ރާއްޖެ ސަރަހައްދަށް ވައި ނުސާފުވެ ލޮލަށް ފެންނަ ދުރުމިން ދަށްވެއްޖެ އެވެ.
މޫސުމާ ބެހޭ އިދާރާ، މޯލްޑިވްސް މީޓިއޮރޮލޮޖީ ސާވިސް އިން މިއަދު އާއްްމުކުރި މައުލޫމާތުގައި ބުނީ އިރުވައި މޫސުމުގެ ގިނަދުވަސްތަކެއްގައި އާންމުކޮށް ރާއްޖެސަރަހައްދުގެ ވައިނުސާފުވެ، ދުރުފެންނަ މިންވަރު ދަށްވާ ކަމަށާއި މިއަދު ރާއްޖޭގެ ބޮޑު ސަރަހައްދަކަށް ލޮލަށްފެންނަ ދުރުމިން ވަނީ ދަށްވެފައިވާ ކަމަށެވެ.
އެ މައުލޫމާތުގައިވާ ގޮތުން މެދުރާއްޖެތެރެއާއި އުތުރުގެ އަތޮޅުތަކުގައި ވައި ނުސާފުވެ، އާންމުގޮތެއްގައި 10 ކޮލޯމީޓަރަށް ދުރު ފެނުނު ނަމަވެސް މިއަދު ހެނދުނު 7:00 އިން ފެށިގެން ހާއްސަކޮށް މެދުރާއްޖެތެރެ ހިމެނޭ ސަރަހައްދުގެ އަތޮޅުތަކަށް މި މިންވަރު ދަށްވެފައި ވަނީ އެވެރެޖް ގޮތެއްގައި ހަތަރު ކިލާމީޓަރަށެވެ.
ރާއްޖެސަރަހައްދުގައި ވައި ނުސާފުވެ، ލޮލަށްފެންނަ ދުރުމިން ވަނީ ދަށްވެފަ pic.twitter.com/c2gszjXpwO
— Maldives Meteorology (@MetMaldives) January 31, 2023
ހުޅަނގުން އިރުމައްޗަށް ވައި ބަދަލުވާ ދުވަސްވަރު، ހިމާލަޔާ ސަރަހައްދުން ހިރަފުހާއި ދުން، ވަޔާއެކު ބޭ އޮފް ބެންގަލް ހުރަސްކޮށް ރާއްޖެއާހަމައަށް ފޯރައެވެ. އޭގެ ސަބަބުން، އުތުރާއި މެދުރާއްޖެތެރޭގެ ސަރަހައްދުތަކުގައި ވައި ނުސާފުވެ، ދުރު ފެންނަ މިންވަރު ދަށްވެއެވެ. އެ މައްސަލަ ބޮޑަށް ކުރިމަތިވަނީ ޑިސެމްބަރު މަހުން ފެށިގެން މާޗުމަހުގެ ނިޔަލަށެވެ.
