ވިލިމާލެ ކައިރި ދެ ލޯންޗެއް ޖެހި ހިނގި ނުރައްކާޓެރި އެކްސިޑެންޓުގައި ގިނަ އަދަދެއްގެ ބަޔަކަށް ވިލިމާލޭ ހޮސްޕިޓަލަށް ގެންގޮސް ފަރުވާދޭން ފަށައިފިއެވެ.
ވިލިމާލޭ ވޯޓާސްޕޯޓް އާ ދިމާލުން ކަނޑުމަތީގައި މި ހާދިސާ ހިނގާފައިވަނީ މިރޭ ގާތްގަނޑަކަށް އަށެއްޖަހަން އުޅެނިކޮށްކަމަށް ފުލުހުން ބުނެއެވެ.
މި އެކްސިޑެންޓާ ބެހޭގޮތުން އެ ސަރަހައްދުގައި ހުރި މީހަކު މިނިވަންއަށް މައުލޫމާތު ދެމުން ބުނީ މި ހާދިސާގައި ވަރަށްބޮޑަށް އަނިޔާވި 13 މީހަކު ވިލިމާލޭ ހޮސްޕިޓަލަށް ގެނެސްފައިވާކަމަށެވެ. މައުލޫމާތު ލިބޭ ގޮތުގައި ބައެއް މީހުންނަށް ލިބުނު އަނިޔާ ސީރިއަސްވުމުގެ ސަބަބުން ވަނީ އައިޖީއެމްއެޗަށް ގެންގޮސްފައެވެ.
އަނިޔާވި މީހުންގެ ތެރޭގައި އެފްކޮންސް އަށް ނިސްބަތްވާ 10 މުއައްޒަފަކާއި އަނަންތަރާ ލޯންޗުގައި ތިބި ތިން މީހަކު ހިމެނެއެވެ.
މި އެކްސިޑެންޓުގައި އެއް ލޯންޗުގެ ބިއްލޫރިތައް ތަޅައިގެން ގޮސްފައިވާއިރު، އަނެއް ލޯންޗް އަދިވެސް އޮތީ އެކްސިޑެންޓްވި ސަރަހައްދުގައެވެ.
ދެ ލޯންޗް ޖެހި އެކްސިޑެންޓް ވީ ކީއްވެގެންކަން އަދި މިހާތަނަށް އެނގިފައިނުވާއިރު، މެރިން ފުލުހުން ދަނީ އެ ސަރަހައްދުގައި ހަރަކާތްތެރިވަމުންނެވެ.
