ކެނަޑާ، މެކްސިކޯ އަދި އެމެރިކާގައި 2026 ވަނަ އަހަރު ބާއްވާ ފީފާ ވޯލްޑް ކަޕް ކޮލިފައިންގެ ދެކުނު އެމެރިކާގެ ބުރުގައި އާޖެންޓީނާ އާއި ބޮލީވިއާ ބައްދަލުކުރި މެޗުގައި މެސީ ހެދި ހެޓްރިކާއެކު 6-0 ގެ ނަތީޖާއަކުން އާޖެންޓީނާ މޮޅުވެ ގްރޫޕް ގެ އެއްވަނާގައި ހަމަޖެހިލައިފިއެވެ.
އާޖެންޓީނާ އަށް ވަނި ކުޅުނު 10 މެޗުން 22 ޕޮއިންޓް ލިބިފައެވެ. 2 ވަނައިގައި އޮތް ކޮލަމްބިއާ އަށް 10 މެޗުން ލިބިފައިވަނީ 19 ޕޮއިންޓް އެވެ. 3 ވަނައިގައި އޮތް އުރުގުއޭ އާއި 4 ވަނާގައޮތް ބްރެޒިލަށް ވެސް 10 މެޗުން ލިބިފައިވަނީ 16 ޕޮއިންޓް އެވެ.
ރޭގެ މެޗް ގައި މެސީގެ ފުރަތަމަ ލަނޑު ފެނިގެންގޮސްފައިވަނީ މެޗް ގެ 19 ވަނަ މިނިޓްގައެވެ. އަނެއް 2 ގޯލުވެސް މެސީ ޖަހާފައިވަނީ މެޗްގެ ފަހު 10 މިނިޓް ތެރޭގަ އެވެ.
އާޖެންޓީނާގައި ކުޅުނު މެޗަށްފަހު މެސީ ބުނެފައިވަނީ އާޖެންޓީނާގައި މެޗެއް ކުޅެލަން ލިބޭ ކޮންމެ ފަހަރަކު ވެސް އޭނާ އޭނާއށް ހާއްސަ ހިތްހަމަޖެހުމެއް ލިބޭ ކަމަށާއި، އޭގެ ސަބަބަކީ ކޮންމެ މެޗެއްވެސް އޭނާ ބަލަނީ އެމެޗަކީ ގައުމީޓީމަށް ކުޅެން ލިބޭ އެއްމެ ފަހު މެޗަށް ވެދާނެ ކަމަށް ވާތީ ކަމަށެވެ.
މެސީ މިހާތަނަށް އާޖެންޓީނާއަށް 189 މެޗް ކުޅެ 112 ގޯލް ވަނީ ކާމިޔާބުކޮށްދީފައެވެ.
