުރަމުން ގެންދިޔައެވެ. ނަމަވެސް، އިތުރު އެހީތެރިކަމަށް ބޭނުންވާތީ، ކީރިތި ޤުރްއާނާބެހޭ ގައުމީ މަރުކަޒުގެ ބައެއް މުދައްރިސުންގެ އެހީތެރިކަން މިކަމުގައި ވަރަށް ބޮޑަށް ލިބިގެންދިޔައެވެ. އެ މަރުކަޒުގެ މުރާޖައާ ކުލާހުގައި ބައިވެރިވުމުގެ ފުރުސަތު ލިބުނީ 2022 ވަނަ އަހަރުގެ ނޮވެންބަރު މަހުއެވެ. ކީރިތި ޤުރްއާން ހިތުދަސްކޮށް، ހާފިޒް ކަމުގެ ސަނަދު ހާސިލުކުރީ، އިޒުއާންގެ އުމުރުން އެންމެ 13 އަހަރުގައި 20 މޭ 2023 ގައެވެ.
އަލްހާފިޒް މިބުސާމް ސަލްމާން، ހެވަންލީޑް ގދ. ތިނަދޫ
ކީރިތި ޤުރްއާން ހިތުދަސްކުރަން ފެށީ، ބައްޕަ ދެއްވި ހިތްވަރާއި އިރުޝާދުގެ ދަށުން، އުމުރުން އެންމެ 6 އަހަރުގައި، މަންމައާއި ދައްތަގެ އެހީތެރިކަމާ އެކުގައިކަމަށް އިބުސާމުގެ ތައާރަފްގައި ބުނެފައިވެއެވެ. ކީރިތި ޤުރްއާން ހިތުދަސްކުރުމަށް ވަކި ވަގުތެއް ކަނޑައަޅައިފައި ނެތްކަމަށްވިޔަސް، ހިތުދަސްކުރަމުން ގެންދިޔައީ، ދަސްކުރާހިތްވާ ގަޑީގައި، އެ ދުވަހަކު ދަސްކުރެވޭނެ އެންމެގިނަ މިންވަރެއް ދަސްކުރަމުންނެވެ. ކީރިތި ޤުރްއާން އެކީގައި ހިތުދަސްކޮށް ނިމުނީ، 2020 ވަނަ އަހަރުގެ ޖުލައި މަހުގެ 24 ވަނަ ދުވަހުއެވެ. ޤުރްއާން މުރާޖައާކޮށް ނިމުނީ 2 އަހަރާ 8 މަސްދުވަހުންނެވެ. ޤުރްއާން ހިތުދަސްކުރުމުގެ ފުރުސަތު، ބައްޕަގެ އެހީތެރިކަމާއެކުގައިޢާއިލާގެ ފަރާތުން އެކަމަށް ލިބުނު ބޮޑު އެހީތެރިކަން މިބުސާމް ފާހަގަކުރެއެވެ. އުމުރުން އެންމެ 14 އަހަރުގައި ކީރިތި ޤުރްއާން ހިތުދަސްކޮށް، ހާފިޒް ކަމުގެ ސަނަދު ހާސިލުކުރީ، 23 މޭ 2023 ގައެވެ.
