ފަޅުރަށްތައް އަތޮޅުތަކުގެ ކައުންސިލްތަކަށް ލިބޭގޮތަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ހެއްދެވުމުގެ ފުރިހަމަ ބޭނުން ހުރިހާ ކައުންސިލަކުންވެސް ހިފާނޭކަމަށް މިނިސްޓަރ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް މިނިސްޓަރު އާދަމް ޝަރީފް ވިދާޅުވެއްޖެއެވެ.
ސަރުކާރުން ވަނީ ކައުންސިލްގެ އިހުތިސާސްގެ ދަށުގައި ނެތް ފަޅުރަށްތައްވެސް ލިބޭގޮތަށް ގަވާއިދު އިސްލާހުކޮށް ގެޒެޓްކޮށްފައެވެ. އަލަށް އެކުލަވާލި ގަވާއިދުގައި ވާގޮތުން ކައުންސިލްގެ އިހުތިސާސްގެ ދަށުގައިނެތް ރަށްރަށުންވެސް މަސްވެރިކަމާއި ދަނޑުވެރިކަމުގެ މަސައްކަތްތަކަށް ފިޔަވައި އިގްތިސާދީ އެހެން ބޭނުންތަކަށް ދޫކުރެވިދާނެއެވެ.
މިކަމާއި ގުޅޭގޮތުން އެކްސްގައި ކުރެއްވި ޕޯސްޓެއްގައި އާދަން ޝަރީފް ވިދާޅުވީ، ކައުންސިލްތައް މާލީގޮތުން ގާބިލްވުމަށާއި، ރައްޔިތުންގެ ލާބައަށް މި ފުރުސަތުގެ ބޭނުން އެންމެ ރަނގަޅުގޮތުގައި ހިފާނޭކަމަށް އުއްމީދު ކުރާކަމަށެވެ.
Falhu rahthah council thakah libeygothah RJ @MMuizzu hedhdhevumuge furihama beynun hurihaa council thakun hifaanekan yageen. Adhi, council thah maalee gothun baaruverikoh, rayyithunnah faidhaa kuraane gothakah hurihaa council thakun mi aguhuri furusathuge beynun hifaanekamah… pic.twitter.com/KN25rYmvmS
— Adam Shareef Umar (@Adamshareefz) January 18, 2024
ކައުންސިލް އިހުތިސާސުން ބޭރުގައި ހުންނަ ރަށްތައް ދޫކުރުމުގެ ކަންކަން ކަނޑައަޅާނީ ރައީސުލްޖުމްހޫރިއްޔާއެވެ. ގަވައިދުގައި ބުނެފައިވާގޮތުން ކައުންސިލަކުން އިހުތިސާސުން ބޭރުގައި އޮންނަ ރަށަކަށް އެދޭނަމަ ޕްރޮޕޯސަލް ހުށަހަޅަން ޖެހެއެވެ. އެގޮތުން ކައުންސިލަށް ދިހަ އަހަރަށް ރަށް ދޫކުރާއިރު، ކައުންސިލްތަކަށް ދޫކުރާ ރަށްރަށުގައި ކުރެވޭނޭ މަސައްކަތްތައް ވަނީ އެ ގަވައިދުގައި ކަނޑައަޅާފައެވެ.
މީގެ ތެރޭގައި ގަސްހެއްދުމާއި، ކުކުޅާއި ގެރިބަކަރި އަދި ދޫނި ގެންގުޅުމާއި، އެކުއާކަލްޗާ މަސައްކަތްތަކާއި، ފައިބަރާއި ވަޑާމާއި އެޅިގަލުގެ މަސައްކަތާއި ވޯކްޝޮޕްތަކުގެ އިތުރުން އޮޑިދޯނިފަހަރު ބަނުމުގެ މަސައްކަތް ހިމެނެއެވެ.
