މިދުވަސްވަރު އާދަޔާ ހިލާފަށް ހޫނު ގަދަވުމުގެ ސަބަބުން ކަރަންޓުބޭނުންކުރާ މިންވަރު މައްޗަށް ގޮސްފައިވާތީ، ހިދުމަތުގެ ފެންވަރު ރަނގަޅުކުރުމުގެ ގޮތުން ސްޓެލްކޯއިން، ހާއްސަ މަސައްކަތްތަކެއް ފަށާ، އެކަމަށް ޓީމެއް އުފައްދައިފިއެވެ.
އެޓީމުގެ މަސައްކަތް ކުރިއަށްދާނީ ސިީދާ، މެނޭޖިން ޑިރެކްޓަރު އަހުމަދު ޝަރީފުގެ ބެއްލެވުމުގެ ދަށުން ކަމުގައި ސްޓެލްކޯއިން ބުންޏެވެ.
ސްޓެލްކޯއިން ކުރި ޓުވީޓެއްގައި ބުނީ ހޫނު މޫސުމާ ގުޅިގެން ރެކޯޑު އަދަދަކަށް މިދުވަސްވަރު ކަރަންޓު ބޭނުންކުރާ މިންވަރު އިތުރުވެފައިވާތީ، އެކުންފުނިން ރައްޔިތުންނަށް ދެމުން އަންނަ ކަރަންޓުގެ ހިދުމަތްތައް މެދުކެނޑުނަނުދިނުމަށް ކުރާ މަސައްކަތް އިތުރުކުރިކަމަށެވެ.
މޫސުމާއިއެކު ކަރަންޓުބިލްތަކަށް އަންނަ ބަދަލުތަކާއި، ޕީކް ޓްރެންޑްގެ އިތުރުން، ކުންފުނީގެ ބިލިންގ ޕްރޮސެސްއާއި، އެނޫންވެސް ކަމާއި ގުޅުންހުރި މައުލޫމާތު އެކަމުގެ ފަންނީ ބޭފުޅުން މެދުވެރިކޮށް ފޯރުކޮށްދީ، ކަސްޓަމަރުންނާއި ހަމަޔަށް މިކުންފުނީގެ މައުލުމާތު އޭގެ އެންމެ ފުރިހަމަ pic.twitter.com/Ea9oaK5fgR
— STELCO (@STELCOMALDIVES) April 25, 2023
މިދުވަސްވަރުު ޕީކްލޯޑް ދަށްކުރުމަށްޓަކާ ކުރާ މަސައްކަތްތަކުގެ ތެރޭގައި އެ ކުންފުނީގެ ހުރިހާ އެއަރކޮންޑިޝަންތަކެއް 25 ޑިގްރީއަށްވުރެ ދަށް ނުވާނެހެން ބެހެއްޓުމަށް ސްޓެލްކޯއިން ނިންމާފައިވާކަމަށް އެކުންފުނިންބުންޏެވެ. އަދި އެގޮތަށް އަމަލުކުރުމަށް އެހެން ފަރާތްތަކަށް ވެސް އިލްތިމާސްކުރެއެވެ
ހޫނުން ސަލާމަތްވުމަށްޓަކައި ރައްކާރެތިކަމުގެ ފިޔަވަޅެއްގެ ގޮތުން ހުރިހާ ސްޓާފުން ރަސްމީ އޮފީސް ހެދުމުގެ ބަދަލުގައި، ކުރިއަށް އޮތް އެއް މަސްދުވަހަށް، ކުންފުނީގެ ޔުނީފޯމްގައި އޮފީހަށް އައުމުގެ އިހުތިޔާރު ވެސް ސްޓެލްކޯއިން ވަނީ ދީފައެވެ.
މިދުވަސްވަރު ރާއްޖޭގެ ހޫނުމިން 40 ޑިގްރީއިން މައްޗަށްދާނެތީ އެކަމާ ސަމާލުވުމުމަށް މެޓް އޮފީހުން ވެސް ވަނީ އިލްތިމާސްކޮށްފައެވެ.
