ގާތްގާތުގައި މާލެއާއި އެހެން ބައެއް ރަށްތަކުގައި ފަހަކަށް އައިސް ހިނގި އަލިފާނުގެ ހާދިސާތަކާ ގުޅޭ ބޮޑު ތަހުގީގެއް ފުލުހުން ފަށައިފި އެވެ.
މާލޭ ނީލަން ފިހާރަ މިއަދު ހިނގި އަލިފާނުގެ ހާދިސާއެއްގައި އަނދައި ހުލިވި އިރު، ގދ. ފިޔޯރީ ސްކޫލްގެ ބާ އިމާރާތް އިއްޔެ ހިނގި އަލިފާނުގެ ހާދިސާއެއްގައި ވަނީ އަނދައި ހުލިވެފަ އެވެ. އޭގެ ކުރީ ދުވަހު (ހޮނިހިރު ދުވަހު) ރ. އަލިފުށީ ގޮނޑުގައި ހުރި ފައިބަރުތަކެއްގައި ރޯވެ، އަލިފާނުގެ ބޮޑު ހާދިސާއެއް އެރަށުގައި ވެސް ހިނގި އެވެ.
A major investigation in to the recent incidences of fire in Male’ & atolls is now launched by @PoliceMv. We call for public support for it. Also, public order officers’ way of handling an elderly woman at the protest last night in Male’ is of concern. Will be looked in to.
— Mohamed Hameed (@M_Hameedh) January 9, 2023
ކަމިޝަނަރު އޮފް ޕޮލިސް މުހައްމަދު ހަމީދު މިއަދު ކުރެއްވި ޓްވީޓެއްގައި ވިދާޅުވީ މާލެއާއި އަތޮޅުތަކުގައި ފަހަކަށް އައިސް ހިނގާފައިވާ އަލިފާނުގެ ހާދިސާތަކާ ގުޅޭ ބޮޑު ތަހުގީގެއް މިހާރު ފަށާފައިވާ ކަމަށާއި އެކަމަށް އެއްބާރުލުންދޭން ފުލުހުން އެދޭ ކަމަށެވެ.
މާލޭގައި މިއަދު ހިނގި އަލިފާނުގެ ހާދިސާގައި ނީލަން ފިހާރައާއި އެތަނާ ޖެހިގެން ހުރި އެކޮމޮޑޭޝަން ބްލޮކެއް ވަނީ އަނދައި ހުލިވެފަ އެވެ. ރޭ ފަތިހު 5:49 އެހާކަށް ހާއިރު ރޯވި އެ އަލިފާންގަނޑު ނިއްވައިލަން އެމްއެންޑީއެފްގެ ފަޔާ އެންޑް ރެސްކިއުގެ ފަޔަމަނުންނާއި ވެލާނާ އިންޓަނޭޝަނަލް އެއާޕޯޓްގެ ފަޔަމަނުން ކުރި މަސައްކަތުން އެ އަލިފާންގަނޑު ކޮންޓްރޯލްކޮށް ނިއްވައިލެވުނީ ހެނދުނު 9:00 އެހާކަށް ހާއިރު އެވެ،
ފިޔޯރީގައި އިއްޔެ ހިނގި ހާދިސާގައި އެރަށު ސްކޫލްގެ އިމާރާތްތަކެއް ވަނީ އަނދައި ހުލިވެފަ އެވެ.
އަލިފާނުގެ ހާދިސާތަކާ ގުޅޭ ބޮޑު ތަހުގީގެއް ފުލުހުން ފެށި ނަމަވެސް ، އެ ހާދިސާތަކަކީ ބަޔަކު ގަސްދުގައި ކުރި ކަމަކުން ހިނގި ހާދިސާތަކެއް ކަމަށް ފުލުހުން ތުހުމަތުކުރާ ކަމަކަށް ނުވަތަ ނޫންކަމަކަށް ވެސް އަދި ނުބުނެ އެވެ.
