ރައީސް ޑރ. މުހައްމަދު މުއިއްޒުގެ ވައުދުފުޅާއި އެއްގޮތަށް ރާއްޖޭގައި ފަސް މިލިއަން ގަސް އިންދުމުގެ ޕްރޮގްރާމް މިއަދު އެމަނިކުފާނު ފައްޓަވާދެއްވައިފިއެވެ.
ދުނިޔޭގެ ތިމާވެށީގެ ދުވަސް ފާހަގަކުރުމަށް ބާއްވަމުންގެންދާ ހާއްސަ ހަރަކާތްތަކުގެ ތެރެއިން މިއަދު ހެނދުނު މި ޕްރޮގްރާމް ފައްޓަވާ ދެއްވީ ރައީސް ޑރ. މުއިއްޒާއި އެމަނިކުފާނުގެ އަނބިކަނބަލުން ސާޖިދާ މުހައްމަދެވެ.
ލޮނުޒިޔާރަތް ޕާކުގައި ކުރިއަށްދިޔަ މި ޕްރޮގްރާމްގެ ތެރެއިން އެކަމަށް ހާއްސަ ލޯގޯވެސް ވަނީ އިފްތިތާހްކޮށްދެއްވާފައެވެ.
ރައީސް އޮފީހުން ބުނީ މި ޕްރޮގްރާމުން ދައްކުވައިދޭނީ ރާއްޖޭގެ ނާޒުކު ތިމާވެށީގެ ނިޒާމުތައް ހިމާޔަތްކުރުމަށާއި، މޫސުމަށް އަންނަ ބަދަލުތަކުގެ ސަބަބުން މިހާރުގެ ޖީލުތަކާއި، އަންނަން އޮތް ޖީލުތަކުގެ ލާބައާއި މަންފާއަށްޓަކައި މޫސުމަށް އަންނަ ބަދަލުތަކުންކުރާ ނޭދެވޭ އަސަރުތަކުން އަރައިގަތުމަށް ސަރުކާރުން ކުރަމުންގެންދާ މަސައްކަތް ކަމަށެވެ.
މި ރަސްމިއްޔާތުގައި ރައީސްގެ ދެކަނބަލުންގެ އަރިހުގައި ނައިބުގެ ދެކަނބަލުންނާއި، ރައްޔިތުންގެ މަޖިލީހުގެ ރައީސްގެ އިތުރުން ސަރުކާރުގެ ވަޒީރުންނާއި، ދައުލަތުގެ އިސް ވެރިން ބައިވެރިވެވަޑައިގެންނެވިއެވެ.
އެގޮތުން، މިއަދުގެ ރަސްމިއްޔާތުގައި ވާހަކަފުޅު ދައްކަވަމުން މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވަޒީރު ތޯރިގް އިބްރާހިމް ވިދާޅުވީ، މި ޕްރޮގްރާމްގައި މަސައްކަތް ކުރާނީ ރާއްޖޭގައި މިވަގުތު މަދުވެފައިވާ ގަސްތައް ހޯދާ އެ ގަސްތައް އިންދުން ކަަމަށެވެ. އެހެންކަމުން، ފުރަތަމަ ފިޔަވަހީގައި ގަސްތައް ހޯދުމަށް ނިންމާފައިވާއިރު، ގަސްތަައް އިންދާ، ގަސްތައް މޮނިޓާކޮށް، މި ފަސް އަހަރު ތެރޭގައި ގަސްތަކަށް ވާ ގޮތް ބަލާ، އިންދާނެ ފަރާތްތައް ހޯދާނެ ކަަމަށް ވެސް ތޯރިގް ވިދާޅުވިއެވެ.
މިއީ ރާއްޖޭގައި ތިމާވެށި ހިމާޔަތް ކުރުމުގެ ގޮތުން ފަސްމިލިއަން ގަސް ފަސް އަހަަރު ތެރޭގައި ރާއްޖޭގައި އިންދާ ގޮތަށް ކުރިއަށްގެންދާ ޕްރޮގްރާމެކެވެ. މި ޕްރޮގްރާމް ތެރެއިން ރާއްޖޭގައި މަދުވެފައިވާ 22 ވައްތަރެއްގެ ގަސް މިއަަދު އިންދާފައި ވެއެވެ.
މި ޕްރޮގްރާމަކީ ރައީސް މުއިއްޒު ޔޫއޭއީގެ ދުބާއީގައި ކުރިއަށްދިޔަ 28 ވަނަ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވޯކް ކޮންވެންޝަން އޮން ކްލައިމެޓް ޗޭންޖް (ކޮޕް28) ބައްދަލުވުމުގެ މަތީ ފަންތީގެ ސެގްމެންޓްގައި ގައުމީ ބަޔާން އިއްވަވަމުން އިއުލާން ކުރައްވާފައިވާ ޕްރޮގްރާމެއްކަން ފާހަގަކޮށްލެވެއެވެ.
