އާޓިފިޝަލް ބީޗުގައި ރައީސް ނަޝީދު ބާއްވާ ޖަލްސާގެ ހާޒިރީން އިތުރުކުރުމަށް އިދިކޮޅު ކޯޅިޝަނުން މަސައްކަތްކުރަނީ

އާޓިފިޝަލް ބީޗްގައި ރައީސް ނަޝިދު ބާއްވާ ކެމްޕެއިން ޖަލްސާގައި ބައިވެރިވުމަށް ޕީ.ޕީ.އެމް ގެ މާލޭ އާދެވެންތިބި ބައެއް މެންބަރުން މާލެއައުމަށް އެޕާޓީގެ ލީޑަރޝިޕްގެ ބައެއްފަރާތްތަކުން ބާރުއަޅަމުންދާކަމުގެ އަޑުތަކެއް ފެތުރެން ފަށައިފިއެވެ،

މިކަމާގުޅިގެން މާލެ ކައިރި ބައެއް ރަށްރަށުން މިކަމުގެ ހަގީގަތްބެލުމަށް ކުރި މަސައްކަތުން މިކަމަކީ ވަރަށް ރޭވުންތެރިކަމާއެކު ޕީ.ޕީ.އެމް ގެ އިސްވެރިންގެ ލަފާގެ މަތިން ކުރަމުންގެންދާކަމެއްކަން ވަނީ އެނގިފައެވެ. ރައީސް ނަޝީދުގެ އިވެންޓްގައި ބައިވެރިވާ މީހުން ގިނަކުރުމަކީ ޕީ.ޕީ.އެމް އިން ވެރިކަމަށް އައުމަށް ކުރަމުންދާ މަސައްކަތުގައި ވަރަށް މުޙިއްމު ކަމެއްކަން ވިސްނައިދިނުމުގެ އިތުރަށް އެމް.ޑީ.ޕީ އިލެކްޝަން ކޮމިޝަނުގެ ދަފްތަރުގައި ތިބި ޕީ.ޕީ.އެމް އަށް ވަފާތެރި ޕީ.ޕީ.އެމް ފިކުރުގެ މެމްބަރުންނަކީ ކޮބައިތޯ ބަލައި އެމެންބަރުންގެ ވޯޓް ރައީސް ނަޝީދަށް ކޮންމެހެންވެސް ހޯދައިދިނުމަށް އެފަރާތްތަކުން އިރުޝާދު ދެމުނެގެންދާކަން ވަނީ ހާމަވެފައެވެ.

އަދި ހަމަ މާދަމާރޭ ފުވައްމުލަކުގައި ރައީސް ނަޝީދު ބާއްވާ ޖަލްސާއަށް އެރަށުގެ ޕީ.ޕީ.އެމް އަށް ނިސްބަތްވާ ފަރާތްތަކުން މީހުން ނިކުތުމަށް އިރުޝާދު ދެމުންދާކަމަށްވެސް އެރަށުން ވާހަކަދެއްކި ފަރާތަކުން މި ނޫހަށްވަނީ މައުލޫމާތު ދީފައެވެ.

ރައީސް ނަޝީދަށް ޕްރައިމަރީ ކާމިޔާބު ކުރެވިއްޖެ ނަމަ ރިޔާސީ އިންތިހާބުގައި އެމަނިކުފާނަށް ލިބޭނީ ހަމައެކަނި އެމް.ޑީ.ޕީ ފިކުރަށް ތާއިދުކުރާ މީހުންގެ ވޯޓް އެކަނިކަމަށް، ރާއްޖޭގެ ސިޔާސީމައިދާނުގައި ޙަރަކާތްތެރިވާ ވަރަށްގިނަ ފަރާތްތަކުން ދަނީ ބުނަމުންނެވެ. އެހެންކަމުން މިކަމަކީ ކުރިއަށް މި އޮތް ރިޔާސީ އިންތިހާބް ކާމިޔާބުކުރުމުގައި އެއްމެ ފަސޭހަ ޔަގީން ފޯމިއުލާއެއް ހޯދުމަށް އިދިކޮޅުން ކުރަމުންގެންދާ މަސައްކަތުގެ ބައެއްކަމުގައި ބެލެވެއެވެ.