4 ވަނަ އޭޝިއަން ޔޫތް އެތްލެޓިކްސް ޗެމްޕިއަންޝިޕްގައި ވާދަކުރާ ރާއްޖޭގެ ޒުވާން އެތްލެޓިކްސް ޓީމް ނަގައިފިއެވެ. މިމަހުގެ 13 އިން 16 އަށް ކުވޭތުގައި ކުރިއަށްދާ ޔޫތް ޗެމްޕިއަންޝިޕްގައި ރާއްޖެއިން ވާދަކުރާނީ ފަސް އެތްލީޓުންނެވެ.
ޒުވާން އެތްލެޓިކްސް ޓީމުގައި ހިމެނެނީ ހުސެއިން ޒީކް ސުއާދު، ޔޫސުފް އާއިޝް މުހައްމަދު، މުހައްމަދު މިންހާލް ޝާމިން، މަރިޔަމް ރޫޔާ އަލީ އަދި ރާއްޖޭގެ އެއްވަނަ ދިގުފުންމުން އެތްލީޓް އިބްރާހިމް ނާހިލް ނިޒާރުއެވެ.
ނާހިލް ވަނީ ރާއްޖޭގެ ގިނަ ދުވަސްވީ ދިގު ފުންމުމުގެ ރެކޯޑް ދެ ފަހަރެއްގެ މަތިން މުގުރާލާފައިއެވެ. ޒުވާން މުބާރާތުގައި ވާދަކުރާ ޓީމުގައި ހިމެނީ ގިނަ އެތްލީޓުންނަކީ ނިމިގެންދިޔަ ކޮމަންވެލްތް ގޭމްސް އާއި އިސްލާމިކް ސޮލިޑޭރިޓީ ގޭމްސްގައިވެސް ވާދަކޮށް އިންޓަރނޭޝަނަލް ތަޖްރިބާ ހުރި އެތްލީޓުންނެވެ.
