ދީނާއި ގައުމަށް ވަފާތެރިވާނެ ކަމަށް ގަބޫލުކުރެވޭ ކެންޑިޑޭޓުންނަށް ވޯޓު ދެއްވުމަށް ކުރީގެ ރައީސް މައުމޫން އަބްދުލްޤައްޔޫމް އިލްތިމާސްކުރައްވައިފިއެވެ.
އެކަމާ ގުޅިގެން ރައީސް މައުމޫން "އެކްސް" ގައި ކުރެއްވި ޕޯސްޓެއްގައި ވިދާޅުވީ މާދަމާ ރައްޔިތުންގެ މަޖިލީހުގެ އިންތިހާބުގައި ވޯޓުލައްވާއިރު ރަނގަޅަށް ވިސްނަވާފައި ދީނާއި ޤައުމަށް ވަފާތެރިވާނެކަމަށް ޤަބޫލުކުރެއްވޭ ކެންޑިޑޭޓުންނަށް ވޯޓުލެއްވުމަށް އިހްލާސްތެރިކަމާއެކު އިލްތިމާސް ކުރައްވާ ކަމަށެވެ.
މާދަމާ ބާއްވާ އިންތިހާބުގެ ވޯޓުލުން ކުރިއަށްދާނީ ހެނދުނު 08:00 އިން ހަވީރު 05:30 އާ ހަމައަށެވެ. ނަމަވެސް އިންތިހާބަށް ކެމްޕޭން ކުރުމުގެ ފަހު ވަގުތަކީ މިއަދު އިރުއޮށްސި 06:00 އެވެ.
މާދަމާ ރައްޔިތުންގެ މަޖިލީހުގެ އިންތިޚާބުގައި ވޯޓުލައްވާއިރު ރަނގަޅަށްވިސްނަވާފައި ދީނާއިޤައުމަށް ވަފާތެރިވާނެކަމަށް ޤަބޫލުކުރެއްވޭ ކޭންޑިޑޭޓުންނަށް ވޯޓުލެއްވުމަށް އިޚްލާޞްތެރިކަމާއެކު އިލްތިމާސްކުރަން.
— Maumoon Abdul Gayoom (@maumoonagayoom) April 20, 2024
20 ވަނަ މަޖިލިސް އިންތިހާބުގެ 93 ދާއިރާއަކަށް 368 ކެންޑިޑޭޓުން ވާދަކުރާއިރު، އޭގެ ތެރޭގައި ގިނައީ އަމިއްލަ ގޮތުން ވާދަކުރާ ކެންޑިޑޭޓުންނެވެ. ނަމަވެސް ކެމްޕޭން އެންމެ ފޯރީގައި ޖައްސަމުންދަނީ އެންމެ ބޮޑެތި ޕާޓީތަކުގެ ކެންޑިޑޭޓުންގެ މެދުގައިކަން ފާހަގަކުރެވެއެވެ.
މި އިންތިހާބުގައި 284،663 މީހަކަށް ވޯޓްލުމުގެ ހައްގު ލިބިފައިވާއިރު، ޖުމްލަ 602 ވޯޓުފޮށި ބަހައްޓައެވެ. އެއީ މާލެ ސަރަހައްދުގައި 241 ވޯޓު ފޮށި ބަހައްޓާއިރު، މާލޭގައި 181 ފޮށި، ހުޅުމާލޭގައި 51 ފޮށި އަދި ވިލިމާލޭގައި 9 ވޯޓު ފޮށްޓެވެ. އަދި އަތޮޅު ތަކުގައި 319 ވޯޓު ފޮށި ބަހައްޓާއިރު، ރާއްޖޭން ބޭރުގެ 3 ގައުމެއްގައި ވޯޓު ފޮށި، ރިސޯޓުތަކުގައި 34 ވޯޓު ފޮށި އަދި ޖަލުތަކުގައި 5 ވޯޓު ފޮށި ބެހެއްޓުމަށް ވެސް ވަނީ ނިންމާފައެވެ.
