ކޮވިޑް-19 ގެ ސަބަބުން އާމްދަނީއަށް އަސަރުކުރި އަމިއްލަ މަސައްކަތް ކުރާ މީހުންނަށް މާލީ އެހީ ދިނުމުގެ ތިން ވަނަ ބުރެއް ފަށައި އެހީއަށް އެދި ހުށަހެޅުމުގެ ފުރުސަތު ، އިކޮނޮމިކް މިނިސްޓްރީއިން ފަށައިފިއެވެ.
އެ ޕްރޮގްރާމުގެ ދެވަނަ ބުރު ނިމި ތިންވަނަ ބުރަށް ހުޅުވާލައިފައިވާ އިރު، ފުރަތަމަ އަދި ދެވަނަ ބުރުގައި ހުށަހަޅާފައިވާ އެޕްލިކޭޝަން ފޯމުތައް މިހާރު ރިވިއު ކޮށް ގްރާންޓް ފައިސާ ދޫކުރަމުންދާ ކަމުގައި އިކޮނޮމިކް މިނިސްތްރިއިން ބުންޏެވެ.
މި ޕްރޮގްރާމްގެ ތެރެއިން ހުޅުވާލާފައިވަނީ ޖުމްލަ 500 ފުރުސަތެވެ. އެހީއަށް އެދި ހުށަހަޅަން ޖެހެނީ އޮންލައިން ފޯމެއް މެދުވެރިކޮށެވެ. ފޯމު ހުށަހެޅުމުގެ ސުންގަޑި އަކީ މެއި 31 އެވެ.
އެހީއަށް އެދި ފޯމު ހުށަހަޅާ މީހުންގެ ވަކި ޝަރުތުތަކެއް ހުންނަން ޖެހެއެވެ. އެގޮތުން 30 ސެޕްޓެމްބަރ 2022 އާއި ހަމައަށް ފާއިތުވި 1 އަހަރު ދުވަހުގެ މުއްދަތުގެ ތެރޭގައި އަމިއްލަ މަސައްކަތުން އާމްދަނީ ހޯދަމުން އައިސްފައިވާ ފަރާތެއް ކަމުގައި ވާންޖެހޭނެ ކަމަށާއި އެޕްލިކޭޝަން ހުށަހެޅުމާ ހަމައަށް، ފާއިތުވެދިޔަ ހަތަރު ހަފްތާގައި މުސާރަ ލިބޭ ވަޒީފާއެއް އަދާ ކުރާ ފަރާތަކަށް ނުވުން ނުވަތަ، ވަޒީފާއެއް އަދާކުރާނަމަ ހަފްތާއަކު 20 ގަޑިއިރަށްވުރެ ގިނައިރު ވަޒީފާ އަދާކުރަމުންދާ ފަރާތަކަށް ނުވުމަކީ ވެސް އެހީއަށް އެދޭ މީހާގެ ހުންނަން ޖެހޭ ޝަރުތެކެވެ.
މި ޕްރޮގްރާމްގައި އެހީ ދޭ ދާއިރާތަކަކީ:
އަތްތެރި މަސައްކަތް
ބިއުޓީ އަދި މޭކަޕް
ފޮޓޯ އަދި ވީޑިއޯ ނެގުން
ފެހުން އަދި ޓެކްސްޓައިލްގެ މަސައްކަތް
އިންފޮމޭޝަން ކޮމިއުނިކޭޝަން ޓެކްނޮލޮޖީ
ކްރިއޭޓިވް އާޓްސް އަދި މިއުޒިކް
ކުޅިވަރު އަދި ފިޓްނަސް އެވެ.
އެހީގެ ގޮތުގައި ކޮންމެ މީހަކަށް 60،000ރ. އާ ހަމައަށް ފައިސާ ދޭނެ ކަމަށް ވެސް އެ މިނިސްޓްރީއިން ބުންޏެވެ. ފައިސާ ދޫކުރަން ހަމަޖެހިފައިވަނީ ދެ އިންސްޓޯލުމަންޓަކަށް ބަހާލައިގެން؛ ފުރަތަމަ ބުރުގައި %80 އާ ހަމައަށް ފައިސާ ދޫކުރާގޮތަށެވެ.
