މޯލްޑިވްސް މީޑިއާ ކައުންސިލް (އެމްއެމްސީ)ން އުފައްދަން މަސައްކަތް ކުރަމުން އަންނަ ޕްރެސް ކްލަބް ހިންގާނެ ގަވައިދު ފާސްކޮށް، އެ ކްލަބްގައި ބައިވެރިވުމުގެ ފުރުސަތު މިއަދު ހުޅުވާލައިފި އެވެ.
އެމްއެމްސީން ބުނީ ޕްރެސް ކްލަބްގެ ހިންގާ ގަވައިދު ފާސްކޮށް އެ ކްލަބްގައި ބައިވެރިވުމުގެ ދައުވަތު މީޑިއާތަކަށް ފޮނުވަން ނިންމީ އެ ކައުންސިލުން ރޭ ބޭއްވި، ކައުންސިލްގެ 66 ވަނަ ޖަލްސާއިން ކަމަށެވެ. އެގޮތަށް ނިންމައި، އެމްއެމްސީން މިހާރު އަންނަނީ ޕްރެސްކްލަބްގައި ބައިވެރިވުމުގެ ދައުވަތު ފޮނުވަމުންނެވެ.
ޕްރެސް ކްލަބް އުފެއްދުމަކީ އެމްއެމްސީގެ މިދައުރުގެ މެމްބަރުންގެ ވައުދެކެވެ. އެ ކައުންސިލްގެ ރައީސް މުހައްމަދު ޝަފާއު ހަސަން އެންމެ ފަހުން ވިދާޅުވެފައި ވަނީ އެކައުންސިލްގެ މި ދައުރު ނިމުމުގެ ކުރިން ޕްރެސް ކްލަބް އުފެއްދުމުގެ މަސައްކަތުގެ ބޮޑުބައި ނިންމާނެ ކަމަށެވެ.
