މެދުފުށި އައިލެންޑް ރިސޯޓަށް ދަނިކޮށް ގެއްލުނު ދޯނި ހޯދައި، ވ.ރަކީދޫއަށް މިއަދު ބަނދަރުކޮށްފައިވާކަމަށް ޤައުމީ ދިފާއީ ބާރުން ބުނެފިއެވެ.
“AAA-37” ނަމަކަށް ކިޔާ މުދާ އުފުލާ މި އުޅަނދު ގެއްލިފައިވަނީ، މިދިޔަ ހުކުރުދުވަހު ތިލަފުށިން ފުރައިގެން މެދުފުށި އައިލެންޑް ރިސޯޓަށް ދަތުރުކުރަނިކޮށެވެ.
އެމްއެންޑީއެފުން ބުނީ މި ދޯނި ފެނިފައިވަނީ، މިއަދު ހެނދުނު 10:19 ހާއިރު ކަމަށެވެ. ދޯނި ފެނުނުއިރު، އޭގައި ތިބި ހަތަރު ފަޅުވެރިން ތިބީ ގަދަވެ ސަލާމަތުންނެވެ. އެ ދޯނިން ދަތުރުކުރީ ތިން ބިދޭސީންނާއި ދިވެއްސެކެވެ.
މިދިޔަ ހުކުރު ދުވަހުގެ ހެނދުނު 06:00 ހާއިރު ކ.ތިލަފުށިން ފުރި އެ ދޯނީގެ ޚަބަރެއް ނުވެގެން، އެކަމުގެ މަޢުލޫމާތު އެމްއެންޑީއެފް ކޯސްޓްގާޑު މެރިޓައިމް ރެސްކިޔު ކޯޑިނޭޝަން ސެންޓަރ (އެމްއާރުސީސީ) އަށް ލިބިފައިވަނީ އެ ދުވަހުގެ 17:20 ހާއިރެވެ. ދޯނުި ގެއްލުނު ދުވަހަކީ މޫސުން ވަރަށް ގޯސް ދުވަހެކެވެ.
އެމްއެންޑިއެފުން ބުނީ އެ ދޯނި ގެއްލިގެން ހޯދުމަށް ކުރެވުނު މަސައްކަތުގައި ކަނޑުމަގުން 2461 އަކަ ނޯޓިކަލް މޭލު ސަރަހައްދެއް ބެލިފައިވެއެވެ. އަދި ވައިގެމަގުން 6954 އަކަ ނޯޓިކަލް މޭލު ސަރަހައްދެއް ބެލިފައިވެއެވެ. މި ހާދިސާގައި ކަނޑާއި ވައިގެ މަގުން ޖުމުލަ 9415 އަކަ ނޯޓިކަލް މޭލު ސަރަހައްދެއް ވަނީ ބެލިފައެވެ.
އެމްއެންޑީއެފް ކޯސްޓްގާޑު ޝިޕް ޝަހީދު ޢަލީ ވަނީ، އެ ދޯނި ދަތުރުކުރަމުން އައި ސަރަހައްދަށް ގޮސް، އެ ދޯނީގެ ފަޅުވެރިންނާ ބައްދަލުކޮށްފައެވެ. އެ ދޯނި މިހާރު އޮތީ ވ.ރަކީދޫ ބަނދަރުގައެވެ. އަދި އެމްއެންޑީއެފް ކޯސްޓްގާޑުން ގެންދަނީ އެ ދޯންޏަށް ފޯރުކޮށްދޭންޖެހޭ އެހީތެރިކަން ފޯރުކޮށްދެމުންނެވެ.
މިދުވަސްވަރަކީ ހުޅަނގު މޫސުމުގެ މޫސުން އެންމެ ގޯސް ދުވަސްވަރުކަމުން ކަނޑުދަތުރުކުރާ ފަރާތްތަކުން މޫސުމަށް ބެލުމަށްފަހު ދަތުރު ފެށުމަށް ކަމާބެހޭ އިދާރާތަކުން ދަނީ އިލްތިމާސްކުރަމުންނެވެ.
ކިޔުންތެރިންގެ ޚިޔާލުތައް
މޮޅެތި ހަބަރު ލިޔާ އަރު' އެ ދޯނި ގެއްލުނު ގޮތް ލިޔަން ވެއްޖެ ނުން
އަބަދުވެސް ކޮށްމެވެސް އެއްޗެއް ގެއްލިގެން އުޅޭވާހަކަ ނޫސްތަކުގެ ފަލަސުރުހީގާާ އެބަލިޔެވޭ އެކަމަކު ފެނުނީމާ ފެނުނީ ކިހިނެއްކަން އަދި ވީގޮތެއްވެސް ކިޔާނުދެވޭ