ސަރުކާރުން ދޫކުރާ ބޯހިޔާވަހިކަމުގެ މަޝްރޫއުގެ ދަށުން ވިނަރެސް ފްލެޓްތަކުގެ އެއްބަސްވުންތަކުގައި ސޮއި ކުރަން ފަށައިފިއެވެ.
ހުޅުމާލޭ ދެވަނަ ފިޔަވަހީގައި އިމާރާތްކޮށްފައިވާ ވިނަރެސް އިން ފްލެޓު ދޫކުރާ މީހުންގެ ތެރޭގައި، ގުޅީފަޅާއި، ސީލައިފް އަދި ހިޔާގެ ފްލެޓު ލިބުނު މީހުންގެ ތެރެއިން ބައެއް ކެޓަގަރީތަކުން ފްލެޓު ދޫކޮށްލި މީހުން ވެސް ހިމެނެ އެވެ. މީގެ އިތުރުން އާންމުންގެ ތެރެއިން ހޮވޭ ފަރާތްތަށް ވެސް ހިމެނެއެވެ.
އާބަންކޯ އިން ނެރުނު ބަޔާނެއްގައި ބުނެފައިވަނީ، ގުޅީފަޅުން ފްލެޓް ގަތް މީހުންގެ ތެރެއިން ވިނަރެސް ފްލެޓު ލިބުނު މީހުންނާ އެކު އެ ތަންތަނުގެ އެއްބަސްވުމުގައި ސޮއިކުރަން ފަށާފައިވާ ކަމަށެވެ.
ޖުމްލަ 100 ފަރާތަކަށް ހައުސިން ޔުނިޓު ލިބޭ އިރު ދުވާލަކު 25 އެއްބަސް ވުމުގައި ސޮއިކުރުމަށް އާބަންކޯ އިން ވަނީ ހަމަޖައްސާފައެވެ.
އޭގެ ތެރެއިން ގުޅީފަޅު ކަސްޓަމްރުންނަށް ލިބޭ ހައުސިން ޔުނިޓުތަކުގެ އެއްބަސް ވުމުގައި ސޮއިކުރުން މިއަދު ވަނީ ފަށައިފައެވެ. މި އެއްބަސްވުން ތަކުގައި ސޮއި ކުރުން އޮތީ އަންނަ އާދިއްތަ ދުވަހުގެ ނިޔަލާ ހުޅުމާލޭގެ ސެންޓްރޯ މޯލްގައެވެ.