ހޯމްލޭންޑް މިނިސްޓްރީއިން ނޫސްވެރިންނަށް ދިން ދައުވަތަކަށް، މައުލޫމާތު ދިނުމުގެ ބައްދަލުވުމަކަށް ދިޔައިރު، ހިންމަފުށީގައި ގާއިމްކޮށްފައިވާ މަރުކަޒާބެހޭ މާބޮޑު މައުލޫމާތެއް އަޅުގަނޑަށް ލިބިިފައެއްނެތެވެ. ނަމަވެސް އެދުވަހުގެ ސެޝަނަށް ފަހު އިއްޔެ، އެ މަރުކަަޒަށް ގޮސް، އެތަން ބަލާލުމުގެ ފުރުސަތު ލިބުމުން، އެއީ ކިހާ ބޮޑު ކިހާ މުހިންމު މަސައްކަތެއް ކުރާތަނެއްކަން އެނިގެން ދިޔައެވެ.
ރާއްޖޭގައި ޓެރަރިޒަމް މަނާކުރާ ގާނޫނުގެ ދަށުން ކ. ހިންމަފުށީގައި ގާއިމުކޮށްފައިވާ ނޭޝަނަލް ރީއިންޓެގްރޭޝަން ސެންޓަރު (އެންއާރުސީ) ނޫސްވެރިންނަށް އިއްޔެ ދައްކާލީ ފުރަތަމަ ފަހަރަށެވެ. ހަނގުރާމަކުރަމުންދާ ސަރަޙައްދުތަކުގައި ތިބި ދިވެހިންގެ ތެރެއިން ރާއްޖެއަށް އަންނަ ބޭނުންވެފައި ތިބި ދިވެހިން އެ ސެންޓަރަށް ގެނެސް ރިހެބިލިޓޭޝަން ފަރުވާދިނުމުގައި ސެންޓަރުގައި ކަންކަން ކުރިއަށްދާގޮތް އެ ސެންޓަރުން ނޫސްވެރިންނާ ހިއްސާކުރިއެވެ.
ހިންމަފުށީގެ ރަށްފުށު ރީތި މާހައުލުން ފެނުނު އެ ސެންޓަރު ބޭރުން ފެނުނު އިރު މާ ހާއްސަ ކަމެއްނެތެވެ. ނަމަވެސް ޑިޓެންޝަން ސެންޓަރެއްގެ ސިފަ ޖެހޭގޮތަށް މަތިން ކަށި ނަރުދަމާފައި ހުއްޓެވެ. ނަމަވެސް ފާރުތަށް ހުރީ އާދައިގެ އުސްމިނެއްގައެވެ. ފަހުން އެ ސެންޓަރުގެ ޑިރެކްޓަރ ޖެނެރަލް ވިދާޅުވީ އެ ނަރު ތަކަކީ އެތަން ހެދި އިރު މާ ބޮޑު ވިސްނުމެއްނެތި ޖަހާފައި ހުރި ނަރުތަކެއްކަމަށާއި ތަނަކީ އެއްގޮތަކަށް ވެސް ޖަލެއް ނޫންކަމަށެވެ. ފަހުން އެނަރުތައް ނުނަގާ ހުރީ އެކަމަށް ބޮޑު ހަރަދެއް ހިނގާތީ ކަމަށެވެ.
ތެދެކެވެ. ތަނުގެ އެތެރޭގައި ހުރީ ޖަލެއްގެ ސިފައެއްނޫނެވެ. ވަކި ހިސާބަކުން، ފޯނާއި ކެމެރާ އެތެރެއަށް ވެއްދުން މަނައެވެ. އަދި ސަލާމަތީ ސަބަބުތަކަށްޓަކާ، އެތެރޭގެ އެއްވެސް ފޮޓޯއެއް ނެގުން ވެސް މަނައެވެ. ނަމަވެސް އެތަނުގެ މުވައްޒަފުން ހުރިހާ ތަނެއް ވަކިވަކިން ނޫސްވެރިންނަށް ދައްކާލާ، ކޮޓަރިތަކާއި ހޯލްތަކުގެ ބޭނުންތައް ވަރަށް ތަފްސީލުކޮށް ކިޔައިދިނެވެ.
އެންއާރްސީގެ ޑިރެކްޓަރ ޖެނެރަލް އަންވަރު ނައީމް، އެސެންޓަރަށް މީހުން ގެންނަ ގޮތުގެ މައުލޫމާތު ދެއްވަމުން ވިދާޅުވީ، ހަނގުރާމަ ހިނގާ ގައުމަކުން އެއްވެސް މީހަކު ރާއްޖެ ގެނައުމުގެ ކުރިން އެއީ ދިވެއްސެއްކަން ކަށަވަރުކުރާ ކަމަށެވެ.
" ފުލުހުންގެ ޓީމަކުން، ޑިއެންއޭ ޓެސްޓް ހަދާ ރާއްޖެ ގެނައުމުގެ ކުރިން ކަށަވަރު ކުރާނެ އެއީ ދިވެހިންކަން " އަންވަރު ވިދާޅުވިއެވެ.
އެންއާރްސީގެ ޑިރެކްޓަރ ޖެނެރަން އަންވަރު ނައީމް
އަންވަރު ވިދާޅުވި ގޮތުގައި ހަނގުރާމަކުރާ ސަރަޙައްދުތަކުގައި ތިބި ދިވެހިން ރާއްޖެއަށް އަންނަން ބޭނުންވެ، އެކަން އެ ސެންޓަރަށް އެންގުމުން އެންމެ ފުރަތަމަ އެއީ ދިވެހިންކަން ޔަގީންކުރުމަށް އެ ފަރާތްތަކުގެ ޑީއެންއޭ ޓެސްޓުތައް ހަދާނެއެވެ. އަދި އެއަށްފަހު އެ އާއިލާތައް ނުވަތަ މީހާ ރާއްޖެ ގެނެސް އެންއާރުސީގައި ބައިތިއްބައިގެން 30 ދުވަހުގެ އެސެސްމަންޓެއް ހަދާނެއެވެ. އެއެސެސްމަންޓަށް ފަހު އެއީ "ވިކްޓިމް" އެއްތޯ ބަލާ ޔަގީންކުރާނެއެވެ. އަދި ކޯޓަށް އެ އެސެސްމަންޓް ހުށަހަޅައި، ސެންޓަރުގައި ރިހިބިލިޓޭޝަން ޕްރޮގްރާމް ހިންގާނީ ކޯޓުން ކަނޑައަޅާ މުއްދަތަކަށް ކަމަށް ވެސް އަންވަރު ވިދާޅުވިއެވެ.
ހަނގުރާމައިގެ ސަރަހައްދުތަކުން އަނބުރާ ގައުމަށް އަންނަން ބޭނުންވެގެން ގެނެވޭ ދިވެހިން ބޭތިއްބުމަށް އެންއާރުސީގައި ރަނގަޅު ފެންވަރަށް ދިރިއުޅުވޭ ގޮތަށް ހަތަރު ބްލޮކް ހަދާފައިވެއެވެ. އޭގެ ތެރެއިން އެއް ބްލޮކް އަންހެނުންނަށް ހާއްސަކޮށްފައިވާއިރު އެއް ބްލޮކް 18 އަހަރު ނުފުރޭ ފިރިހެން ކުދިންނަށް، އެއް ބްލޮކް 18 އަހަރުން މަތީގެ ފިރިހެނުންނަށް އަދި އަނެއް ބްލޮކް އެކުގައި ތިބޭ އާއިލާތަކަށް ވަނީ ހާއްސަކޮށްފައެވެ. މި ބްލޮކްތަށް ހަދާފައިވަނީ ޖާގައިގެ ގޮތުން ތަނަވަސް، އަސާސީ ވަސީލަތްތަށް ފުރިހަމަ ތަންތަންގޮތުގައެވެ. މި ސެންޓަރުން އެއް ފަހަރާ 72 މީހުންނަށް އަދި 5 އާއިލާ ރިހިބިލިޓޭތް ކުރުމުގެ ގާބިލްކަން އެބަހުރި ކަމަށް އެސެންޓަރުން ބުންޏެވެ. ކޮންމެ ބްލޮކެއްގެ ވެސް ވަށައިގެން ގަސްހުރި ހުސްބިން ވެސް އޮވެއެވެ.
ބްލޮކްތަކުގައި އާއިލާ އެކުގައި ތިބެވޭގޮތަށް ހުއްޓަސް، ކޮންމެ ކުއްޖަކަށްވެސް ވަކި އެނދާއި އަލަމާރި ވެސް ހުއްޓެވެ.
އެ ސެންޓަރަށް ގެނެސް ތިބޭ މީހުން 24 ގަޑިއިރު މޮނިޓަރ ކުރުމުގެ އިންތިޒާމުވެސް ވަނީ ހަމަޖެހިފައެވެ.
ކުޑަކުދިންނަށާއި ބޮޑެތި މީހުންނަށް ނަސްފާނީ އެހީތެރިކަމާއި ފަރުވާ ދިނުމަށް ހާއްސަ ތެރަޕީ ރޫމުތަކެއް ހުރެއެވެ. އަދި ކުދިންނަށް ކިއަވައިދިނުމަށް ހާއްސަ ކްލާސް ރޫމްތަކާއި ކުދިން ކުޅެލާ އުޅޭނެ ތަންތަނާއި ލައިބްރަރީ ވެސް ހުރެއެވެ.
ޑިރެކްޓަރ ޖެނެރަލް އަންވަރު ވިދާޅުވީ އެތަނަށް އަންނަ ކުޑަކުދިންނަށް ލިޔަން ކިޔަން ދަސްކޮށްދިނުމަށް ހިންމަފުށީ ސްކޫލް ޓީޗަރުން މެދުވެރިކޮށް ސެންޓަރުގައި ކްލާސްތައް ނެގުމާއި، ކުޑަކުދިންނާއި ބޮޑެތި މީހުންނަށް ވޮކޭޝަނަލް ތަމްރީނުތައްވެސް ފޯރުކޮށްދޭ ކަމަށެވެ. އެގޮތުން މިސާލަކަށް އަންހެނުން ކޭކުއެޅުމާއި ކައްކަން ދަސްކުރުން ފަދަ މަސައްކަތް، މުޖުތަމައުއަށް ނިކުތުމުގެ ކުރިން އެތަނުން ދަސްކޮށްދެއެވެ.
އަޅުގަނޑަށް އެންމެ އަޅައިގަތް ކަމަކީ ކްލާސް ރޫމްތަކުގެ ފާރުތަކުގައި ހުރި ކުރިން އެތަނުގައި ތިބި ކުދިން ކޮށްފައިވާ މަސައްކަތްތަކެވެ. އެސެންޓަރުން ބުނި ގޮތުގައި އެތަނަށް ގެނެވޭ އިރު ގިނަފަހަރު ކުދިންނަށް އިނގިރޭސި އަދި ދިވެހި ބަހެއް ވެސް ނޭނގެއެވެ. ނަމަވެސް ކުދިން ގެ މަަސައްކަތަށް ބަލާލުމުން، ފެންނަނީ ވަރަށް ފުރިހަމަ މަސައްކަތްތަކެއް ދަސްކޮށްދީފައިވާތަނެވެ. އެސެންޓަރުން ބުނީ ކުދިންގެ އުމުރާ ގުޅޭ ގްރޭޑަކާ އެއް ލެވެލަކަށް ކުދިންގެ ފެންވަރު އަންނަންދެން އެތަނުން ކިޔަވާދިނުމަށްފަހު އެ ރަށު ސްކޫލަށް ފޮނުވާކަމަށެވެ. އަދި މޫދަށް ގެންދިއުމާއި އެނޫންވެސް އިޖުތިމާއި ހަރަކާތްތަކުގައި ކުދިން ބައިވެރިކޮށް ކަންކަން ދަސްކޮށްދޭ ކަމަށް އެސެންޓަރުން ބުންޏެވެ.
އެންއާރްސީއިން ނޫސްވެރިންނަށް މައުލޫމާތު ދިންގޮތުގައި މީގެ ކުރިން އާއިލާއެއް ގެނެސް އެސެންޓަރުން ވަނީ ރީއިންޓެގްރޭޓް ކޮށްފައެވެ. އެ އާއިލާ އަނބުރާ މުޖުތަމަޢަށް ނެރެފައިވަނީ ވަަރަށް ކާމިޔާބު ކަމާއެކުގައި ކަމަށް ވެސް އަންވަރު ވިދާޅުވިއެވެ.
މިވަގުތު އެތަނުގައި އެއްވެސް އާއިލާއެއް ނެތެވެ. މިގޮތަށް އަންނަން ބޭނުންވެގެން ގެނެވޭ އާއިލާ ތަކާއި ކުޑަކުދިންނަށް، ތަފާތު އެކި ފިކުރާއި ވިސްނުމުގެ މި މުޖުތަމައު އިން ވަރަށް ގިނަ ގޮންޖެހުންތަކާ ވެސް ކުރިމަތިވެދާނެއެވެ. ނަމަވެސް މި ސެންޓަރަށް ގޮސް ބަލާލުމުންނާއި، އެބޭފުޅުން ދެއްވި މައުލޫމާތުގެ އަލީގައި އެނގޭ އެއްކަމަކީ، އެ ސެންޓަރުން ރިހިބިލިޓޭޓްކޮށް މުޖުތަމައުއަށް ދޫކުރަނީ، ދިވެހި މުޖުތަމައުގައި އުޅެން ބޭނުންވާ އާއިލާތައްކަމާއި، ނަފްސާނީ، އިޖްތިމާއީ އެހީތެރިކަމާއި ފަރުވާ ދެވި މުޖުތަމައުއަށް އަހުލުވެރި ކޮށް، އަދި އިތުރު ފަސް އަހަރުވަންދެން އެސެންޓަރުން އެމީހުން މޮނިޓަރކޮށް ބަލާނެ މީހުންނާއި އާއިލާތަށް ކަމެވެ. މި ސެންޓަރުން ރީއިންޓަގްރޭޓް ކުރުމަށް، ގެނެވެނީ، އެގެންނަ މީހުންގެ އާއިލާތަކުން އެކަން ބޭނުންވެގެން ސެންޓަރަށް ހުށަހެޅުމުން، ބަލަންޖެހޭ ކަންކަމަށް ބެލުމަށްފަހުގައެވެ.
