މިދިޔަ ހޮނިހިރު ދުވަހާއި އާދިއްދަ ދުވަހު ހުއްޓުމެއްނެތި މާލެއަށް ކުރި ވިއްސާރާއިގެ ސަބަބުން ގެއްލުންވި 70 ގެއަކަށް 450،000 ރުފިޔާ ދިނުމަށް ސަރުކާރުން ނިންމައިފިއެވެ.
ނޭޝަނަލް ޑިޒާސްޓާ މެނޭޖްމަންޓު އޮތޯރިޓީ (އެންޑީއެމްއޭ) އިން "އެކްސް" ގައި ކުރި ފޯސްޓެއްގައި ބުނެފައިވަނީ މިދިޔަ މަހުގެ 31 ވަނަ ދުވަހު މާލެއަށް ކުރި ވިއްސާރައިގައި 70 ގެއަށް އެކި ވަރުގެ ގެއްލުންވެފައިވާ ކަމަށާއި އެ ގެއްލުންތަކުގެ ބަދަލެއްގެ ގޮތުގައި 457,246.20ރ. ދިނުމަށް ނިންމާފައިވާ ކަމަށެވެ.
31 ޑިސެންބަރު 2023 ވަނަ ދުވަހު މާލެއަށް ކުރި ވިއްސާރައިގައި 70 ގެއަށް އެކިވަރުގެ ގެއްލުންވެ 457,246.20ރ ދިނުމަށް ވަނީ ހަމަޖެހިފައި. އިތުރު ތަފްޞީލް: pic.twitter.com/OxUKI3OZ4j
— NDMA Maldives (@NDMAmv) January 3, 2024
އެގޮތުން ސަރުކާރުން ވަނީ 34 ގޭބީސީއެއްގެ އިމާރާތަށް ލިބުނު ގެއްލުންތަކަށް 248،381ރ. ދިނުމަަށް ނިންމާފައެވެ. އަދި 65 ގޭބީސީއެއްގެ ޒަރޫރީ ހިފާ ގެންގުޅޭ ތަކެއްޗަށް 104،4308ރ ގެ ގެއްލުން ލިބިފައިވާއިރ،ު ސަރުކާރުން 208،861.60ރ. ދިނުމަށް ނިންމާފައިވާ ކަމަށް އެންޑީއެމްއޭ އިން ބުނެފައިވެއެވެ.
ވިއްސާރާގައި ލިބުނު ގެއްލުން ބެލުމަށް 87 ތަނެއްގެ އެސެސްމަންޓް ހަދާފައިވާއިރު އޭގެ ތެރެއިން 19 ތަނަކީ އެކިއެކި ވިޔަފާރިތައް ހިންގާ ތަންތަނެވެ. 27 ގެއަކުން އެސެސްމަންޓް ހަދަން ބޭނުން ނުވާކަން އެންގި ކަމަށާއި އަދި 21 ގޭބީސީ އަކަށް އެކި ސަބަބުތަކާއި ހެދި ނުވަދެވުނު ކަމަށް ވެސް އެންޑީއެމްއޭ އިން ބުނެފައިވެއެވެ.
މުޅި ރާއްޖެއަަށް ކުރި މި ވިއްސާރާގައި އެންމެ ގިނައިން ވާރޭވެހުނީ ހުޅުލެ އާއި މާލޭ އަށެވެ. އެގޮތުން ހުޅުލެއަަށް 179.7 މިލިމީޓަރުގެ ވާރޭވެހިފައިވާއިރު މާލެ އަށް ވަނީ 118.2 މިލިމީޓަރުގެ ވާރޭ ވެހިފައެވެ.
