ޕީޕީއެމުން ރޭ ކުރި މުޒާހަރާގެ ބައިވެރިން ރައީސް އިބްރާހީމް މުހައްމަދު ސޯލިހުގެ މޮޓޯކޭޑަށް ހުރަސް އެޅުމުން ހައްޔަރު ކުރި މީހުންގެ ތެރޭގައި ހިމެނޭ ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމް ހައްޔަރުކުރި ކަން ފުލުހުން މަޖިލީހަށް އަންގާފައި ނުވާ ކަމަށް ބުނެ މަޖިލީހުން މިއަދު ކަންބޮޑުވުން ފާޅުކޮށްފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގެ ރިޔާސަތުގައި އިންނެވި އެ މަޖިލީހުގެ ނައިބު ރައީސް އީވާ އަބްދުﷲ ވިދާޅުވީ ޝިޔާމް ހައްޔަރުކުރުމުގައި ފުލުހުން އަމަލުކޮށްފައިވަނީ މަޖިލީހުގެ ގަވައިދާ ހިލާފަށް ކަމަށެވެ. މަޖިލީހުގެ މެމްބަރަކު ހައްޔަރުކޮށްފި ނަމަ، އެއް ގަޑިއިރުގެ ތެރޭގައި އެކަން މަޖިލީހުގެ ރައީސަށް ނުވަތަ އަމާންއާންމަށް އަންގަންޖެހޭނެ ކަމަށް ގަވާއިދުގައި ބަޔާންކޮށްފައިވާ ކަމަށް ވެސް އޭނާ ވިދާޅުވި އެވެ.
"…އާންމުކޮށް މީގެ ކުރިން އަންގަމުންދަނީ. ނަމަވެސް ނައިފަރު ދާއިރާގެ މެމްބަރު ހައްޔަރުކުރުމަށްފަހު އަޅުގަނޑުމެންނަށް މައުލޫމާތު ލިބެނީ ހަތަރު ގަޑިއިރެއްހާއިރު ތެރޭގައި އޭ ދޫކޮށްލީ، އެހެންނަމަވެސް މަޖިލީހަކަށް އަންގާފައި އެއް ނެތް،" އީވާ ވިދާޅުވި އެވެ.
އޭނާ ވިދާޅުވީ އެގޮތަށް ކަންތައް ކުރުމަކީ މަޖިލީހުން ވަރަށް ކަންބޮޑުވާ ކަމެއް ކަމަށެވެ.
