ރާއްޖޭގެ ބޮޑު ބަޔަކަށް މިއަދު ވައިގަދަވެ، ކަނޑުވެސް ގަދަވާނެ ކަމަށް ލަފާކޮށް މޫސުމާ ބެހޭ އިދާރާ، މޯލްޑިވްސް މީޓިއޮރޮލޮޖީ ސާވިސް (މެޓް އޮފީހުން) މިއަދު ވައިޓް އެލާޓެއް ނެރެފި އެވެ.
މިއަދު މެންދުރުކުރި 11:00 އިން ފެށިގެން ހަވީރު 5:00 އަށް ވައިޓް އެލާޓް ނެރުނީ ހއ. އަތޮޅުން ފެށިގެން ތ. އަތޮޅާ ހަމައަށެވެ.
މެޓް އޮފީހުން ނެރުނު އެލާޓްގައިވާ ގޮތުން ގަޑިއަކު 19 މޭލާއި 24 މޭލާ ދެމެދުގެ ބާރުމިނުގައި ވައިޖެހި، ވިލާގަނޑުގައި ގަޑިއަކު 45 މޭލަށް ވައި ގަދަވެ ކަނޑުތައް ގަދަ ވާނެކަމަށް ލަފާކުރެވެ އެވެ.
Alert White for strong winds of 19-24 mph with gusts of 45 mph with rough seas. pic.twitter.com/HshVyuql7V
— Maldives Meteorology (@MetMaldives) December 12, 2022
މިދިޔަ ހަފުތާއެއްހާ ދުވަހު ވެސް ރާއްޖޭގެ މޫސުން އެހާ ރަނގަޅެއް ނޫނެވެ. ރެއާއި އިއްޔެ ވެސް ރާއްޖޭގެ އެކި ސަރަހައްދުތަކަށް ބޯކޮށް ވާރޭ ވެހުނެވެ. ދެ މޫސުން ބެދޭ ދުވަސްވަރު ( ހުޅަނގު މޫސުން ނިމި އިރުވައި މޫސުން ފެށޭ، އަދި އިރުވައި މޫސުން ނިމި ހުޅަނގު މޫސުން ފެށޭ ދުވަސްވަރު) ރާއްޖޭގެ ކަނޑުތައް އާއްމު ގޮތެއްގައި ގަދަ ވެ އެވެ.
