ފުލުހުންގެ ވަޒީފާއަށް މީހުން ނަގަން މިދިޔަ ޑިސެމްބަރު މަހުގެ 28 ވަނަ ދުވަހު ކުރި އިއުލާނުގެ މުހުލަތު މިމަހުގެ 15 އަށް ހަމަވާތީ ފުލުހުންގެ އިދާރާއިން އެކަން މިއަދު ހަނދާންކޮށްދީފި އެވެ.
ފުލުހުންގެ ވަޒީފާ ފަށާ (ކޮންސްޓަބަލް ރޭންކް) ގައި ދިވެހި ފުލުހުންގެ ހިދުމަތާ ގުޅޭނެ ފަރާތްތައް ހޯދަން ޑިސެމްބަރު 28 ގައި ކުރި އިއުލާނު އާއްމުންނަށް ހަނދާންކޮށްދިނުމުގެ ގޮތުން ފުލުހުންގެ އިދާރާގެ ޓްވިޓާ ހޭންޑުލް އިން މިއަދު ކުރީ އެ އިއުލާނުގެ ލިންކް ހިމެނޭ ޓްވީޓެކެވެ.
We are hiring for the position of Police Constable.
Interested candidates can submit the Job Application Form along with relevant documents to Police HQ before 15th January 2023, 1600hrs
More details: https://t.co/SHeIHNZbBK#JobOpportunity pic.twitter.com/XCRUHL0YDR
— Maldives Police (@PoliceMv) January 5, 2023
އެއިއުލާނުގައިވާ ގޮތުން ފުލުހުންގެ ވަޒީފާއަށް ވަންނަން މިފަހަރު ހުޅުވައިލި ފުރުސަތުގެ މުއްދަދު ހަމަވާނީ މިމަހުގެ 15 ވަނަ ދުވަހު އެވެ. ފުލުހުންގެ ވަޒީފާއަށް ކުރިމަތިލުމުގެ ޝަރުތުތަކުގެ ތެރޭގައި އެސް.އެސް.ސީ އިމްތިހާން ނުވަތަ ޖީ.ސީ.އީ އޯ ލެވެލް އިމްތިހާނުން މަދުވެގެން 3 މާއްދާއިން ދަތްވެގެން "ސީ" ފާސް ހާސިލް ކޮށްފައިވުން ނުވަތަ އެއާ އެއްފެންވަރުގެ ސަނަދެއް ހާސިލް ކޮށްފައިވުން ހިމެނެއެވެ.
ފުލުހުންގެ ވަޒީފާއަށް މީހުން ނެގުމުގައި ތައުލީމީ ޝަތުރުތަކުގެ އިތުރުން، ޖިސްމާނީ ގޮތުން ހުންނަން ޖެހޭ ޝަތުރުތަކެއް ވެސް ހުރެ އެވެ. އެ ޝަރުތުތަކުގެ ތެރޭގައި ފިރިހެނެން ނަމަ އިސްކޮޅުން ފަސް ފޫޓް ތިން އިންޗި ހުރުމާއި، އަންހެނެއް ނަމަ އިސްކޮޅުގައި ފަސްފޫޓު ހަމަވުން ހިމެނެ އެވެ.
ފުލުހުންގެ ކޮންސްޓަބަލަކަށް، މުސާރަޔާއި އިނާޔަތްތަކާއި އެކު މަހަކު ޖުމްލަ 11،810ރ. ލިބޭނެ އެވެ. އެއީ އަސާސީ މުސާރައިގެ ގޮތުގައިދޭ 4،650ރ. އާއި ސާވިސް އެލެވެންސް ގެގޮތުގައި ދޭ 5،000ރ. އާއި ނޮން-ޕްރެކްޓިސް އެލަވަންސްގެ ގޮތުގައި ދޭ، 1،860.ރ އާއި ޔުނީފޯމް އެލެވެންސްގެ ގޮތުގައި ދޭ 300ރ. އެވެ.
ފުލުހުންގެ ވަޒީފާއަށް ކުރިމަތިލެވޭނީ އުމުރުން 18 އަހަރާއި 39 އަހަރާ ދެމެދުގެ މީހުންނަށެވެ.
