މާ ބޮޑަށް ރިއެކްޓް ކުރީމަ ވެރިކަން ވެއްޓޭ ކަމަށް ވިދާޅުވެ މެންބަރު ހިސާން ހުސެއިން ރައްޔިތުން މަޖިލީހުގެ ރައީސް މުހައްމަދު ނަޝީދަށް ރައްދުދެއްވައިފިއެވެ.
އެމްޑީޕީގެ ރިޔާސީ ޕްރައިމަރީގެ ކެމްޕެއިންގެ ތެރެއިން ނ. ވެލިދޫގައި ބޭއްވި ޖަލްސާގައި ވާހަކަ ދައްކަވަމުން ހިސާން ވިދާޅުވީ މާ ބޮޑަށް ރިއެކްޓް ކުރުމުން ބައެއް ފަހަރު ރިޔާސީ ދައުރެއްގައި ތިން ނައިބު ރައީސުން އައްޔަން ކުރަން ޖެހޭ ކަމަށާއި ބައެއް ފަހަރު ވެރިކަން ވެއްޓިގެންދާ ކަމަށެވެ. ހިސާން އެ އިޝާރާތް ރައީސް ޔާމީނަށާއި ރައީސް ނަޝީދަށެވެ. ރައީސް ނަޝީދުގެ ކެމްޕެއިންގައި ރައީސް ސޯލިހު "ރިއެކްޓް" ނުކުރައްވާ ކަމަށް ވިދާޅުވެ ރައީސް މުހައްމަދު ނަޝީދާއި އެމަނިކުފާނުގެ ފެކްޝަނުން ގެންދަވަނީ ރައީސް ސޯލިހަށް މަލާމާތް ކުރައްވަމުންނެވެ.
ކުއްލިކުއްލިއަށް ނިންމުންތައް ނުނިންމަވާ، ވިސްނުންތެރިކަމާއެކު ތަފާތު ޚިޔާލުތަކާއެކު ޚިޔާލު ތަފާތުވުންތަކުގެ ތެރެއިން ވެރިކަން ކުރެވޭނެކަން ސާބިތުކޮށް ދެއްވައިފި. އެއީ ރައީސް @ibusolih އަޅުގަނޑުމެންގެ ޗޮއިސްއަށް ވާ ސަބަބަކީ- @hisaanhussain #MDPKuriah #Ibu2023 pic.twitter.com/yGaLYgGLjH
— MDP Kuriah (@MDPKuriah) January 7, 2023
ހިސާން ވިދާޅުވީ އެމްޑީޕީއާއެކު ކުރިއަށްދެވޭނެ ކެނޑިޑޭޓަކީ ރައީސް ސޯލިހު ކަމަށެވެ.
ޖޭއެސްސީގެ ރައީސްކަން ކުރައްވާ ހިސާން އަކީ ރައީސް ނަޝީދާ ގާތް ގުޅުމެއް އޮތް ފަރާތެކެވެ. ރައީސް ނަޝީދުގެ ލޯޔަރެއްގެ ހައިސިއްޔަތުންވެސް ހިސާން ވަނީ އެތައް މަސައްކަތެއް ކުރައްވާފައެވެ.
