ކޮމަންވެލްތުގެ އުސޫލުތައް ރާއްޖޭން ދަމަހައްޓާނެ ކަމަށާއި ދެމެހެއްޓެނި ސުލްހައަށް ރާއްޖޭން މަސައްކަތްކުރާނެ ކަމަށް ރައީސް އިބްރާހީމް މުހައްމަދު ސޯލިހު މިއަދު ވިދާޅުވެއްޖެ އެވެ.
މިއަދު ފާހަގަކުރާ ކޮމަންވެލްތު ދުވަހުގެ މުނާސަބާގައި ކުރެއްވި ޓްވީޓެއްގައި ރައީސް ވިދާޅުވީ ކޮމަންވެލްތާ އެކު ރާއްޖޭން ހިއްސާކުރާ އަގުތަކާއި އުސޫލުތައް ރާއްޖޭން ދަމަހައްޓާނެ ކަމަށެވެ. ކޮމަންވެލްތު ދުވަހުގެ މުނާސަބާގައި އިނގިރޭސިވިލާތުގެ ރަސްގެފާނު ޗާލްސް ތިން ވަނަ އަށާއި ކޮމަންވެލްތުގެ ސެކްރެޓޭރިއަޓަށާއި ކޮމަންވެލްތު ގައުމުތަކުގެ ސަރުކާރުތަކަށް އެމަނިކުފާނު ތަހުނިޔާ ވިދާޅުވި އެވެ.
On #CommonwealthDay, I convey best wishes from the Maldivian people to HM King Charles III, @commonwealthsec, governments and people of the Commonwealth. Maldives remains committed to upholding our shared values and contribute towards a sustainable and peaceful common future.
— Ibrahim Mohamed Solih (@ibusolih) March 13, 2023
"ހިއްސާކުރާ އުސޫލުތައް ދިވެހިރާއްޖޭން ދަމަހައްޓާނެ. އަދި ދެމެހެއްޓެނިވި، ސުލްހަވެރި މުސްތަގުބަލަކަށް ކުރާ މަސައްކަތުގައި ބައިވެރިވާނެ،" ޓްވީޓްގައި ރައީސް ވިދާޅުވި އެވެ.
ކޮމަންވެލްތު ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ވެސް މާޗް މަހުގެ ދެވަނަ ހޯމަ ދުވަހެވެ. ކޮމަންވެލްތަކީ އިނގިރޭސީން އިސްތިއުމާރުކުރުމަށް ފަހު މިނިވަންވެފައިވާ ގައުމުތަކުގެ ޖަމިއްޔާ އެކެވެ. ކުރީގެ ރައީސް ޔާމީނުގެ ވެރިކަމުގައި ރާއްޖެ އެ ޖަމާއަތުން ވަކިވި އެވެ. އޭގެ ފަހުން ރާއްޖޭން އެޖަމާއަތުގައި އަލުން ބައިވެރިީ ރައީސް އިބްރާހީމް މުހައްމަދު ސޯލިހު ރައީސް ކަމަށް ވަޑައިގެންނެވުމަށް ފަހު މި ސަރުކާރުންނެވެ.
